សង្ខេបព័ត៌មានប្រចាំសប្ដាហ៍ ថ្ងៃ ២៤ ដល់ ៣០ វិច្ឆិកា ២០០៨
2008.11.30
លោកនាយករដ្ឋមន្ត្រី ហ៊ុន សែន ថ្លែងទៅកាន់និស្សិតនៅក្នុងពិធីផ្ដល់អាហារូបករណ៍ ក្នុងទីក្រុងភ្នំពេញ កាលពីថ្ងៃទី២០ វិច្ឆិកា ២០០៨។
លោក កែវ និមល អ្នកយកព័ត៌មានវិទ្យុអាស៊ីសេរី ប្រចាំទីក្រុងភ្នំពេញ បានរាយការណ៍សរុបព័ត៌មានសំខាន់ៗនៅកម្ពុជា ពីថ្ងៃ ២៤ ដល់ ៣០ វិច្ឆិកា ឆ្នាំ២០០៨។
នាយករដ្ឋមន្រ្តីខ្មែរដឹកនាំគណៈប្រតិភូទៅចូលរួមកិច្ចប្រជុំកំពូលនៅប្រទេសលាវ
លោក ហ៊ុន សែន នាយករដ្ឋមន្រ្តីកម្ពុជា បានដឹកនាំគណៈប្រតិភូរដ្ឋជាផ្លូវការមួយទៅរួមប្រជុំកំពូលនៅប្រទេសលាវ កាលពីថ្ងៃទី២៤ វិច្ឆិកា និងបានវិលត្រឡប់មកវិញកាលពីថ្ងៃទី២៨ វិច្ឆិកា។
នៅពេលមកដល់ក្រុងភ្នំពេញវិញ លោក ហោ ណាំហុង ជាឧបនាយករដ្ឋមន្រ្តីនិងជារដ្ឋមន្រ្តីក្រសួងការបរទេសកម្ពុជា បានមានប្រសាសន៍ប្រាប់អ្នកកាសែតថា នៅក្នុងប្រទេសលាវគណៈប្រតិភូកម្ពុជាបានជួបចរចាជាមួយភាគីលាវ ហើយបានយល់ព្រមជាមួយគ្នាលើចំណុចមួយចំនួន ក្នុងនោះមានគម្រោងបើកច្រកអន្តរជាតិមួយនៅចំណុចត្រពាំងព្រាលរបស់ប្រទេសកម្ពុជា នៅព្រំដែនកម្ពុជាលាវតាមផ្លូវជាតិលេខ៧ដែលភ្ជាប់ជាមួយនឹងផ្លូវជាតិលេខ១៣របស់លាវ។ ហើយការបើកច្រកនេះកម្ពុជាបានអនុញ្ញាតឲ្យប្រទេសលាវប្រើប្រាស់កំពង់ផែទន្លេនៅក្រុងភ្នំពេញ និងកំពង់ផែសមុទ្រនៅក្រុងព្រះសីហនុ ដើម្បីដឹកនិងផ្ទេរទំនិញកាត់តាមកម្ពុជាទៅកាន់ប្រទេសលាវភាគខាងត្បូងទៀតផង។
ទាក់ទងជាមួយបញ្ហាបង្គោលព្រំដែនប្រទេសទាំងពីរកម្ពុជាលាវ លោករដ្ឋមន្រ្តីការបរទេសកម្ពុជាបានមានប្រសាសន៍ថា មកទល់បច្ចុប្បន្ននេះប្រទេសទាំងពីរបានបោះបង្គោលព្រំដែនបានចំនួន១២១បង្គោលហើយ ហើយនៅសល់ចំនួន២៤បង្គោលទៀតនោះនឹងបោះឲ្យហើយនៅឆ្នាំ២០០៩ខាងមុខនេះ។
និស្សិតពេទ្យប្រមាណ២០០នាក់តវ៉ានឹងការប្រកាសរបស់សាកលវិទ្យាល័យ
ក្រុមនិស្សិតនៃសាកលវិទ្យាល័យវិទ្យាសាស្ត្រសុខាភិបាលប្រមាណ២០០នាក់បាននាំគ្នាធ្វើការតវ៉ាកាលពីថ្ងៃទី២៧ វិច្ឆិកា ក្រោយពេលដែលលទ្ធផលនៃការប្រឡងថ្នាក់ជាតិដើម្បីចូលរៀនបន្តនៅឆ្នាំទី២ បានផ្ទុយពីការប្រកាសរបស់សាកលវិទ្យាល័យថានឹងទទួលយកនិស្សិតជាង១០០០នាក់ដើម្បីចូលរៀននោះ។
ក្រុមនិស្សិតដែលត្រូវបានជ្រើសរើសឲ្យចូលរៀនមានតែប្រហែល៣០០នាក់តែប៉ុណ្ណោះ ដែលធ្វើឲ្យនិស្សិតជាង១០០០នាក់ទៀតដែលបញ្ចប់ថ្នាក់មូលដ្ឋានហើយនោះមិនអាចចូលរៀនបន្តឆ្នាំទី២បានឡើយទើបពួកនិស្សិតនាំគ្នាតវ៉ាជាបាតុកម្ម។
សាកលវិទ្យាធិការនៃសាកលវិទ្យាល័យវិទ្យាសាស្ត្រសុខាភិបាលបានធ្វើលិខិតបំភ្លឺ៥ចំណុចចំពោះការតវ៉ារបស់ក្រុមនិស្សិតពេទ្យជុំវិញលទ្ធផលការប្រឡងបញ្ចប់ឆ្នាំសិក្សាថ្នាក់មូលដ្ឋាននោះ។
លិខិតបំភ្លឺរបស់លោកសាស្ត្រាចារ្យ អ៊ុំ សុផល សាកលវិទ្យាធិការនៃសាកលវិទ្យាល័យវិទ្យាសាស្ត្រសុខាភិបាលបានបំភ្លឺថា ការរៀបចំប្រឡងដោយគណៈកម្មការប្រឡងថា្នក់ជាតិកន្លងមកនេះពុំមានន័យថាជាការខ្វះការទទួលខុសត្រូវដូចដែលការចោទប្រកាន់របស់ក្រុមនិស្សិតនោះឡើយ។
ជាមួយគ្នានេះ លោកសាកលវិទ្យាធិការបានគូសបញ្ជាក់ទៀតថា ការប្រឡងនោះគឺប្រព្រឹត្តទៅដោយតម្លាភាព សុក្រឹត និងយុត្តិធម៌ ពោលគឺសាកលវិទ្យាល័យសម្រេចយកនិស្សិតដែលបានទទួលពិន្ទុលើសមធ្យមភាគតែប៉ុណ្ណោះ។
សម្រាប់បេក្ខជនដែលធ្លាក់គឺសុទ្ធតែទទួលបានលទ្ធផលទាបជាងពិន្ទុដែលកំណត់ដោយគណៈកម្មការប្រឡង ប៉ុន្តែសាកលវិទ្យាល័យក៏មានវគ្គបំប៉ននិងជ្រើសរើសក្នុងចំណោមនិស្សិតដែលធ្លាក់នោះពី៤០ទៅ៦០នាក់ឲ្យចូលរៀនបន្តថ្នាក់បរិញ្ញាបត្រគិលានុបដ្ឋាកទៀតដែរ។
មន្ត្រីរដ្ឋាភិបាលនិងតំណាងរាស្ត្រខ្មែររិះគន់សេចក្តីថ្លែងការណ៍របស់ Global Witness
មន្ត្រីរដ្ឋាភិបាលនិងតំណាងរាស្ត្រខ្មែរ នៅថ្ងៃទី២៧ វិច្ឆិកា បានរិះគន់តបនឹងការថ្លែងការណ៍ថ្មីមួយទៀតរបស់អង្គការអន្តរជាតិមួយឈ្មោះ Global Witness ដោយបានចោទថាជាសេចក្តីថ្លែងការណ៍ដែលមានចរិតនយោបាយនិងជាការគុំកួនមកលើរដ្ឋាភិបាលខ្មែរ។
ប្រតិកម្មរបស់មន្ត្រីខ្មែរនេះគឺបានធ្វើឡើងបន្ទាប់ពីអង្គការ Global Witness ដែលមានមូលដ្ឋាននៅទីក្រុងឡុងដ៍ ប្រទេសអង់គ្លេស បានរិះគន់កាលពីថ្ងៃពុធ ទី២៦ វិច្ឆិកា សុំឲ្យប្រទេសអ្នកផ្តល់ជំនួយជំរុញរដ្ឋាភិបាលខ្មែរឲ្យបញ្ឈប់ការធ្វើសម្បទានវិនិយោគវិស័យប្រេងនិងរ៉ែនៅក្នុងប្រទេសកម្ពុជា ដរាបណាកម្ពុជាមិនទាន់អនុម័តច្បាប់ជាមូលដ្ឋានស្តីអំពីការវិនិយោគលើវិស័យទាំងពីរនោះ។
មន្ត្រីនាំពាក្យរាជរដ្ឋាភិបាលខ្មែរ គឺលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានមានប្រសាសន៍ថា អង្គការនោះតែងតែមានជំហរមួយប្រឆាំងរដ្ឋាភិបាលដោយសារគាត់បានងាកចេញអំពីមុខសញ្ញាពិតប្រាកដរបស់គាត់ទៅជាគណបក្សដែលប្រឆាំងរដ្ឋាភិបាល ពីព្រោះគាត់គុំនឹងរដ្ឋាភិបាលតាំងពីរដ្ឋាភិបាលបញ្ឈប់លែងឲ្យធ្វើជាអ្នកត្រួតពិនិត្យព្រៃឈើនៅកម្ពុជា។
រយៈពេលប៉ុន្មានឆ្នាំចុងក្រោយនេះ របាយការណ៍របស់អង្គការ Global Witness តែងបានចេញផ្សាយនៅស្របពេលដែលរដ្ឋាភិបាលខ្មែរគ្រោងនឹងបើកកិច្ចប្រជុំមួយជាមួយក្រុមប្រទេសអ្នកផ្តល់ជំនួយដើម្បីកៀងគររកថវិកាជំនួយសម្រាប់ទ្រទ្រង់ប្រទេស។
មេដឹកនាំខ្មែរថ្កោលទោសការវាយប្រហារភេរវកម្មនៅទីក្រុង Mumbai
លោកនាយករដ្ឋមន្ត្រី ហ៊ុន សែន នៅថ្ងៃទី២៧ ខែវិច្ឆិកាកន្លងទៅនេះ បានផ្ញើលិខិតមួយច្បាប់ជូនលោកនាយករដ្ឋមន្ត្រីឥណ្ឌា លោក ម៉ាន់ ម៉ូហាន់ស៊ីង ដោយបានថ្កោលទោសចំពោះការវាយប្រហារភេរវកម្មនៅទីក្រុង Mumbai ដែលបានបណ្ដាលឲ្យមនុស្សស្លូតត្រង់រាប់រយនាក់ស្លាប់បាត់បង់ជីវិតនិងរងរបួស។
លោកនាយករដ្ឋមន្ត្រីកម្ពុជាបានអំពាវនាវឲ្យសហគមន៍អន្តរជាតិធ្វើការថ្កោលទោសចំពោះអំពើភេរវកម្មដ៏អមនុស្សធម៌និងសាហាវឃោរឃៅនោះ។
បើតាមការផ្សាយរបស់សារព័ត៌មានបរទេសនានាបានឲ្យដឹងថា ការវាយប្រហារនោះកើតឡើងដោយសារក្រុមភេរវករមួយក្រុម និងបានបណ្ដាលឲ្យមនុស្ស១៤៤នាក់ស្លាប់ក្នុងនោះមានជនបរទេសមួយចំនួននិងជាង៣០០នាក់ផ្សេងទៀតបានរងរបួសដោយសារការវាយប្រហារពីពួកភេរវករជីវពលអ៊ិស្លាមនិយមជ្រុលនេះនៅប្រទេសឥណ្ឌា។
អំពើហិង្សាមួយផ្ទុះឡើងនៅឯទីរួមខេត្តរតនគិរី
អំពើហិង្សាមួយបានផ្ទុះឡើងនៅឯទីរួមខេត្តរតនគិរីធ្វើឲ្យមនុស្សយ៉ាងតិចបីនាក់រងរបួសនិងម្នាក់នាក់ត្រូវចាប់ខ្លួន ក្នុងការបះបោរប្រឆាំងតុលាការខេត្តមួយដែលព្យាយាមចាប់ខ្លួនតំណាងសហគមន៍ជនជាតិដើមពីរនាក់ក្នុងជម្លោះដីធ្លីដ៏រ៉ាំរៃរវាងប្រជាសហគមន៍ជនជាតិដើមជាមួយក្រុមហ៊ុនឌីអឹមហ្រ្គូប។
សាក្សីដែលបានឃើញហេតុការណ៏ លោក ឆាយ ធី បានឲ្យដឹងថា ប៉ូលិសបានព្យាយាមចាប់មនុស្សទាំងពីរនាក់នោះដោយកម្លាំងបាយទើបបានមានការប៉ះទង្គិចគ្នា។
មន្ត្រីអាដហុកបញ្ជាក់ថា មន្ត្រីប៉ូលិសម្នាក់រងរបួស តំណាងសហគមន៍ម្នាក់គឺជាសកម្មជនរបស់សមាគមអាដហុកផងដែរត្រូវចាប់ខ្លួន ចំណែកសមាជិកប្រជាសហគមន៍ជាង៤០នាក់ដែលបានងើបតវ៉ានោះបានរត់គេចខ្លួន។
មន្ត្រីសម្របសម្រួលសមាគមអាដហុកខេត្តរតនគិរី លោក ប៉ែន ប៊ុណ្ណារ៍ បានហៅការចាប់ខ្លួនអ្នកភូមិគឺជាអំពើអយុត្តិធម៌ដោយទាមទារឲ្យមានការថ្កោលទោសចំពោះមន្ត្រីតុលាការទាំងនោះ។
កម្ពុជាអនុញ្ញាតឲ្យពលរដ្ឋខ្មែររៀបការជាមួយនឹងជនបរទេសឡើងវិញ
ប្រទេសកម្ពុជាបានចាប់ផ្តើមអនុញ្ញាតឲ្យប្រជាពលរដ្ឋខ្មែររៀបអាពាហ៍ពិពាហ៍ជាមួយនឹងជនបរទេសឡើងវិញក្រោយពីមានការផ្អាកមួយរយៈកន្លងមក។
អ្នកនាំពាក្យក្រសួងការបរទេសកម្ពុជា លោក កុយ គង់ បានមានប្រសាសន៍នៅថ្ងៃទី២៧ វិច្ឆិកា ថា មូលហេតុដែលកម្ពុជាបានបើកឲ្យមានការរៀបអាពាហ៍ពិពាហ៍ជាមួយជនបរទេសឡើងវិញ បន្ទាប់ពីមានការផ្អាកជាច្រើនខែកន្លងមកនោះ ដោយរដ្ឋាភិបាលទើបមានបទបញ្ជាថ្មីដើម្បីទប់ស្កាត់ការជួញដូរមនុស្សតាមរូបភាពអាពាហ៍ពិពាហ៍ដែលធ្លាប់មានកន្លងមក។
លោកឧត្តមសេនីយ៍ប៉ូលិសប្រធាននាយកដ្ឋានប្រយុទ្ធនឹងការជួញដូរមនុស្ស លោក ប៊ិត គឹមហុង មានប្រសាសន៍ថា អនុក្រឹត្យថ្មីមានចំណុចថ្មីជាច្រើនដែលជាវិធានការមួយជួយការពារស្ត្រីឲ្យផុតពីការជួញដូរបានច្រើនក្នុងរូបភាពអាពាហ៍ពិពាហ៍នេះ។
លោក បិត គឹមហុង បានឲ្យដឹងថា តាមគោលការណ៍ថ្មី ៖ ទី១ កូនកម្លោះត្រូវតែមករើសស្ដីដណ្ដឹងប្រពន្ធនៅប្រទេសកម្ពុជា ទី២ ហាមដាច់ខាតមិនឲ្យមានភ្នាក់ងារឬក្រុមហ៊ុនជាអ្នកដើរតួកណ្ដាល ទី៣ ត្រូវតែមានការស្ម័គ្រចិត្តរបស់បុរសដែលជាជនបរទេស ហើយក៏ទាមទារឲ្យមានការងារធ្វើត្រឹមត្រូវផងដែរ ដើម្បីបញ្ចៀសបាននូវការកេងប្រវ័ញ្ច ក៏ដូចជាការក្លែងបន្លំអាពាហ៍ពិពាហ៍ក្លែងក្លាយដើម្បីយកមនុស្សទៅជួញដូរនៅបរទេស។
លោក ប៊ិត គឹមហុង ក៏បានឲ្យដឹងដែរថា កន្លងមកតាមរូបភាពអាពាហ៍ពិពាហ៍នេះ ស្ត្រីកម្ពុជាត្រូវបានគេបោកបញ្ឆោតយកទៅជួញដូរជាង២០០០នាក់រួចមកហើយ៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