លោក ជា មករា អ្នកយកព័ត៌មានវិទ្យុអាស៊ីសេរី ប្រចាំទីក្រុងភ្នំពេញ បានរាយការណ៍សរុបព័ត៌មានសំខាន់ៗនៅកម្ពុជា ពីថ្ងៃ ១៤ ដល់ ២០ កក្កដា ឆ្នាំ២០០៨ ។
ការប្រឈមមុខដាក់គ្នារវាងកងទ័ពខ្មែរនិងថៃនៅតំបន់ប្រាសាទព្រះវិហារនៅតែបន្ត
ការប្រឈមមុខដាក់គ្នារវាងកងទ័ពខ្មែរនិងកងទ័ពថៃនៅតំបន់ប្រាសាទព្រះវិហាររហូតមកទល់នឹងល្ងាចថ្ងៃសៅរ៍ ទី១៩ ខែកក្កដានេះ នៅតែបន្តមានសភាពតានតឹង ។
នាយករដ្ឋមន្ត្រីនៃប្រទេសទាំងពីរបានទាមទារឲ្យមានការដកទ័ពរៀងៗខ្លួន ដោយបានលើកឡើងថាការដាក់ពង្រាយទ័ពនោះគឺជាការរំលោភលើអធិបតេយ្យភាពនិងបូរណភាពដែនដីរៀងៗខ្លួន ។
ទោះជាយ៉ាងណាភាគីប្រទេសទាំងពីរនៅតែបញ្ជូនទ័ពកាន់តែច្រើនទៅកាន់តំបន់ប្រាសាទព្រះវិហារនោះ ដោយមានសេចក្ដីរាយការណ៍ថា ទាហានខ្មែរមានចំនួនប្រមាណ១ពាន់នាក់ ហើយទាហានថៃមានចំនួនប្រមាណ៨០០នាក់ ។
កាលពីល្ងាចថ្ងៃព្រហស្បតិ៍ ទី១៧ ខែកក្កដា មានសេចក្ដីរាយការណ៍មកថាទាហាននៃប្រទេសទាំងពីរបានភ្ជង់កាំភ្លើងដាក់គ្នា ហើយស្ថានការណ៍នៃការប្រឈមមុខដាក់គ្នានោះ នៅតែមានសភាពតានតឹងដដែល ហើយរដ្ឋាភិបាលនៃប្រទេសទាំងពីរបានប្រកាសឲ្យក្រុមយោធាមានការអត់ធ្មត់ រង់ចាំកិច្ចចរចាគ្នារវាងគណៈកម្មាធិការព្រំដែននៃប្រទេសទាំងពីរ ។
រហូតមកទល់នឹងល្ងាចថ្ងៃសៅរ៍ ទាហានឈុតខ្មៅថៃនៅតែបន្តកាន់កាប់វត្តខ្មែរមួយឈ្មោះ កែវសិក្ខាគិរីស្វារៈ ហៅថាវត្តប្រាសាទព្រះវិហារ ។
លោកនាយករដ្ឋមន្ត្រី ហ៊ុន សែន បានផ្ញើលិខិតមួយទៅលោកនាយករដ្ឋមន្ត្រីថៃ សាម៉ាក់ ស៊ុនដារាវ៉េទ ទាមទារឲ្យរដ្ឋាភិបាលថៃប្រញាប់ដកទ័ពចេញដោយអះអាងថាដីនោះជាដីរបស់ខ្មែរ ។ ទោះជាយ៉ាងណាលោកនាយករដ្ឋមន្ត្រីថៃ សាម៉ាក់ ស៊ុនដារាវ៉េដ បានឆ្លើយតបមកវិញថា ការដាក់ទ័ពខ្មែរនៅតំបន់ប្រាសាទព្រះវិហារនោះបានរំលោភអធិបតេយ្យភាពនិងបូរណភាពដែនដីរបស់ថៃ ។
មន្ត្រីជលផលខែត្រកំពតម្នាក់ត្រូវទាហានវៀតណាមបាញ់ស្លាប់
ប្រភពពីប្រជានេសាទនៅខែត្រកំពតបានឲ្យដឹងថា មន្ត្រីនៃមន្ទីរជលផលខែត្រកំពតម្នាក់ត្រូវបានកងកម្លាំងទាហានជើងទឹកវៀតណាមបាញ់ស្លាប់ និងមន្ត្រីម្នាក់ទៀតត្រូវបានចាប់ខ្លួនយកទៅបាត់ កាលពីយប់ថ្ងៃពុធកន្លងទៅនេះ ។
