តើបុរសនិងស្ត្រី មានអាយុលើសពី ៥០ឆ្នាំឡើងទៅ ច្រើនមានបញ្ហាសុខភាពអ្វីខ្លះ?
2020.10.02
តើបុរសនិងស្ត្រី មានអាយុលើសពី ៥០ឆ្នាំឡើងទៅ ច្រើនមានបញ្ហាសុខភាពអ្វីខ្លះ?
RFA
គ្រូពេទ្យជំនាញសុខភាពផ្ដល់យោបល់ថា ទាំងបុរសនិងស្ត្រី នៅពេលអាយុលើសពី៥០ឆ្នាំឡើងទៅ នឹងអាចមានបញ្ហាសុខភាពទាំងផ្លូវកាយ និងផ្លូវចិត្ត។ តើបញ្ហាសុខភាពទាំងនោះមានអ្វីខ្លះនិង វិធីណាខ្លះ ដើម្បីរក្សាសុខភាពឲ្យបានល្អប្រសើរ?
អ្នកជំនាញសុខភាពលើកឡើងថា មនុស្សមានអាយុលើសពី ៥០ឆ្នាំឡើងទៅ អាចមានជំងឺមហារីកពោះវៀនធំ ជំងឺគាំងបេះដូង ជំងឺដាច់សរសៃឈាមក្នុងខួរក្បាល និងជំងឺផ្លូវចិត្ត ជាដើម។ ក្រុមគ្រូពេទ្យលើកឡើងថា វិធីដ៏ល្អបំផុតគឺត្រូវប្រកាន់យករបៀបរស់នៅដែលមានសុខភាពល្អ និងទៅពិនិត្យសុខភាពឲ្យបានទៀងទាត់។
លោកវេជ្ជបណ្ឌិតជំនាញខ្មែរអាមេរិកាំង ផេង សុធីរ មានប្រសាសន៍ប្រាប់អាស៊ីសេរីតាមទូរស័ព្ទថា បញ្ហាធំៗបី ដែលជាមូលហេតុចម្បង បណ្ដាលឲ្យប៉ះពាល់ដល់សុខភាពខ្លាំង ក្រោយអាយុ៥០ ឆ្នាំ រួមមាន ការទទួលទានប្រៃពេក ដែលនាំឲ្យកើតជំងឺលើសឈាម ពិសាជាតិស្ករច្រើនពេកនាំឲ្យកើតជំងឺទឹកនោមផ្អែម ហើយនឹងទទួលទានជាតិខ្លាញ់ច្រើនពេក នាំឲ្យកើតកូលេស្តេរ៉ូ ដែលនាំឲ្យស្ទះ និងដាច់សរសៃឈាមក្នុងខួរក្បាល។ បន្ថែមពីនេះ លោកថា ទាំងបុរសនិងស្ត្រី ត្រូវទៅពិនិត្យសុខភាពឲ្យបានទៀងទាត់យ៉ាងតិច មួយឆ្នាំម្តង៖ «លើសពី៥០ឆ្នាំ ទី១ ឆ្លុះពិនិត្យពោះវៀនធំ ខ្លះចាប់ផ្តើមពីអាយុ៤៥ឆ្នាំ។ ទី២ ទាំងប្រុសទាំងស្រី គឺជំងឺបេះដូង (Heart Attack) អាហ្នឹងមិនមែនកើតភ្លាមៗទេ គឺលើសពី៥០ឆ្នាំទៅ យើងត្រូវពិនិត្យមើលអ្វីដែលយើងញ៉ាំ កុំឲ្យញ៉ាំជាតិប្រៃច្រើនពេក ជាតិស្ករច្រើនពេក កុំឲ្យទទួលទានជាតិខ្លាញ់ច្រើនពេក។ បីហ្នឹងវាធ្វើឲ្យសរសៃឈាមដើរអត់ស្រួល បើស្ទះនៅខួរក្បាល កើត (Stroke) ស្ទះបេះដូង កើត Heart Attack និងស្ទះនៅកន្លែងផ្សេងទៀត»។
