យុវជនចូលរួមការងារមនុស្សធម៌ក្នុងថ្ងៃក្ដីស្រលាញ់
2015.02.13
យុទ្ធនាការចែកស្រោមអនាម័យមុនថ្ងៃបុណ្យនៃសេចក្ដីស្រឡាញ់ របស់អង្គការមូលនិធិថែទាំអ្នកជំងឺអេដស៍(AHF) នៅថ្ងៃទី ១៣ កុម្ភៈ ២០១៥។
RFA/Rann Samnang
ទន្ទឹមនឹងយុវជនភាគច្រើន បង្ហាញក្ដីស្រលាញ់ទៅដល់គ្រួសារ អាណាព្យាបាល លោកគ្រូអ្នកគ្រូ មិត្តភ័ក្ដិ និងមនុស្សជាទីស្រលាញ់របស់ខ្លួន តាមរយៈវត្ថុអនុស្សាវរីយ៍ ឬផ្កាកូឡាប ដែលគេពេញ និយម ឲ្យចំថ្ងៃនៃក្ដីស្រលាញ់នេះ។ ប៉ុន្តែមានក្រុមយុវជនខ្លះទៀត បានយកថ្ងៃនៃក្ដីស្រលាញ់ ១៤ កុម្ភៈ ទៅធ្វើការងារមនុស្សធម៌ ជួយដល់មនុស្សដែលទីទ័លជាងខ្លួន។
ក្រុមយុវជនក្នុងសហភាពសហព័ន្ធយុវជនកម្ពុជា បានយកថ្ងៃបុណ្យនៃក្ដីស្រលាញ់ (Valentine’s day) ជាថ្ងៃបង្ហាញចិត្តសន្ដោសទៅដល់កុមារកំព្រា កុមារមានផ្ទុកមេរោគអេដស៍ និងកុមារពិការគ ថ្លង់ ចំនួន៣៥០នាក់ ដែលកំពុងស្នាក់នៅមណ្ឌលកុមារកំព្រាកៀនឃ្លាំង មណ្ឌលកុមារ កំព្រាជ្រោយ ចង្វារ និងមណ្ឌលកុមារកំព្រាកូឡាបបួន ស្ថិតនៅរាជធានីភ្នំពេញ។
ក្រុមយុវជនទាំងនោះ បានរៃអង្គាសប្រាក់នៅតាមវិទ្យាល័យមួយចំនួន គ្រឹះស្ថានឧត្ដមសិក្សា និងគ្រឹះ ស្ថានបណ្ដុះបណ្ដាលវិជ្ជាជីវៈនានាទៅក្នុង «មូលនិធិក្ដីស្រលាញ់» ដើម្បីយកទៅជួយកុមារទាំង នោះ ដែលកំពុងតែជួបនឹងការខ្វះខាត ទាំងធនធានថវិកា និងសម្ភារៈ។
ប្រធានគណៈកម្មាធិការរាជធានីភ្នំពេញ នៃសហភាពសហព័ន្ធយុវជនកម្ពុជា លោក សាយ សំអាល់ និងជារដ្ឋមន្ត្រីក្រសួងបរិស្ថាន បញ្ជាក់នៅក្នុងសេចក្ដីអំពាវនាវរបស់ខ្លួនថា សកម្មភាពមនុស្សធម៌ នេះ ធ្វើឡើងដើម្បីជាការលើកទឹកចិត្ត ដល់កុមារកំព្រាទីទ័លក្រ ឲ្យមានក្ដីសង្ឃឹមក្នុងជីវិត និងខិតខំប្រឹង ប្រែងរៀនសូត្រ ដើម្បីក្លាយខ្លួនជាសិស្សល្អ ពលរដ្ឋល្អ និងជាធនធានដ៏មានសក្ដានុពល សម្រាប់ការ ចូលរួមចំណែក្នុងការកសាងសង្គមជាតិ។
អ្នកនាំពាក្យក្រសួងអប់រំយុវជននិងកីឡា លោក រស់ សាលីន គិតថា វប្បធម៌លោកខាងលិច ដែលកំពុងមានឥទ្ធិពលដល់យុវជននេះ កំពុងសាបព្រោះគំនិតរបស់ពួកគេឲ្យយល់ខុស ថាថ្ងៃបុណ្យ នៃក្ដីស្រលាញ់ គឺជាថ្ងៃបុណ្យសង្សារ រហូតគូរស្នេហ៍ខ្លះ ហ៊ានធ្វើអំពើផ្ដេសផ្ដាសខុសប្រពៃណីជាតិ។
លោកបន្តថា សកម្មភាពរបស់ក្រុមយុវជនសហភាពសហព័ន្ធយុវជនកម្ពុជា បង្ហាញពីការវិវត្តន៍ថ្មីមួយរបស់យុវជន ដែលដឹងពីអត្ថន័យពិតថ្ងៃនៃក្ដីស្រលាញ់ ហើយវាអាចជាសារមួយល្អសម្រាប់ឲ្យ យុវជនឯទៀត យកគំរូតាម ដោយបង្ហាញសេចក្ដីស្រលាញ់របស់ខ្លួន ចំពោះមនុស្សទូទៅ៖ «សកម្មភាពយុវជននៅក្នុងដំណាក់ការនេះមានការវិវត្តន៍ មានការយល់ដឹងបន្ថែមទៀត ទៅរកទិន្នភាពមួយវិជ្ជមាន។ ការយល់ច្រឡំមួយចំនួន អាចបែរមកច្បាស់វិញ ថាថ្ងៃនេះជាថ្ងៃនៃក្ដី ស្រលាញ់មិនមិនជាថ្ងៃសង្សារទេ»។
អនុប្រធានចលនាយុវជន របស់គណបក្សសង្គ្រោះជាតិ លោក គឹម សុធា បញ្ជាក់ថា ក្រុមយុវជន របស់លោក មិនមានសកម្មភាពអ្វីជាដុំកំភួនក្នុងថ្ងៃទិវានៃក្ដីស្រលាញ់នេះទេ។ ប៉ុន្តែលោកគាំទ្រដល់ សកម្មភាពរបស់សហភាពសហព័ន្ធយុវជនកម្ពុជា ដែលបានជំរុញនឹងផ្ដល់និយមន័យទិវានៃក្ដីស្រលាញ់ នេះឲ្យបានទូលំទូលាយ។
យ៉ាងណាលោកគិតថា សកម្មភាពមនុស្សធម៌ដល់កុមារក្នុងថ្ងៃនៃក្ដីស្រលាញ់ គឺជាការប្រសើរ។ ប៉ុន្តែ ការរៃអង្គាសប្រាក់ នៅតាមគ្រឹះស្ថានសិក្សានានា គឺគ្រាន់តែជារូបភាពមួយប៉ុណ្ណោះ ខណៈដែល សហភាពសហព័ន្ធយុវជនកម្ពុជា ដែលមានលោក ហ៊ុន ម៉ានី ជាប្រធាន និងជាកូនលោក នាយករដ្ឋមន្ត្រី ហ៊ុន សែន មានថវិកាគ្រប់គ្រាន់ដែលបានមកពីប្រភពឧកញ៉ាធំៗ និងសមាជិកនៅក្នុងគណបក្សប្រជាជនកម្ពុជា៖ «ខ្ញុំអបអរសាទរដែលយុវជនគណបក្សប្រជាជនមានទស្សនៈក្នុងការជំរុញនឹងផ្ដល់និយមន័យឲ្យទូលំទូលាយ ថ្ងៃនៃក្ដីស្រលាញ់ ខ្ញុំគាំទ្រចំពោះគំនិតនេះ»។
ទន្ទឹមនឹងក្រសួងអប់រំយុវជននិងកីឡា ចាត់វិធានការទប់ស្កាត់ សកម្មភាពមិនប្រក្រតីមួយចំនួន ក្នុងទិវាបុណ្យនៃក្ដីស្រលាញ់ នៅតាមគ្រឹះស្ថានសិក្សាសាធារណៈ កុំឲ្យយកថ្ងៃនេះជាថ្ងៃណាត់ជួបគ្នា រវាងគូរស្នេហ៍ ភ្លេចការសិក្សាបាត់បង់កិត្តិយស សេចក្ដីថ្លៃថ្នូរ ប្រាសចាកវប្បធម៌និងប្រពៃណីជាតិ។
ក្នុងថ្ងៃទិវាក្ដីស្រលាញ់នេះដែរ ក្រុមអ្នកដឹកនាំស្ត្រីវ័យក្មេង ក៏បានផលិតខ្សែភាពយន្តអប់រំខ្នាតខ្លីមួយ ទៅដល់យុវជន ឲ្យផ្ដល់តម្លៃនៃក្ដីស្រលាញ់ទៅដល់ក្រុមគ្រួសាររបស់ខ្លួន។
សមាជិកមួយរូប នៅក្នុងក្រុមអ្នកដឹកនាំស្ត្រីវ័យក្មេង អ្នកនាង ទុយ មុនីរ៉េត ឲ្យដឹងខ្សែភាពយន្តអប់រំ ដែលមានរយៈពេល២ទៅ៣នាទីនេះ មានបញ្ចាំងជាសាធារណៈនៅផ្ទះមេត្តា ហើយត្រូវបង្ហោះតាម ប្រព័ន្ធអ៊ីនធឹណែត ដើម្បីចែករំលែកនិងជាសារដាក់តឿន ឲ្យយុវជនបង្ហាញក្ដីស្រលាញ់ ដល់ក្រុមគ្រួសារ ច្រើនជាងការភ្លើតភ្លើងនឹងល្បែងស្នេហា រហូតឈានទៅដល់ការរួមភេទ នៅថ្ងៃនោះ៖ «មានអង្គការផ្សេងគាត់ផ្ដល់អនុសាសន៍ ឲ្យសមត្ថកិច្ចអាជ្ញាធរ ថាគួរតែទៅមើលតាមក្លឹបកម្សាន្ត ទៅមើលផ្ទះសំណាក់ តើក្នុងថ្ងៃនោះមានយុវជនទៅច្រើនឬទេ។ ប៉ុន្តែក្រុមយើងមកមើល ថាតើនៅថ្ងៃទី១៤ កុម្ភៈនោះយុវជនផ្ដល់ក្ដីឲ្យគ្រួសារកម្រិតណា»។
ដោយឡែកមានយុវជនជាច្រើនទៀត ងាកទៅមកចាប់អារម្មណ៍នឹងវិស័យកីឡា ដើម្បីកម្សាន្តក្នុងថ្ងៃ នៃបុណ្យក្ដីស្រលាញ់នេះ។
គណៈកម្មាធិការស្ត្រីនៃគណៈកម្មាធិការជាតិអូឡាំពិកកម្ពុជា បានរៀបចំប្រកួតកីឡារត់ប្រណាំង សប្បាយៗ ដែលមានចរិតជាការអប់រំ និងអូសទាញយុវជនឲ្យយល់ដឹងពីអត្ថន័យពិតថ្ងៃ នៃក្ដីស្រលាញ់។ យុវជនមិនតិចជាង២ពាន់នាក់ទេ ដែលបានចុះឈ្មោះរត់ប្រណាំងនៅថ្ងៃនេះ។ វិញ្ញាសាដែលដាក់ឲ្យប្រកួតនោះ មានការរត់ចម្ងាយ៥គីឡូម៉ែត្រ បែងចែកជាប្រភេទអាយុក្រោម១៥ ឆ្នាំ ៣០ឆ្នាំ និងចាប់ពី៣១ឆ្នាំឡើងទៅ។ ក្រៅពីការប្រកួតចម្ងាយឆ្ងាយនោះ ក៏នៅមានការ ប្រកួតជើង៣ជាការកម្សាន្ត ដោយតម្រូវឲ្យដៃគូជាបុរសនិងស្ត្រី ត្រូវយកជើងម្ខាងចងភ្ជាប់គ្នា ហើយបបួលគ្នារត់ជើង៣ប្រណាំងគ្នា។
ពាក់ព័ន្ធនឹងថ្ងៃទិវានៃក្ដីស្រលាញ់នេះដែរ ព្រះតេជព្រះគុណ ទូច ម៉ៃ គ្រូសូត្រស្ដាំនៃវត្តមហាមន្ត្រី មានថេរដីកាថា ថ្ងៃ១៤ កុម្ភៈ (Valentine’s day ) មិនមានជាបុណ្យជាតិរបស់កម្ពុជាទេ។ ប៉ុន្តែព្រះតេជព្រះគុណ គាំទ្រឲ្យយុវជនធ្វើការងារសង្គមឲ្យបានច្រើន ដែលបង្ហាញពីក្ដីស្រលាញ់ដោយមេត្តាចិត្ត តាមគោលការណ៍ព្រះពុទ្ធសាសនា ដូចជាការដាក់ទាន ឬជួយដល់កុមារកំព្រាដែលខ្សត់ខ្សោយជាងខ្លួន៖ «គោលការណ៍ព្រះពុទ្ធសាសនាគឺក្ដីស្រលាញ់ប្រកបដោយមេត្តាបានជាក្ដីស្រលាញ់ពិតប្រាកដ គឺខុសពីក្ដីស្រលាញ់រំជើបរំជួលតាមចំណង់ក្នុងជីវិតជាបុថុជ្ជន»។
រយៈពេលជិត១០ឆ្នាំចុងក្រោយនេះ ប្រទេសកម្ពុជាបានទទួលចរន្តវប្បធម៌ពីបស្ចិមប្រទេស គឺទិវានៃក្ដីស្រលាញ់ (Valentine’s day )។ ដំបូងឡើយមានយុវជនខ្លះគិតថាថ្ងៃនោះជាថ្ងៃបុណ្យសង្សារ។ ចំពោះគូរស្នេហ៍ដែលស្រលាញ់គ្នា ដើម្បីបង្ហាញពីក្ដីស្រលាញ់នោះទាល់តែមានកាដូ មានផ្កាកលាបជូនគ្នា ឬពេលខ្លះដៃគូរសង្សារទាមទារឲ្យភាគីម្ខាងទៀតប្រគល់ខ្លួនប្រាណ ដើម្បីបង្ហាញពីចិត្តសោះ។
ទោះយ៉ាងណាការយល់ច្រឡំ អត្ថន័យនៃថ្ងៃក្ដីស្រលាញ់នោះ ហាក់រំសាយទៅបន្តិចម្ដងៗ។ ព្រះតេជព្រះគុណ ទូច ម៉ៃ មានថេរដីកាថា ការប្រារព្ធទិវានេះត្រូវកើតឡើងដោយការស្រលាញ់ ប្រកបដោយមេត្តាចិត្ត ជាការស្រលាញ់សម្រាប់មនុស្សជាទូទៅ។
ទន្ទឹមនឹងការចាប់យកពិធីបុណ្យនៃបស្ចិមប្រទេស ព្រះតេជព្រះគុណ ទូច ម៉ៃ ក្រើនរំលឹកដល់យុវជន កុំភ្លេចនូវបុណ្យសាសនារបស់ខ្លួន ដូចជាពិធីបុណ្យវិសាខបូជា ដែលជាថ្ងៃប្រកបដោយហេតុ ដ៏អស្ចារ្យទាំង៣យ៉ាង គឺថ្ងៃព្រះពុទ្ធប្រសូត ថ្ងៃព្រះពុទ្ធត្រាស់ដឹង និងជាថ្ងៃដែលព្រះពុទ្ធព្រះនិព្វាន។
ពិធីបុណ្យសាសនាដ៏ធំនេះ កម្រឃើញយុវជនចាប់អារម្មណ៍ ហើយយកផ្កាទៅបូជា ចំពោះព្រះរតនត្រ័យ ឬក៏យកទៅជូនអ្នកមានគុណ មានមាតាបិតា ឬអាណាព្យាបាលខុសប្លែកពីថ្ងៃនៃក្ដីស្រលាញ់ បុណ្យនៃបស្ចិមប្រទេស តែយុវជនផ្ដល់តម្លៃនិងប្រតិបត្តិជារៀងរាល់ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- អ្នកឃ្លាំមើលថា រដ្ឋមន្ត្រីការបរទេសកម្ពុជា និយាយភូតកុហកពិភពលោកថាកម្ពុជាគោរពសិទ្ធិមនុស្ស និងនីតិរដ្ឋ