វីដេអូ
អតីតសមាជិក គ.ជ.ប ម្នាក់ប្រកាសចូលរួមនយោបាយជាមួយបក្សភ្លើងទៀន
អតីតសមាជិកគណៈកម្មាធិការជាតិរៀបចំការបោះឆ្នោត និងជាប្រធានសហភាពសហជីពកម្ពុជា លោក រ៉ុង ឈុន ប្រកាសចូលរួមជីវភាពនយោបាយជាមួយគណបក្សភ្លើងទៀន ដើម្បីប្រកួតប្រជែងការបោះឆ្នោតជាតិនាខែកក្កដា ខាងមុខនេះ។ លោក រ៉ុង ឈុន ប្រកាសដូច្នេះក្នុងសន្និសីទកាសែត នាទីស្នាក់ការសមាគមគ្រូបង្រៀនឯករាជ្យ (CITA) នៅថ្ងៃទី៣១ មករា ដោយលោកអះអាងថា ការបើកទំព័រថ្មីសម្រាប់លោក ដើម្បីឈានជើងចូលនយោបាយសាជាថ្មី បន្ទាប់ពីលោករងការធ្វើទុក្ខបុកម្នេញពីរដ្ឋាភិបាលរឿងព្រំដែននាពេលកន្លងទៅ។ លោកបន្តថា ការចូលរួមនេះដើម្បីសម្រេចបំណងប្រាថ្នារបស់ពលរដ្ឋខ្មែរ ដែលចង់បានសេរីភាព យុត្តិធម៌ ការគោរពសិទ្ធិមនុស្ស និងលទ្ធិប្រជាធិបតេយ្យ។ ទោះជាយ៉ាងណា លោក រ៉ុង ឈុន បញ្ជាក់ថា លោកនឹងមិនបោះបង់កម្មករ ក្នុងនាមលោកអ្នកជាអ្នកតែងតែការពារផលប្រយោជន៍កម្មករ តាមរយៈសហភាពសហជីពកម្ពុជា។ បន្ថែមពីនេះ លោកក៏នឹងមិនបោះបង់គ្រូបង្រៀន ដែលលោកតែងតែតវ៉ាការពារផលប្រយោជន៍គ្រូបង្រៀនទូទាំងប្រទេសនោះដែរ។ បើទោះបីជាលោកងាកមកចូលរួមជីវភាពនយោបាយជាមួយគណបក្សភ្លើងទៀន នាពេលនេះក្ដី៕