ក្រុមអ្នកធ្វើការងារខាងវិស័យលើកកម្ពស់សិទ្ធិកម្មករលើកឡើងស្រដៀងគ្នា បច្ចុប្បន្ន ពួកគេនៅមិនទាន់អាចវាយតម្លៃពីផលប៉ះពាល់កម្រិតណាលើក្រុមកម្មករនៅឡើយ ដោយសារត្រូវរង់ចាំមើលលទ្ធផលនៃការចរចារឿងពន្ធ រវាងតំណាងរដ្ឋាភិបាលអាមេរិក និងកម្ពុជា។
អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់ថា (សង់ត្រាល់) លោក ឃុន ថារ៉ូ បានប្រាប់អាស៊ីសេរីនៅថ្ងៃទី០៦ឧសភាថា ប្រសិនតំណាងរដ្ឋាភិបាលកម្ពុជាមិនទទួលបានផ្លែផ្កាល្អពីការចរចា ហើយកម្ពុជាត្រូវនាំទំនិញទៅលក់នៅអាមេរិក ក្នុងអត្រាពន្ធខ្ពស់ នោះនឹងធ្វើឱ្យក្រុមហ៊ុនម៉ាកយីហោល្បីៗ កាត់បន្ថយការបញ្ជាទិញពីកម្ពុជា ឬស្វែងរកប្រទេសណា ដែលមានតម្លៃផលិតថោក និងនាំចេញទំនិញក្នុងអត្រាពន្ធទាបជាងកម្ពុជា។
ពីព្រោះអី ក្រុមហ៊ុនបញ្ជាទិញទាំងអស់នោះ នៅតែពិនិត្យពិចារណាបញ្ជាទិញ ប៉ុន្តែនៅក្នុងកម្រិតមួយដែលតិច អ៊ីចឹងផលប៉ះពាល់សម្រាប់ថៅកែរោងចក្រ គឺវានឹងអាចប៉ះពាល់ហើយ។ កាលណាកម្រិតបញ្ជាទិញមានការធ្លាក់ចុះ ផលប៉ះពាល់នោះ វានឹងជះឥទ្ធិពលដល់ស្ថិរភាពការងារសម្រាប់កម្មករ។
— លោក ឃុន ថារ៉ូ
ការលើកឡើងពីមន្ត្រីអង្គការសង់ត្រាល់នេះ ធ្វើឡើងបន្ទាប់ពីសមាគមលក់រាយនិងចែកចាយស្បែកជើងរបស់អាមេរិក (FDRA) បានដាក់លិខិតរួមគ្នាទៅប្រធានាធិបតីលោក ដូណាល់ ត្រាំ (Donald Trump) កាលពីថ្ងៃទី២៩ខែមេសា ដើម្បីទទូចឱ្យលើកលែងពន្ធលើការនាំចូលទំនិញស្បែងជើង។ នៅក្នុងលិខិតនោះ បានចុះហត្ថលេខាដោយក្រុមហ៊ុនម៉ាកយីហោល្បីៗ ចំនួន៧៦ មានដូចជា អាឌីដាស (Addidas) និងណៃគី (Nike) ជាដើម។
លិខិតដដែលនោះលើកឡើងថា៖ «គ្រួសារដែលមានប្រាក់ចំណូលទាបនិងមធ្យម និងក្រុមហ៊ុនស្បែកជើងអាមេរិក កំពុងប្រឈមការគំរាមកំហែងមួយ ពីការកើនឡើងថ្លៃចំណាយនាពេលខាងមុខ។ ក្រុមហ៊ុនរាប់រយប្រឈមនឹងការបិទទ្វារ ហើយមនុស្សរាប់ម៉ឺននាក់ប្រឈមគ្មានការងារធ្វើ។ ការបញ្ជាទិញមួយចំនួន ត្រូវបានផ្អាក ហើយការស្ដុកទុកនៃស្បែកជើងសម្រាប់លក់ឱ្យអតិថិជនអាមេរិក ក៏នឹងអាចធ្លាក់ចុះឆាប់ៗនេះដែរ»។