ប្រជានេសាទរស់នៅភូមិដូនតោក ឃុំត្រើយកោះ ស្រុកកំពង់បាយ ខែត្រកំពត បានឲ្យដឹងថាការបាញ់សម្លាប់លើលោក ផាត់ សារឿន នោះ បានកើតឡើង ខណៈដែលមន្ត្រីរូបនោះរួមជាមួយសហការីដទៃទៀតកំពុងតែធ្វើការបង្ក្រាបបទល្មើសនេសាទ គឺទូកវៀតណាមដែលចូលនេសាទក្នុងដែនសមុទ្រកម្ពុជា នៅយប់ថ្ងៃទី១៦ ខែកក្កដា ឆ្នាំ២០០៨កន្លងទៅនេះ នៅចំណុចគ្រលុកកាម៉យ ស្ថិតក្នុងភូមិសាស្ត្រចន្លោះឃុំត្រើយកោះ ស្រុកកំពង់បាយ និងឃុំកោះតូច ស្រុកកំពត ។
មន្ត្រីជលផលម្នាក់ដែលវៀតណាមបាននាំខ្លួនទៅនោះនិងសពរបស់លោក ផាត់ សារឿន ត្រូវបានបញ្ជូនត្រឡប់ពីកោះត្រល់មកដល់គេហដ្ឋានក្នុងទីរួមខេត្តកំពតវិញ កាលពីរាត្រីទី១៧ កក្កដា ឆ្នាំ២០០៨ កន្លងទៅនេះ ក្រោមសម្រែកទ្រហោយំនៃប្រពន្ធកូននិងញាតិមិត្ត ជាមួយនឹងការដាក់បណ្ដាសាពីសំណាក់ប្រពន្ធរបស់លោក ផាត់ សារឿន គឺអ្នកស្រី ណុប លីណា ចំពោះទង្វើរបស់ទាហានវៀតណាមមកលើប្ដីអ្នកស្រី ។
ភាគីវៀតណាមក៏បានផ្ញើប្រាក់ចំនួន៥លានដុងចូលបុណ្យសពរបស់លោក ផាត់ សារឿន ផងដែរ ។
នគរបាលធ្វើការគូរគំនូសព្រាងឃាតករបាញ់សម្លាប់អ្នកកាសែត
មន្ត្រីនគរបាលខ្មែរបានឲ្យដឹងកាលពីថ្ងៃសុក្រ ទី១៨ កក្កដានេះ ថានគរបាលកំពុងតែធ្វើការគូរគំនូសព្រាងដើម្បីកំណត់អត្តសញ្ញាណឃាតករដែលបានបាញ់សម្លាប់អ្នកកាសែតមនសិការខ្មែរ គឺលោក ឃឹម សម្បូរណ៍ និងកូនប្រុស ។
ស្នងការនគរបាលរាជធានីភ្នំពេញ ឧត្តមសេនីយ៍ ទូច ណារ៉ុថ បានមានប្រសាសន៍ថា សមត្ថកិច្ចកំពុងធ្វើការស៊ើបអង្កេតដោយធ្វើការសហការជាមួយនឹងក្រុមគ្រួសារជនរងគ្រោះ និងសាក្សីដែលបានឃើញការបាញ់ប្រហារមកលើលោក ឃឹម សម្បូរណ៍ និងកូនប្រុសនោះ ។
គួរជម្រាបថាអ្នកកាសែតមនសិការខ្មែរ លោក ឃឹម សម្បូរណ៍ ដែលមានវ័យ៤៧ឆ្នាំនិងកូនប្រុស ឈ្មោះ ខាត់ សារិនភាតា អាយុ២១ឆ្នាំ ត្រូវបានជនមិនស្គាល់មុខចំនួន២នាក់ជិះម៉ូតូម៉ាកវីវ៉ាពណ៌ខ្មៅ ស៊េរីឆ្នាំ២០០៦ បាញ់សម្លាប់ ខណៈដែលជនរងគ្រោះទាំងពីរបានជិះម៉ូតូចេញពីហាត់ប្រាណនៅស្តាតអូឡាំពិក កាលពីល្ងាចថ្ងៃសុក្រ ទី១១ កក្កដា កន្លងទៅនេះ ។
កម្ពុជាជាប្រទេសដែលមានការអភិវឌ្ឍយឺតយ៉ាវជាងគេបំផុត
អង្គការសហប្រជាជាតិបានប្រកាសកាលពីថ្ងៃទី១៧ ខែកក្កដា ថា កម្ពុជាជាប្រទេសដែលមានការអភិវឌ្ឍយឺតយ៉ាវជាងគេបំផុត ។
ក្នុងសេចក្ដីប្រកាសព័ត៌មានរបស់សន្និសីទអង្គការសហប្រជាជាតិ ស្ដីពីជំនួញនិងកិច្ចអភិវឌ្ឍន៍ បានបញ្ជាក់ថាប្រទេសកម្ពុជាគឺជាប្រទេសមួយក្នុងចំណោមប្រទេសទាំង៤៩ ក្នុងពិភពលោកដែលអង្គការសហប្រជាជាតិបានចាត់ទុកថា ជាប្រទេសដែលមានការអភិវឌ្ឍយឺតយ៉ាវជាងគេបំផុតក្នុងសកលលោក ។
បើតាមរបាយការណ៍ស្ដីពីប្រទេសមានការអភិវឌ្ឍយឺតយ៉ាវជាងគេបំផុត ប្រចាំឆ្នាំ២០០៨ របស់សន្និសីទអង្គការសហប្រជាជាតិស្ដីពីពាណិជ្ជកម្ម និងកិច្ចអភិវឌ្ឍន៍ ដែលមានមូលដ្ឋាននៅក្នុងទីក្រុងហ្សឺណែវ ប្រទេសស្វ៊ីស បានឲ្យដឹងថាក្នុងចំណោមប្រទេសទាំង៤៩ ដែលមានការអភិវឌ្ឍយឺតយ៉ាវមានប្រទេសចំនួន៣៣ ស្ថិតនៅក្នុងទ្វីបអាហ្វ្រិក ១០ នៅក្នុងទ្វីបអាស៊ី ៥ នៅក្នុងតំបន់មហាសមុទ្ទប៉ាស៊ីហ្វិក និង ១ ស្ថិតក្នុងតំបន់ឈូងសមុទ្ទការ៉ាប់បៀន ។
ប្រទេសដែលមានការអភិវឌ្ឍយឺតយ៉ាវបំផុតចំនួន១០ នៅក្នុងទ្វីបអាស៊ី រួមមាន ប្រទេសកម្ពុជា, អាប់ហ្កានីស្ថាន, បង់ក្លាដេស, ប៊ូតង់, សាធារណរដ្ឋប្រជាមានិតលាវ, ម៉ាល់ឌីវ. ភូមា, នេប៉ាល់, ទីម័រខាងកើត និងប្រទេសយេមែន ។
ពលរដ្ឋខែត្រកំពតប្រមាណ៣០នាក់មកតវ៉ាបញ្ហាដីធ្លីក្បែរផ្ទះនាយករដ្ឋមន្ត្រី
ពលរដ្ឋប្រមាណ៣០នាក់តំណាងឲ្យប្រជាពលរដ្ឋចំនួនពីរភូមិនៃឃុំជ័យសេនា ស្រុកឈូក ខេត្តកំពត កាលពីថ្ងៃសុក្រ ទី១៨ កក្កដា បាននាំគ្នាប្រមូលផ្តុំនៅវត្តព្រែកសំរោង ស្ថិតនៅក្បែរផ្ទះលោកនាយករដ្ឋមន្ត្រី ហ៊ុន សែន ដើម្បីអំពាវសុំឲ្យលោកនាយករដ្ឋមន្ត្រីជួយធ្វើអន្តរាគមន៍ដោះស្រាយបញ្ហាដីធ្លី ដែលពួកគាត់អះអាងថា មេបញ្ជាការកងពលតូចលេខ៣១ បានបំពានយក ។
ក្រុមពលរដ្ឋអ្នកតវ៉ាដីធ្លីទាំងនោះបានថ្លែងថា លោក ស្រ៊ុន សារឿន ជាមេបញ្ជាការកងពលតូចលេខ៣១ ក៏បានឡើងមកភ្នំពេញដើម្បីបំបែកក្រុមអ្នកតវ៉ា និងដកហូតលិខិតឯកសារប្លង់ដីពីពលរដ្ឋទាំងនោះផងដែរ ។
