វីដេអូ

អាជ្ញាធរក្រុងភ្នំពេញ រារាំងក្រុមយុវជនចលនាមាតាធម្មជាតិ ដែលចែកខិតប័ណ្ណផ្សព្វផ្សាយ ជំរុញឱ្យពលរដ្ឋទៅលេងកោះកុងក្រៅ

2022-11-28

ក្រុម​អាជ្ញាធរ​ខ័ណ្ឌ​ទួលគោក បាន​ចុះ​រារាំង​ក្រុម​យុវជន​ចលនា​មាតា​ធម្មជាតិ​ ខណៈ​ពួក​គេ​ចែក​ខិត​ប័ណ្ណ​អំពី​កោះកុង​ក្រៅ​ទៅ​ដល់​អ្នក​ធ្វើ​ដំណើរ​នៅ​ថ្ងៃ​ទី​២៨ ខែ​វិច្ឆិកា​នេះ។ មន្ត្រី​អង្គការ​សង្គម​ស៊ីវិល​យល់​ឃើញ​ថា ការ​រារាំង​របស់​ក្រុម​អាជ្ញាធរ​នេះ ធ្វើ​ឡើង​ក្នុង​ន័យ​គំរាម​កំហែង​ដល់​ក្រុម​យុវជន​ ដែល​សកម្ម​ក្នុង​ការ​គិត​គូរ​ពី​បញ្ហា​បរិស្ថាន និង​ធនធាន​ធម្មជាតិ​ ដែល​ជា​ទ្រព្យ​សម្បត្តិ​របស់​ប្រជាពលរដ្ឋ​ទាំង​អស់​គ្នា។ ក្រុម​អាជ្ញាធរ​ខ័ណ្ឌ​ទួល​គោល បាន​ចុះ​រារាំង​ក្រុម​យុវជន​ចលនា​មាតា​ធម្មជាតិ​ មិន​ឱ្យ​ចែក​ខិត​ប័ណ្ណ​អំពី​កោះកុង​ក្រៅ​២​ដង នា​ថ្ងៃទី​២៨ ខែ​វិច្ឆិកា​នេះ។ក្រុម​យុវជន​ចលនា​មាតា​ធម្មជាតិ រួម​ជា​មួយ​យុវជន​ស្រលាញ់​បរិស្ថាន​ជិត​២០​នាក់​ បាន​សហការ​គ្នា​ជំរុញ​ឱ្យ​សាធារណៈ​ជន​ទៅ​លេង​កោះកុង​ក្រៅ តាម​រយៈ​ការ​ចែក​ខិត្តប័ណ្ណ និង​កាត​ផុស​តាល់ (Card Postal) អំពី​កោះកុង​ក្រៅ ទៅ​កាន់​អ្នក​ធ្វើ​ដំណើរ​តាម​ដង​ផ្លូវ​៣​កន្លែង​នៅ​ក្នុង​រាជធានី​ភ្នំពេញ។ ភ្លាម​បន្ទាប់​ពី​ក្រុម​យុវជន​ចាប់​ផ្ដើម​ចែក​ខិត្តប័ណ្ណ ក្រុម​អាជ្ញាធរ​បាន​ចុះ​ទៅ​ឃ្លាំ​មើល ​និង​ក្រោយ​មក​ប្រហែល​កន្លះ​ម៉ោង​ ក្រុម​អាជ្ញាធរ​បាន​បញ្ជា​ឱ្យ​ក្រុម​យុវជន​បញ្ឈប់​ការ​ចែក​រំលែក​ខិត្តប័ណ្ណ​ទាំង​នោះ នៅ​ចំណុច​ស្តុប​វិទ្យា​ស្ថាន​ភាសា​បរទេស អាយ.អេហ្វ.អិល (IFL) នៅ​ពេល​ព្រឹក និង​នៅ​ចំណុច​ស្តុប​សាលា​តិចឡូ នៅ​ពេល​រសៀល​ ដោយ​សំអាង​លើ​ហេតុ​ផល​ថា​ធ្វើ​ឱ្យ​ប៉ះ​ពាល់​ដល់​សណ្ដាប់​ធ្នាប់​សាធារណៈ។ ទោះបីជា​យ៉ាង​ណា ​ក្រុម​យុវជន​បាន​ជម្នះ​ចែក​ខិត្តប័ណ្ណ​រហូត​ទាល់​តែ​អស់​ទើប​ពួក​គេ​បំបែក​គ្នា​ទៅ​ផ្ទះ​រៀង​ខ្លួន។ ដោយ​ឡែក​ក្រុម​អាជ្ញាធរ​មិន​បាន​រារាំង​សកម្មភាព​ចែក​ខិត្តប័ណ្ណ​នេះ​នៅ​ចំណុច​វិទ្យាល័យ​សន្ធរ​មុខ​ឡើយ។