កាលពីដើមខែមេសា រដ្ឋបាលលោក ដូណាល់ ត្រាំ បានប្រកាសដំឡើងពន្ធលើការនាំចូលទំនិញពីបណ្ដាប្រទេសជាច្រើន ក្នុងនោះកម្ពុជាទទួលបានការដំឡើងពន្ធ៤៩% ជាអត្រាពន្ធខ្ពស់បំផុតនៅអាស៊ីអាគ្នេយ៍និងបានទុកពេល៩០ថ្ងៃ សម្រាប់ចរចា។
កាលពីសប្ដាហ៍មុន អង្គភាពអ្នកនាំពាក្យរដ្ឋាភិបាលបានប្រកាសថា លោកឧបនាយករដ្ឋមន្ត្រី ស៊ុន ចាន់ថុល និងរដ្ឋមន្ត្រីក្រសួងពាណិជ្ជកម្ម អ្នកស្រី ចម និម្មល នឹងដឹកនាំក្រុមការងារចំពោះកិច្ច ធ្វើដំណើរផ្ទាល់ទៅរដ្ឋធានីវ៉ាស៊ីនតោន ដើម្បីជួបចរចាជាមួយតំណាងសហរដ្ឋអាមេរិកនៅថ្ងៃទី១៤ដល់ថ្ងៃទី១៥ឧសភា ជុំវិញរឿងពន្ធនេះ។
ប្រធានសហព័ន្ធសហជីពកម្ពុជា អ្នកស្រី យ៉ាង សុភ័ណ្ឌ បានយល់ឃើញថា ការចេញមុខស្នើសុំពីបណ្ដាក្រុមហ៊ុនម៉ាកយីហោល្បីៗ នៅពេលនេះ ជាក្ដីសង្ឃឹមមួយជួយជំរុញឱ្យរដ្ឋាភិបាលសហរដ្ឋអាមេរិក ពិចារណាទម្លាក់ចោលការដំឡើងពន្ធវិញ។ ប៉ុន្តែអ្នកស្រីថា ប្រសិនបើការស្នើសុំនិងការចរចាសុំលើកលែងពន្ធពីអាមេរិកមិនបានសម្រេច ក្រុមហ៊ុននៅអាមេរិកនឹងដកការបញ្ជាទិញទំនិញពីកម្ពុជា។
ទៅមុខទៀត ប្រសិនបើការជជែកគ្នា មិនមានការកែប្រែ (លើកលែងពន្ធ) វាអាចធ្វើឱ្យរោងចក្រមួយចំនួនដក order (ការបញ្ជាទិញ) ប៉ុន្តែមិនមែននៅពេលបច្ចុប្បន្ននេះទេ វាអាចផុតនូវឱសានវាទ (រយៈពេលចរចា៩០ថ្ងៃ)។
— អ្នកស្រី យ៉ាង សុភ័ណ្ឌ
អ្នកស្រីបន្តថា អំឡុងពេល៩០ថ្ងៃនៃការចរចារឿងពន្ធ នៅតាមរោងចក្រនានានៅកម្ពុជា កំពុងឱ្យកម្មករធ្វើការថែមម៉ោង ដើម្បីឆ្លើយតបទៅនឹងការជំរុញបញ្ជាទិញ។
មន្ត្រីសង្គមស៊ីវិល និងមន្ត្រីគណបក្សជំរុញឱ្យរដ្ឋាភិបាលកម្ពុជាគួរយករឿងគោរពសិទ្ធិមនុស្ស និងស្ដារលទ្ធិប្រជាធិបតេយ្យ ទៅចរចាជាមួយតំណាងរដ្ឋាភិបាលអាមេរិក ទើបមានសង្ឃឹមខ្ពស់ក្នុងការស្នើសុំឱ្យទម្លាក់ពន្ធ។ ពួកគេព្រមានថា ប្រសិនបើការចរចាបរាជ័យ នោះនឹងធ្វើឱ្យកម្មករជាង៩សែននាក់ ក្នុងវិស័យកាត់ដេរ ផលិតស្បែកជើង ផលិតផលធ្វើដំណើរ និងកាបូប ត្រូវប្រឈមបាត់បង់ការងារធ្វើ៕
សូមលោកអ្នកនាងរង់ចាំទស្សនារឿងនេះជាវីដេអូ នាពេលឆាបៗនេះ!
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។