បន្ថែមពីនេះលោកវេជ្ជបណ្ឌិតថា បញ្ហាប្រែប្រួលអារម្មណ៍ ឆាប់ខឹង មួរម៉ៅ និងភាពតានតឹងក្នុងចិត្ត ក៏កើតឡើងច្រើនដែរចំពោះអ្នកមានអាយុលើសពី៥០ឆ្នាំឡើងទៅ។ លោកវេជ្ជបណ្ឌិត ផេង សុធីរ មានប្រសាសន៍ថា ភាគច្រើន មិនថាពលរដ្ឋខ្មែរ ឬជនជាតិអាមេរិកាំងទេ គឺច្រើនតែមានបញ្ហាស្មុគស្មាញក្នុងជីវិត និងបញ្ហារកាំរកូសក្នុងគ្រួសារ ឬអាចនិយាយបានថា វិបត្តិមជ្ឈិមវ័យ ឬភាសាអង់គ្លេសហៅថា Midlife Crisis។ លោកថា បញ្ហានេះ ភាគច្រើនបណ្ដាលឲ្យលែងលះគ្នា ហើយករណីខ្លះ ធ្វើឲ្យជីវិតកាន់តែជួបបញ្ហាលំបាកខ្លាំងឡើង៖ «ទី៣ គឺបញ្ហាផ្លូវចិត្ត។ ធម្មតាលើសពី៥០ឆ្នាំទៅ សំខាន់ណាស់ជាពិសេសបុរស ជួនកាលទៅប្ដីប្រពន្ធមិនត្រូវគ្នា លែងលះគ្នា កូនធំ។ អ្នកខ្លះរៀបការយូរទៅ ចេះតែមើលឃើញអញ្ចេះអញ្ចុះទៅ អ្នកនេះគ្រាន់បើជាងប្តីយើង ឬប្រពន្ធយើង ប៉ុន្តែបោះចោលរបស់ចាស់ ទៅយករបស់ថ្មី ជួនកាលមិនអ៊ីចឹងទេ ធ្វើឲ្យឈឺក្បាល លើសដើម...»។
លោកវេជ្ជបណ្ឌិត ផេង សុធីរ បន្តថា ការស្រាវជ្រាវក៏បានបង្ហាញផងដែរថា បុរសភាគច្រើន ប្រសិនបើមិនបានរៀបការម្តងទៀត ឬមានគូស្រករថ្មី ច្រើនតែមានបញ្ហាផ្លូវចិត្តធ្ងន់ធ្ងរ រហូតដល់ខ្លះ ប្រើប្រាស់គ្រឿងញៀន និងញៀនស្រា ជាដើម។ អាស្រ័យហេតុនេះ លោកណែនាំថា មុនសម្រេចធ្វើអ្វីមួយ ត្រូវគិតពិចារណាឲ្យបានត្រឹមត្រូវ និងច្បាស់លាស់៖ «ម្យ៉ាងទៀតជាពិសេស ដូចខ្ញុំនិយាយអ៊ីចឹង មនុស្សប្រុសត្រូវការដៃគូស្នេហា ត្រូវការមិត្តភ័ក្ដិនិយាយជាមួយ។ អ្នកខ្លះMidLife Crisis ដល់ពេលលែងលះគ្នាទៅ គឺតែលតោលម្នាក់ឯង មនុស្សប្រុសលើសពី៥០ឆ្នាំឡើងទៅ សម្លាប់ខ្លួនច្រើន មកពីរឿងហ្នឹង។ ប៉ុន្តែជួនកាល ខ្លះទៅប្រើគ្រឿងញៀន ផឹកស្រាច្រើនអីអ៊ីចឹងទៅ...»។
