ស្ថិតិរបស់អង្គការយូនីសេហ្វ បានឲ្យដឹងថា ក្នុងមួយឆ្នាំៗមានស្ត្រីប្រមាណ ១.៧០០នាក់នៅក្នុងប្រទេសកម្ពុជា បានស្លាប់ខណៈកំពុងមានផ្ទៃពោះក្នុងពេលសម្រាលកូន និងក្រោយពេលសម្រាលកូនរួច។ នេះមានន័យថា ក្នុងចំណោមស្ត្រីសម្រាលកូន ១សែននាក់ គឺមានមាតាស្លាប់ចំនួន ៤៦១នាក់ ដែលចំនួននេះគឺមានអត្រាខ្ពស់ បើប្រៀបធៀបទៅនឹងប្រទេសនានានៅក្នុងតំបន់អាស៊ីអាគ្នេយ៍ ហើយថា ភាគច្រើននៃមរណភាពរបស់មាតា និងទារកទាំងនេះ គួរតែអាចការពារបាន។
អ្នកជំនាញសុខភាពបានឲ្យដឹងថា ហេតុផលដែលនាំឲ្យមានអត្រាខ្ពស់នៃការស្លាប់របស់មាតាពេលឆ្លងទន្លេនេះ គឺបណ្ដាលមកពីការខ្វះខាតពេទ្យឆ្មបជំនាញ មជ្ឈមណ្ឌលសុខភាពនៅតាមជនបទនៅមានកម្រិតតិច តម្លៃសេវាសុខភាព ការពុំយកចិត្តទុកដាក់របស់គ្រូពេទ្យ ភាពស្មុគស្មាញនៅពេលសម្រាលកូនជាដើម។
ទោះជាយ៉ាងណាក្ដី លោកវេជ្ជបណ្ឌិត ស៊ីន សុមុនី នាយកប្រតិបត្តិនៃអង្គការសុខភាពនៅកម្ពុជា ដែលហៅកាត់ថា ម៉េឌីខាំ (MEDICAM) បានមានប្រសាសន៍ប្រាប់វិទ្យុអាស៊ីសេរីថា អត្រានៃមរណភាពមាតាដោយសារសម្រាលកូនសព្វថ្ងៃនេះ បានថយចុះមួយកម្រិតដែរបើប្រៀបធៀបពីមុន ៖ «ពេលបច្ចុប្បន្ននេះមានការថយចុះអត្រាស្ត្រីមាតាស្លាប់ ពី ៤៧២នាក់ ក្នុងចំណោម ១សែននាក់ មកត្រឹម ២៨០នាក់ ប៉ុន្តែអត្រាស្លាប់សម្រាប់ឆ្នាំ២០១០នេះ នឹងចេញផ្សាយនៅពេលឆាប់ៗខាងមុខនេះ។ ២០០៥ គឺស្ថិតិនៅដដែល អត់ចុះទេ គឺចំនួនអ្នកស្លាប់មាន ៤៧២នាក់ ក្នុង១សែននាក់ ប៉ុន្តែឥឡូវនេះស្ត្រីមកសម្រាលកូនដោយឆ្មប ឬគ្រូពេទ្យមានជំនាញបានកើនឡើងដល់ទៅចំនួនជាង ៦៩,៦%»។
យោងតាមស្ថិតិអង្គការសុខភាពពិភពលោក បានឲ្យដឹងថា អត្រាមរណភាពនៃមាតាក្នុងពេលសម្រាលកូននៅតាមជនបទ គឺមានចំនួនច្រើនលើសជាង ៣ដង នៅតាមទីក្រុង ហើយថា ជិត ៤០% នៃចំនួនមាតាសម្រាលកូននៅកម្ពុជា គឺផ្ដល់សេវាដោយឆ្មប ឬគ្រូពេទ្យពុំមានវិជ្ជាជីវៈជំនាញពិតប្រាកដក្នុងការជួយសង្គ្រោះជីវិតស្ត្រីជាមាតានៅពេលមានគ្រោះអាសន្នកើតឡើងក្នុងពេលសម្រាលកូន ដូចជាកើតកូនមិនចេញ ឬធ្លាក់ឈាមខ្លាំងជាដើម។
លោកវេជ្ជបណ្ឌិត ស៊ីន សុមុនី បានមានប្រសាសន៍បន្តថា ក្រសួងសុខាភិបាល និងក្រសួងពាក់ព័ន្ធ បានយល់ច្បាស់អំពីឧបសគ្គមួយចំនួនដែលនាំឲ្យមានការស្លាប់មាតានេះ ៖ «សព្វថ្ងៃនេះទាំងក្រសួងសុខាភិបាល ទាំងអង្គការមិនមែនរដ្ឋាភិបាល និងអង្គការសុខភាពពិភពលោក បានដឹងបញ្ហានេះច្បាស់ណាស់ ដែលស្ត្រីក្រីក្រគាត់មានការលំបាកក្នុងការទទួលសេវាសុខាភិបាល ទាំងពីការធ្វើដំណើរ ការបង់សេវា។ ចំណុចមួយដែលគេបានដោះស្រាយហើយ គឺគេបានបង្កើតមូលនិធិសមធម៌សម្រាប់ជួយដល់ស្ត្រីក្រីក្រ»។
ប៉ុន្តែបញ្ហាបង្កើតជាមូលនិធិសមធម៌នេះ លោកវេជ្ជបណ្ឌិត ស៊ីន សុមុនី បានទទួលស្គាល់ថា នៅមិនទាន់បានធំទូលាយនៅតាមខេត្តក្រុងទាំង២៤ នៅក្នុងប្រទេសកម្ពុជា បាននៅឡើយទេ។
ទោះជាយ៉ាងណាក៏ដោយ កាលពីពេលថ្មីៗនេះ លោកនាយករដ្ឋមន្ត្រី ហ៊ុន សែន ក៏បានអំពាវនាវផងដែរ ដល់ក្រុមវេជ្ជបណ្ឌិត គ្រូពេទ្យឆ្មប និងភ្នាក់ងារសុខាភិបាលទាំងអស់ ឲ្យមានក្រមសីលធម៌ខ្ពស់ក្នុងវិជ្ជាជីវៈ យកចិត្តទុកដាក់បន្ថែមព្យាបាលអ្នកជំងឺ ជៀសវាងការគិតប្រាក់ជាធំ ៖ «ត្រូវខិតខំកែប្រែឥរិយាបថរបស់ខ្លួនឲ្យស្របតាមក្រមសីលធម៌ វិជ្ជាជីវៈផ្នែកសុខាភិបាលក្នុងការប្រាស្រ័យទាក់ទងជាមួយប្រជាជន ឬអ្នកជំងឺដែលឈរលើគោលការណ៍បច្ចេកទេស និងមនុស្សធម៌ និងប្រកាន់ខ្ជាប់នូវគុណធម៌ សច្ចៈធម៌ និងស្មារតីភ្ញាក់រឭកខ្ពស់។ មិនត្រូវទុកអ្នកជំងឺចោលឲ្យស្លាប់ ត្រូវយកចិត្តទុកដាក់មើលការព្យាបាលសិន»។
របាយការណ៍របស់អង្គការយូនីសេហ្វដដែលបន្តថា បន្ថែមពីការស្លាប់ជីវិតមាតានៅពេលសម្រាលកូននេះ មានទារកប្រមាណជា ១ម៉ឺននាក់ក្នុងមួយឆ្នាំៗ បានស្លាប់នៅពេលដែលកំពុងកើត និងកើតរួចហើយ។ របាយការណ៍បានបន្តថា ចំនួនមរណភាពនៃទារកនេះ គឺមានកម្រិតខ្ពស់ណាស់ ដែលមិនអាចទទួលយកបាន ពីព្រោះថា ហេតុផលនៃការស្លាប់របស់ទារក គឺគេអាចការពារបាន ហើយមូលហេតុទាំងនោះ រួមមានបណ្ដាលមកពីកង្វះខាតនៃការត្រួតពិនិត្យ និងការថែរក្សាគភ៌ និងសុខភាពរបស់ស្ត្រីជាមាតាឲ្យបានទៀងទាត់នៅមុនពេលសម្រាលកូន។
អាស្រ័យហេតុនេះ ដើម្បីកាត់បន្ថយអត្រាស្លាប់របស់ម្ដាយ និងទារក អង្គការយូនីសេហ្វ បានសហការជាមួយរាជរដ្ឋាភិបាលកម្ពុជា ដើម្បីពង្រីកការហ្វឹកហ្វឺនដល់ឆ្មប ឬគ្រូពេទ្យដែលបង្កើតកូនធ្វើឲ្យប្រសើរឡើងនូវបន្ទប់សង្គ្រោះជាបន្ទាន់ផ្នែកសម្រាលកូន ដោយមានឧបករណ៍គ្រប់គ្រាន់ និងទំនើបៗ។ ពង្រឹងការផ្ដល់សេវាថែទាំ និងត្រួតពិនិត្យគភ៌របស់ស្ត្រីឲ្យបានទៀងទាត់ ក្នុងនោះនឹងជំរុញឲ្យមានគ្រូពេទ្យជំនាញទៅតាមផ្ទះ ពិនិត្យភាពស្មុគស្មាញរបស់ស្ត្រីមានគភ៌ ហើយនិងផ្សព្វផ្សាយឲ្យស្ត្រីមានការយល់ដឹងអំពីសារសំខាន់នៃការថែទាំសុខភាព និងគ្រោះថ្នាក់ដល់ជីវិតនៅពេលសម្រាលកូន៕