អ្នកជំងឺរបេងនៅកម្ពុជាមានកម្រិតខ្ពស់
2013.03.21
អ្នកជំងឺរបេងសម្រាកព្យាបាលនៅមជ្ឈមណ្ឌលជាតិកម្ចាត់ជំងឺរបេង និងហង់សិន នារាជធានីភ្នំពេញ កាលពីអំឡុងខែមីនា ឆ្នាំ២០១១។
មន្ត្រីសុខាភិបាលវាយតម្លៃថា នៅក្នុងប្រទេសកម្ពុជា ក្នុងចំណោមមនុស្ស ២នាក់ គឺមាន ១នាក់មានមេរោគរបេងក្នុងខ្លួន។ តួលេខនេះ ត្រូវបានទីប្រឹក្សាក្រសួងសុខាភិបាល និងជានាយកមជ្ឈមណ្ឌលជាតិកំចាត់រោគរបេង និងហង់សិន គឺលោកវេជ្ជបណ្ឌិត ម៉ៅ តាន់អ៊ាង ចាត់ទុកថា ជាតួលេខខ្ពស់នៅឡើយ។ ក៏ប៉ុន្តែ លោកវេជ្ជបណ្ឌិត ម៉ៅ តាន់អ៊ាង បញ្ជាក់ថា ទោះជាមានមេរោគរបេងក្នុងខ្លួនដូច្នេះក្ដី ក៏មិនទាន់បង្កទៅជាជំងឺដែរ។ ជំងឺរបេងចាប់ផ្ដើមកើតនៅពេលណាប្រព័ន្ធរាងកាយយើងចុះទ្រុឌទ្រោម និងមានវ័យជរា។
លោកវេជ្ជបណ្ឌិត ម៉ៅ តាន់អ៊ាង មានប្រសាសន៍ថា ក្នុងរយៈពេលជាង ១០ឆ្នាំកន្លងមកនេះ កម្មវិធីកម្ចាត់ជំងឺរបេងថ្នាក់ជាតិរបស់កម្ពុជា ត្រូវបានអង្គការសុខភាពពិភពលោកទទួលស្គាល់ថា បានជោគជ័យក្នុងការកាត់បន្ថយចំនួនអ្នកស្លាប់ដោយសារជំងឺរបេងបានយ៉ាងច្រើន។
បើទោះជាតួលេខទូទៅរបស់ថ្នាក់ជាតិបង្ហាញការធ្លាក់ចុះក្ដី នាយិកាផ្នែកជំងឺឆ្លងនៃមន្ទីរពេទ្យព្រះសីហនុ មណ្ឌលនៃក្ដីសង្ឃឹម រាជធានីភ្នំពេញ គឺអ្នកស្រីវេជ្ជបណ្ឌិត ថៃ សុភ័គ ថ្លែងថា រហូតមកដល់ពេលនេះ ប្រទេសកម្ពុជា នៅមានអ្នកជំងឺរបេងប្រមាណ ៤ម៉ឺននាក់។
ដោយឡែកក្នុងឆ្នាំ២០១២ កន្លងទៅ អ្នកជំនាញស្រាវជ្រាវនៃមន្ទីរពេទ្យព្រះសីហនុ មណ្ឌលនៃក្ដីសង្ឃឹម បានរកឃើញថា នៅក្នុងរាជធានីភ្នំពេញ ក៏មានចំនួនច្រើនដែរ។
នៅក្នុងកិច្ចប្រជុំផ្សព្វផ្សាយអំពីលទ្ធផលស្រាវជ្រាវរបេងសកម្ម តាមគម្រោងដែលមានឈ្មោះជាភាសាអង់គ្លេសថា ធីប៊ី អៅរីច (TB Outreach) ឆ្នាំទី១ ចាប់ពីខែកុម្ភៈ ឆ្នាំ២០១២ ដល់ខែកុម្ភៈ ឆ្នាំ២០១៣ អ្នកស្រីវេជ្ជបណ្ឌិត ថៃ សុភ័គ បង្ហាញថា ក្នុងចំណោមអ្នកដែលបានធ្វើសម្ភាសចំនួនប្រមាណ ៣សែននាក់ នៅរាជធានីភ្នំពេញ មានអ្នកកើតជំងឺរបេងគ្រប់សណ្ឋានចំនួន ៧៣៣នាក់ ហើយក្នុងចំណោមតួលេខនេះ ចំនួន ៦៨៧នាក់មានរបេងសួត។
ប្រធានកម្មវិធី លោកវេជ្ជបណ្ឌិត ជួន គឹមចេង ឱ្យដឹងថា ករណីជំងឺរបេងភាគច្រើនត្រូវបានរកឃើញនៅជាយក្រុងភ្នំពេញភាគខាងលិច និងខាងត្បូង ដែលសម្បូរណ៍មនុស្សរស់នៅប្រមូលផ្ដុំ និងសហគមន៍អ្នកក្រីក្រ។
អ្នកជំនាញបញ្ជាក់ថា ជំងឺរបេង ជាជំងឺសួតដែលឆ្លងមេរោគនៅក្នុងខ្យល់ដកដង្ហើម តាមរយៈការក្អក ឬកណ្ដាស់របស់អ្នកជំងឺរបេង ដែលមិនបានខ្ទប់មាត់ និងច្រមុះ។ រោគសញ្ញាសង្ស័យនៃរបេង មានដូចក្អករ៉ាំរ៉ៃលើសពី ២អាទិត្យ គ្រុន និងបែកញើសពេលយប់ ធំបាយ និងស្រកទម្ងន់ជាដើម។
លោកវេជ្ជបណ្ឌិត ម៉ៅ តាន់អ៊ាង ណែនាំឱ្យអ្នកមានរោគសញ្ញាទាំងនេះប្រញាប់ទៅជួបគ្រូពេទ្យ ដើម្បីព្យាបាលឱ្យទាន់ពេលវេលា ដែលសេវាព្យាបាលជំងឺនេះរដ្ឋផ្ដល់ដោយឥតគិតថ្លៃ។ លោកវេជ្ជបណ្ឌិតបន្តថា ការព្យាបាលជំងឺរបេងមានតម្លៃថោក។ ក៏ប៉ុន្តែ នៅពេលណាអ្នកជំងឺលេបថ្នាំមិនបានត្រឹមត្រូវ អាចបណ្ដាលឱ្យរោគស៊ាំនឹងថ្នាំ ហើយការព្យាបាលអ្នកជំងឺស៊ាំថ្នាំនេះ នឹងត្រូវចំណាយរាប់រយដងលើសធម្មតា។
នាយិកាផ្នែកជំងឺឆ្លងនៃមន្ទីរពេទ្យព្រះសីហនុ មណ្ឌលនៃក្ដីសង្ឃឹមរាជធានីភ្នំពេញ គឺអ្នកស្រីវេជ្ជបណ្ឌិត ថៃ សុភ័គ បង្ហាញថា ក្នុងឆ្នាំ២០១១ ពិភពលោកមានករណីរបេងថ្មីជិត ៩លាននាក់។ ក្នុងនោះ កុមារ ៥០ម៉ឺននាក់។ ករណីស្លាប់ដោយសារជំងឺរបេងមានមនុស្សចាស់ ១លាន ៤សែននាក់ និងកុមារ ៦ម៉ឺន ៤ពាន់នាក់។ អ្នកស្លាប់ដោយសាររបេងទាំងនេះ គឺចំនួន ៩៥% នៅក្នុងប្រទេសក្រីក្រ និងកំពុងអភិវឌ្ឍន៍។ សហគមន៍ក្រីក្រ និងក្រុមងាយរងគ្រោះ ជាក្រុមអាចឆ្លងជំងឺ និងស្លាប់ខ្ពស់។ អ្នកជំងឺរបេងដែលស៊ាំនឹងថ្នាំច្រើនមុខ ចំនួន ៦ម៉ឺននាក់ ត្រូវបានចុះក្នុងបញ្ជីព្យាបាល នៅចុងឆ្នាំ២០១១។
អ្នកស្រីវេជ្ជបណ្ឌិត ថៃ សុភ័គ បង្ហាញថា ការស្រាវជ្រាវដែលបានធ្វើនៅរាជធានីភ្នំពេញរយៈពេល ១ឆ្នាំកន្លងមកនេះ មានអ្នកជំងឺរបេងចំនួន ៨នាក់ ដែលស៊ាំនឹងថ្នាំព្យាបាលឈ្មោះ រីហ្វាមពីស៊ីន (Rifampicin)។ អ្នកស្រីវេជ្ជបណ្ឌិតបញ្ជាក់បន្ថែមថា បច្ចុប្បន្ននេះ មន្ទីរពេទ្យនៅរាជធានីភ្នំពេញ មានម៉ាស៊ីនពិនិត្យកាន់តែទំនើប ដែលអាចរកមេរោគរបេងបានប្រសើរជាងមុន។ ក្រុមអ្នកស្រាវជ្រាវកំពុងប្រឹងប្រែងស្វែងរកករណីរបេងឱ្យបានច្រើន ដើម្បីព្យាបាលទាន់ពេល មុនពេលដែលសួតខូច និងកាត់បន្ថយការចម្លងនៅក្នុងសហគមន៍។
លោកវេជ្ជបណ្ឌិត ម៉ៅ តាន់អ៊ាង ណែនាំថា ដើម្បីកាត់បន្ថយការឆ្លងមេរោគរបេង និងមេរោគផ្សេងៗមួយចំនួន មនុស្សគ្រប់រូបគប្បីខ្ទប់មាត់ និងច្រមុះនៅពេលណាក្អក ឬកណ្ដាស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា