ទោះបីជានៅក្នុងប្រទេសកម្ពុជា គេពុំមានស្ថិតិពិតប្រាកដនូវចំនួនបុរសដែលចូលចិត្តរៀបការជាមួយស្ត្រីវ័យក្មេងក៏ដោយ ក៏ប៉ុន្តែបើតាមការអះអាងរបស់មន្ត្រីសង្គមស៊ីវិលបានឲ្យដឹងថា បច្ចុប្បន្ននេះមានបុរសខ្មែរជាច្រើន ទាំងនៅក្នុងស្រុកក៏ដូចជានៅក្រៅស្រុក ស្រឡាញ់ពេញចិត្តរៀបការជាមួយនឹងស្ត្រីដែលមានវ័យក្មេងច្រើន រហូតដល់បុរសខ្លះមានវ័យចាស់អាចធ្វើជាឪពុក ឬក៏ជីតារបស់ស្ត្រីជាភរិយាក្មេងនោះទៀតផង។
លោកស្រី លឹម មុន្នី ប្រធានកម្មវិធីស្ត្រីនិងកុមារនៃសមាគមអាដហុក បានមានប្រសាសន៍ប្រាប់អំពីអ្វីដែលលោកស្រីបានឃើញកំពុងកើតមានឡើងក្នុងសង្គមខ្មែរសព្វថ្ងៃនេះ ៖ «ស្រុកខ្មែរពេលបច្ចុប្បន្នខ្ញុំសង្កេតឃើញថា មានបុរសជាអាណិកជនជាតិខ្មែរ ជាពិសេសនៅសហរដ្ឋអាមេរិក ប្រទេសបារាំង កាណាដា អូស្ត្រាលី ភាគច្រើនមកដណ្ដឹងប្រពន្ធរៀបការនៅប្រទេសកម្ពុជា ភាគច្រើនច្រើនតែជាបុរសមានវ័យចាស់ខ្លាំង ហើយមករៀបការប្រពន្ធនៅប្រទេសកម្ពុជា ជានារីដែលក្មេងបំផុត ខ្លះស្មើកូន អ្នកខ្លះស្មើនឹងចៅ។ មិនមែនតែបុរសដែលនៅក្រៅប្រទេសទេ សូម្បីតែបុរសដែលនៅក្នុងប្រទេស អ្នកធ្លាប់មានប្រពន្ធហើយ ឬក៏អ្នកដែលលែងប្រពន្ធ ឬក៏អ្នកដែលកំពុងតែនៅមានជាប់ចំណងអាពាហ៍ពិពាហ៍ ក៏ដូចជាអ្នកដែលយកលេសលែងប្រពន្ធអ៊ីចឹង យើងសង្កេតឃើញថាមានការប្រែប្រួលច្រើន»។
ស្ថិតិស្រាវជ្រាវថ្មីៗនេះនៅសហរដ្ឋអាមេរិកក៏បានបង្ហាញថា បច្ចុប្បន្ននេះចំនួនបុរសដែលរៀបការជាមួយស្ត្រីវ័យក្មេងៗ មានការកើនឡើងច្រើនជាងកាលពីនៅទសវត្សរ៍ឆ្នាំ៦០។ ហើយយោងតាមស្ថិតិស្រាវជ្រាវនៅប្រទេសអង់គ្លេស ក៏បានឲ្យដឹងផងដែរថា ស្ត្រីរៀបការជាមួយបុរសវ័យក្មេងជាងខ្លួន ក៏មានកើនចំនួនច្រើនដែរ គឺកើនពី១៥% នៅឆ្នាំ១៩៦៣ មក២៦% ក្នុងឆ្នាំ១៩៩៨ ហើយស្ត្រីរៀបការជាមួយបុរសវ័យក្មេងលើសពី ៦ឆ្នាំឡើងទៅនោះ គឺកើនពី៣% មក ៧%។
ទាក់ទងនឹងសំណួរដែលចង់ដឹងថាតើ មានកត្តាអ្វីដែលជំរុញឲ្យបុរសខ្មែរវ័យចំណាស់ៗ ចង់រៀបការជាមួយស្ត្រីវ័យក្មេងច្រើនជាង ហើយហេតុដូចម្តេចបានជាស្ត្រីវ័យក្មេងៗទាំងនោះ សុខចិត្តរៀបការជាមួយ?
ទាក់ទងនឹងបញ្ហានេះ លោកស្រី លឹម មុន្នី នៃសមាគមអាដហុក បានធ្វើការពន្យល់អំពីផ្នត់គំនិតសង្គមខ្មែរ និងការប្រាថ្នាចង់បានទាំងស្ត្រីនិងបុរសយ៉ាងដូច្នេះ ៖ «ខ្ញុំធ្លាប់មានបទពិសោធន៍ ឬក៏ជួបរឿងច្រើននៅស្រុកខ្មែរ។ ចំពោះតែស្រុកខ្មែរមួយ យើងឃើញថាបុរសៗឥឡូវនេះ ច្រើនតែរៀបការ ឬមិនរៀបការក៏ដោយ ដៃគូជីវិតរបស់គេច្រើនតែយកក្មេងជាង។ ដោយសារយើងឃើញថាមនុស្សចាស់ទាំងនេះ គាត់មានចំណង់ផ្លូវភេទជាមួយក្មេងៗ ទី១។ ទីពីរដោយសារតែស្ត្រីក្មេងៗទាំងនោះ ត្រូវការលុយ ត្រូវការមនុស្សចាស់ជាមនុស្សដែលមានមុខរបរ មានការងារ ហើយអាចសន្សំលុយបានរយៈពេលយូរមកហើយ។ សំខាន់នារីហ្នឹងគាត់សំឡឹងថាមនុស្សចាស់ហ្នឹងមានផ្ទះហើយស្រាប់ មានឡានជិះស្រាប់ មានថវិកាផ្គត់ផ្គង់ហើយស្រាប់ ដោយមិនបាច់ខំរកពីបាតដៃទទេ»។
អត្ថបទស្រាវជ្រាវកាលពីពេលថ្មីៗនេះរបស់ក្រុមអ្នកវិទ្យាសាស្ត្រ ដែលបានចុះផ្សាយក្នុងទំព័រវ៉ឹបសៃថ៍ NEWS.com បានឲ្យដឹងថា ការវិវឌ្ឍនិងការប្រែប្រួលជាលំដាប់ក្នុងសង្គមបច្ចុប្បន្ននេះ បានជំរុញឲ្យបុរសស្វែងរកស្ត្រីវ័យក្មេងៗដើម្បីរៀបការជាមួយ ពីព្រោះថាស្ត្រីវ័យក្មេងមានរូបរាងកាយស្រស់ស្អាត មិនត្រឹមតែទាក់ទាញបុរសឲ្យមានអារម្មណ៍ត្រេកត្រអាលក្នុងរឿងផ្លូវភេទតែប៉ុណ្ណោះទេ គឺថែមទាំងអាចមានលទ្ធភាពមានកូនបន្តពូជបានទៀតផង។
ហើយនៅទន្ទឹមនេះដែរ ស្ត្រីវ័យក្មេងក៏មានបំណងចង់រៀបការជាមួយនឹងបុរសវ័យចំណាស់ដែរ ដោយស្ត្រីនោះគិតថាបុរសមានចរិតលក្ខណៈចាស់ទុំ ដឹងការខុសត្រូវច្រើន និងមានភាពជោគជ័យក្នុងជិវិត ហើយដែលកត្តាទាំងអស់នេះ អាចផ្តល់ដល់ស្ត្រីជាភរិយានូវលទ្ធភាពដ៏ច្រើនក្នុងការកសាងជីវិតគ្រួសារបានល្អប្រសើរ ទាំងផ្នែកថវិកា សន្តិសុខ និងសុវត្ថិភាពក្នុងជិវិតរស់នៅ។
ទោះជាបុរសនិងស្ត្រីមានចំណង់ចំណូលចិត្ត និងសេចក្តីប្រាថ្នាក្នុងទំនាក់ទំនងស្នេហាបែបណាក៏ដោយ លោកស្រី លឹម មុន្នី ប្រធានកម្មវិធីស្ត្រីនិងកុមារនៃសមាគមអាដហុក បានបញ្ជាក់ប្រាប់បន្ថែមថា នេះមិនមែនមានន័យថាគូស្រករទាំងនោះ នឹងទទួលបានសេចក្តីសុខ សុភមង្គល រហូតនោះទេ។
លោកស្រី លឹម មុន្នី មានប្រសាសន៍ដូច្នេះ ៖ «មិនប្រាកដថាមនុស្សប្រុសចាស់យកស្រីក្មេងមិនមានបញ្ហាទេ។ ជាទូទៅវ័យដែលខុសគ្នាពិបាករស់នៅជាមួយគ្នាណាស់ ដំបូងល្អណាស់ តែក្រោយមក ភាគច្រើនមនុស្សស្រីផិត ឬក៏ទៅរកគូស្នេហ៍ថ្មីទៀតដែលក្មេងដូចគ្នា។ អ៊ីចឹងសបញ្ជាក់ឲ្យឃើញថា ការចាប់ផ្ដើមជាគូជីវិតប្ដីប្រពន្ធហ្នឹង កាលណាខុសវ័យគ្នាខ្លាំងពេកគឺថាមិនអាចរស់នៅបានទេ។ ទាំងពីការហូបចុក ទាំងពីជំនាន់ ទាំងពីការស្លៀកពាក់ ឬក៏របៀបរបបនៃការរស់នៅ យល់ឃើញថាខុសគ្នា។ អ៊ីចឹងស្ថានភាពទាំងអស់ហ្នឹងវាខុសគ្នា មានន័យថាមនុស្សមិនអាចរស់នៅជាមួយគ្នាបានទេ»។
អត្ថបទស្រាវជ្រាវថ្មីៗនេះរបស់លោកស្រី Paula England នៃសកលវិទ្យាល័យ Standford នៅក្នុងរដ្ឋកាលីហ្វ័រញ៉ា បានឲ្យដឹងថា បុរសដែលរៀបការជាលើកដំបូង ភាគច្រើនបំផុតមានអាយុលើសកូនក្រមុំប្រមាណជា ២ ឬ ៣ឆ្នាំប៉ុណ្ណោះ ក៏ប៉ុន្តែបើបុរសនោះរៀបការម្តងទៀត ទោះបីក្នុងហេតុផលណាក៏ដោយ បុរសទាំងនោះតែងតែរៀបការជាមួយស្ត្រី ដែលមានវ័យក្មេងទៅៗ មិនថាតែបុរសនោះមានទ្រព្យសម្បត្តិស្តុកស្តម្ភ ឬមានតម្រេះវិជ្ជាខ្ពស់នោះទេ។
អត្ថបទស្រាវជ្រាវរបស់លោកស្រី Paula England បន្តថា បើសិនជាបុរសរៀបការពេលមានអាយុលើសពី ៤០ឆ្នាំឡើងទៅ កូនក្រមុំច្រើនមានអាយុក្មេងជាងជាមធ្យម៧ឆ្នាំ។ តែបុរសរៀបការអាយុ៥០ឆ្នាំឡើងទៅកូនក្រមុំជាមធ្យមក្មេងជាង ១៣ឆ្នាំ ហើយបើបុរសរៀបការមានវ័យកាន់តែចាស់ទៅដូចថាជាង៦០ឆ្នាំឡើងទៅ ស្ត្រីជាភរិយាកាន់តែមានអាយុប្អូនច្រើនរហូតដល់ខ្លះជាង២០ឆ្នាំ ឬក៏៣០ឆ្នាំក៏មាន៕