គេហទំព័រសុខភាពក្រុមគ្រូពេទ្យជំនាញ WebMD និងគេហទំព័រសុខភាពជាច្រើនទៀត ឲ្យដឹងថា កាលណាអាយុលើសពី៥០ឆ្នាំឡើងទៅ រាងកាយរបស់មនុស្សមានការប្រែប្រួល ដូចជាឡើងទម្ងន់ សក់ជ្រុះ ឬសក់ប្រែពណ៌ស មុខមាត់ឡើងជ្រីវជ្រួញ ថ្លង់ ឬត្រចៀក មិនសូវស្តាប់ឮ និងគ្មានមានថាមពលជាដើម។ ក៏ប៉ុន្តែនេះ មិនមែនមានន័យថា យើងបញ្ឈប់នូវសកម្មភាពនានាដែលយើងអាចធ្វើបាន ឬក៏លែងគិតគូរពីសុខភាពរាងកាយ និងផ្លូវចិត្តរបស់យើងនោះដែរ។
ក្រុមវេជ្ជបណ្ឌិតលើកឡើងថា អ្នកមានអាយុលើសពី ៥០ឆ្នាំ ក្រៅតែពីជំងឺគាំងបេះដូង និងជំងឺដាច់សរសៃឈាមក្នុងខួរក្បាល ដែលជាមូលហេតុចម្បងបណ្ដាលឲ្យស្លាប់ភ្លាមៗនោះ ពួកគេក៏អាចជួបបញ្ហាជំងឺផ្សេងទៀតជាច្រើនដែរដូចជា មហារីកសុដន់ មហារីកក្រពេញប្រូស្តាត មហារីកពោះវៀនធំ គ្រួសក្នុងប្រមាត់ គ្រួសក្នុងតម្រងនោម ការរលាកសួត ការរលាកសន្លាក់ដៃជើង ជំងឺពុកឆ្អឹង វិលមុខ ជំងឺភ្នែក ឈឺចុកចាប់ក្នុងពោះ និងជំងឺធ្លាក់ទឹកចិត្ត ជាដើម។
ទំព័រសុខភាពដដែលបន្តថា ដើម្បីថែទាំសុខភាពឲ្យបានល្អប្រសើរ មានថាមពលគ្រប់គ្រាន់សម្រាប់ការរស់នៅប្រចាំថ្ងៃប្រកបដោយផាសុកភាព ទាំងបុរសនិងស្ត្រីត្រូវទទួលទានរបបអាហារទ្រទ្រង់សុខភាព ដូចជា បន្លែនិងផ្លែឈើឲ្យបានច្រើន សាច់ត្រីនិងសាច់គ្មានខ្លាញ់ គ្រាប់ធញ្ញជាតិ និងទទួលទានទឹកឲ្យបានច្រើន។ បន្ថែមពីនេះ ត្រូវដើរហាត់ប្រាណយ៉ាងតិចឲ្យបាន ៣០នាទីក្នុងមួយថ្ងៃ រក្សាទម្ងន់កុំឲ្យធាត់ខ្លាំងពេក ពីព្រោះកាលណាវ័យចាស់ គឺងាយនឹងឡើងទម្ងន់ ប្រសិនបើមិនប្រុងប្រយ័ត្ន។ បញ្ឈប់ការជក់បារី ការប្រើប្រាស់គ្រឿងញៀន កាត់បន្ថយការសេពសុរា ឬគ្រឿងស្រវឹងច្រើនហួសហេតុពេក និងត្រូវគេង សម្រាកពេលយប់ឲ្យបានគ្រប់គ្រាន់ គឺចន្លោះពី ៧ទៅ៨ម៉ោង។ សំខាន់ជាងនេះទៀត គឺកាត់បន្ថយភាពតានតឹង និងស្មុគស្មាញក្នុងចិត្ត ហើយប្រសិនបើមានបញ្ហាធ្លាក់ទឹកចិត្ត ដែលនាំឲ្យកើតទុក្ខ និងពិបាកចិត្តរហូត គឺត្រូវទៅពិគ្រោះយោបល់ជាមួយគ្រូពេទ្យជំនាញ ដើម្បីទទួលបានសេវាព្យាបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា