រំលងទៅមាតិកាចម្បងពលរដ្ឋមួយចំនួននៅខេត្តបាត់ដំបងធ្វើណែមសាច់ត្រីលក់រកប្រាក់ដោះស្រាយ ជីវភាព
ប្រជាពលរដ្ឋនៅស្រុកឯកភ្នំ ខេត្តបាត់ដំបង ជាច្រើនគ្រួសារចាប់យករបរធ្វើណែមធ្វើពីសាច់ត្រី លក់រកប្រាក់ចំណូលដោះស្រាយជីវភាពប្រចាំថ្ងៃ ដោយពុំចាំបាច់ធ្វើចំណាកស្រុកទៅធ្វើការនៅក្រៅប្រទេស។ មន្ត្រីសង្គមស៊ីវិលថា អាជ្ញាធរពាក់ព័ន្ធគួរគាំទ្រលើកស្ទួយមុខរបរនេះ ដោយពង្រីកការផលិតឱ្យមានមាត្រដ្ឋាន និងទប់ស្កាត់ទំនិញនាំចូលពីបរទេសដើម្បីផ្ដល់ឱកាសការងារដល់ពលរដ្ឋក្នុងសហគមន៍។មុខរបរធ្វើណែមត្រីស្រស់ ជារបរមួយពេញនិយមរបស់ប្រជាពលរដ្ឋរស់នៅក្នុងឃុំ ព្រែកខ្ពប និងឃុំព្រែកហ្លួង ស្រុកឯកភ្នំ។ នៅចម្ងាយប្រមាណ១០គីឡូម៉ែត្រ ពីក្រុងបាត់ដំបង ស្របតាមបណ្ដោយដងស្ទឹងសង្កែ នៅតាមផ្ទះនីមួយៗ មានពលរដ្ឋភាគច្រើនជាស្ត្រី កំពុងអង្គុយវេចណែមត្រីដាក់ទៅក្នុងថង់ប្លាស្ទិកតូចៗ ឬស្លឹកចេកទៅតាមតម្រូវការរបស់អតិថិជន។