ទំនាស់ដីធ្លីនៅឃុំជ័យសេនាកន្លងមក ក៏បានបណ្តាលឲ្យមានការចាប់ឃុំខ្លួនអ្នកស្រុកមួយចំនួនផងដែរ ។ ស្ត្រីឈ្មោះ ចាន់ ថុល ដែលអះអាងថាម្តាយនិងប្អូនប្រុសពីរនាក់ ត្រូវទាហានវាយធ្វើបាបនិងចាប់ខ្លួនបញ្ជូនយកទៅឃុំនៅតុលាការខេត្តកំពតបានថ្លែងអំពាវដល់លោកនាយករដ្ឋមន្ត្រី ហ៊ុន សែន ឲ្យជួយអន្តរាគមន៍ ។ ដីដែលមានទំនាស់នោះមានទំហំជាង ៤០០ហិកតា ។
បក្សប្រជាជនប្តឹងចោទប្រកាន់ថា សម រង្ស៊ី ធ្វើការឃោសនាដោយអសីលធម៌
គណបក្សប្រជាជនកម្ពុជាកាលពីព្រឹកថ្ងៃទី១៤ កក្កដានេះ បានប្តឹងចោទប្រកាន់ប្រធានគណបក្សប្រឆាំងគឺលោក សម រង្ស៊ី ពីបទធ្វើការឃោសនាដោយប្រើសម្ដីអសុរោះខ្វះសីលធម៌ ។
តំណាងគណបក្សប្រជាជនកម្ពុជាស្រុកបាកាន ខេត្តពោធិ៍សាត់ លោក ឡេង វឌ្ឍនៈ បានមានប្រសាសន៍ប្រាប់វិទ្យុអាស៊ីសេរីថា ក្នុងការចុះឃោសនារកសំឡេងឆ្នោត កាលពីថ្ងៃទី១២ ខែកក្កដា នៅឯភូមិបាក់ព្រីង ឃុំស្នាមព្រះ លោក សម រង្ស៊ី បានប្រើសម្ដីអសីលធម៌ដូចជាពាក្យអាម៉ឹង និងធ្វើការចោទប្រកាន់ថ្នាក់ដឹកនាំជាន់ខ្ពស់នៃគណបក្សប្រជាជនកម្ពុជាថាជាចោរជាដើម ។
ប៉ុន្តែប្រធានគណបក្សប្រឆាំង លោក សម រង្ស៊ី បានបដិសេធការចោទប្រកាន់នេះដោយលោកមានប្រសាសន៍ថា លោកគ្រាន់តែនិយាយតាមឯកសាររបស់អង្គការ Global Witness តែប៉ុណ្ណោះ ។
អភិបាលខេត្តពោធិ៍សាត់រងការចោទថាចែកអំណោយទិញទឹកចិត្តប្រជាជន
អភិបាលខេត្តពោធិ៍សាត់ លោក ឆាយ សារ៉េត បានរងការចោទថាបានចែកអំណោយទិញទឹកចិត្តប្រជាជនដែលច្បាប់បានហាមឃាត់នៅក្នុងពេលដែលមានយុទ្ធនាការឃោសនាបោះឆ្នោត ។
មន្ត្រីគណបក្សសមរង្ស៊ីប្រចាំខេត្តពោធិ៍សាត់ លោក ហេង ច័ន្ទធួន បានចោទថាសកម្មភាពទិញទឹកចិត្តដោយការឲ្យលុយនិងសារុងបានធ្វើនៅក្នុងវត្តមួយ ឈ្មោះវត្តលលកស ឃុំលលកស ស្រុកសំពៅមាស កាលពីថ្ងៃទី១៣ កក្កដា ។
លោកអភិបាលខេត្តបានថ្លែងថាលោកបានចូលរួមនៅក្នុងពិធីមួយនៅក្នុងវត្តមែន ប៉ុន្តែមិនបានប្រព្រឹត្តអំពើទិញទឹកចិត្តប្រជាជននោះឡើយ ៕