ຣົຖຂົນສົ່ງ ສິນຄ້າລາວຕົກຄ້າງ, ຈີນຈຳກັດຈຳນວນ

2021-12-07
Share

ຣົຖຂົນສົ່ງສິນຄ້າ ຈາກລາວ ໄປຈີນ ຈອດອັ່ງກັນຫຼາຍ ທີ່ດ່ານພາສີບໍ່ເຕັນ ແຂວງຫຼວງນໍ້າທາ ຊຶ່ງມີຣົຖບໍ່ຕໍ່າກວ່າ 2,000-3,000 ຄັນ ລໍຖ້າຈະເຂົ້າໄປຈີນ ຍ້ອນວ່າເຈົ້າໜ້າທີ່ຈີນ ຍັງຈໍາກັດການເຂົ້າ-ອອກ ໃຫ້ບໍ່ເກີນ 100-200 ຄັນຕໍ່ມື້ ຮວມທັງມີການກວດກາເຂັ້ມງວດຂຶ້ນ ກ່ຽວກັບເຊື້ອ ໂຄວິດ-19 ນໍາດ້ວຍ ສະນັັ້ນທາງການລາວ ຈຶ່ງຕ້ອງໄດ້ຈໍາກັດ ເຣື່ອງການປ່ອຍຣົຖໄປຈີນ ແລະກໍເຮັດຕາມຣະບຽບເຊັ່ນກັນ, ດັ່ງເຈົ້າໜ້າທີ່ ທີ່ກ່ຽວຂ້ອງ ຂອງແຂວງຫຼວງນໍ້າທາ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນ​ວັນ​ທີ່ 7 ທັນວາ ນີ້ວ່າ:

“ຣົຖຫຼາຍເດີ້ ເປັນຮອດ 2-3 ພັນຄັນຣົຖ ກະບໍ່ມີບ່ອນຈອດແລ້ວນະດຽວນີ້ ມັນຕ້ອງໄປຕາມຣະບຽບ ໄປຕາມຄິວ ແບບວ່າເຂົາຈັດໃຫ້ເນາະ ເຣື່ອງການປ່ອຍຣົຖ ຕ້ອງເຂົ້າໃຈວ່າ ຈີນເຂົາຮັບແຕ່ມື້ນຶ່ງ 100 ປາຍຄັນ 200 ຖ້າສົມມຸດວ່າ ເປີດດ່ານປົກກະຕິນິ່ ຖືວ່າບໍ່ອັ່ງຣົຖນ່າ ເຂົາຮັບຈໍານວນຈໍາກັດ ເພາະມີພຍາດ ແລ້ວເຂົາຢ້ານພຍາດ ເຂົ້າປະເທດເຂົາເດ້ ເຂົາກວດຣະອຽດ ເຂົາເຊັກໝົດເດ້ຈີນ.”

ກ່ຽວກັບເຣື່ອງນີ້ ຄົນຂັບຣົຖຂົນສົ່ງສິນຄ້າຜູ້ນຶ່ງ ທີ່ລໍໍຖ້າຢູ່ດ່ານບໍ່ເຕັນ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ຢາກໃຫ້ທາງການແຂວງຫຼວງນໍ້າທາ ແກ້ໄຂບັນຫາດັ່ງກ່າວນີ້ ຫຼືເປີດດ່ານບໍ່ເຕັນ-ບໍ່ຫານ ເພື່ອໃຫ້ການຂົນສົ່ງສິນຄ້າ ໄດ້ສະດວກ ແລະບໍ່ຊັກຊ້າ:

“ກະມີເດ້ ກະຫຼາຍຄົນ ຢາກໃຫ້ແກ້ໄຂຫັ້ນ ໃຫ້ເປີດດ່ານເປັນປົກກະຕິຫັ້ນລະເນາະ ກະເຂົ້າ-ອອກໄດ້ສະບາຍຫັ້ນ ເພາະວ່າຣົຖມັນຫຼາຍເນາະ ອັນທາງຈີນເຂົ້າມາກະມີ ແລ້ວກະທາງລາວເຂົ້າໄປພຸ້ນກະມີ ກະປ່ອຍໜ້ອຍ ມັນຕ້ອງໄດ້ຖ້າເຂົ້າໄປນ່າ ຖ້າຄິວ ມັນມີບັດຄິວເນາະຢູ່ຫັ້ນ ກັບບໍ່ໄດ້ແຫຼະ ກະຕ້ອງຖ້າເອົາຣົຖຢູ່ຫັ້ນກ່ອນ.”

ສາເຫດອີກຢ່າງນຶ່ງ ທີ່ເຮັດໃຫ້ຣົຖຂົນສົ່ງສິນຄ້າອັ່ງກັນຫຼາຍ ຢູ່ບໍຣິເວນດ່ານພາສີ ບໍ່ເຕັນ ນັ້ນຍ້ອນວ່າທາງການຈີນ ຍັງໃຊ້ມາຕການປ້ອງກັນ ແລະຄວບຄຸມເຊື້ອ ໂຄວິດ-19 ຢູ່ ໂດຍຕ້ອງໃຫ້ມີການປ່ຽນໂຊເຟີ້ຂັບຣົຖ ຢູ່ລະຫວ່າງດ່ານ ຊຶ່ງໂຊເຟີ້ຂັບຣົຖ ທີ່ຈະມາປ່ຽນກັນກໍມີໜ້ອຍເກີນໄປ ບາງຄັນຕ້ອງລໍຖ້າເປັນເດືອນກໍມີ ກວ່າເຄື່ອງຈະໄປຮອດຈຸດໝາຍ ກໍຊັກຊ້າ ເຮັດໃຫ້ເຄື່ອງນັ້ນເນົ່າ ແລະເສັຍຫາຍ, ດັ່ງຄົນຂັບຣົຖຂົນສົ່ງສິນຄ້າ ທີ່ລໍຖ້າຢູ່ດ່ານບໍ່ເຕັນ ອີກທ່ານນຶ່ງກ່າວວ່າ:

“ປ່ອຍຣົຖເຂົ້າກໍຍ້ອນວ່າ ຕ້ອງລໍຖ້າໂຊເຟີ້ເນາະ ໜ້ອຍຄົນ ສົມມຸດຜູ້ນີ້ ຂັບຣົຖອອກໄປແລ້ວ ມີແຕ່ລໍຖ້າຄັນຕໍ່ໄປ ບາງຄັນຕ້ອງໄດ້ລໍຖ້າໂຊເຟີ້ດົນ ບາງຄັ້ງຢູ່ຫັ້ນເປັນເດືອນ ກວ່າຈະໄດ້ເຄື່ອງຂອງຂະເຈົ້າ ເຂົາເຈົ້າກໍຢາກໃຫ້ໄປຮອດໄວໆ ເຄື່ອງມັນຈຶ່ງບໍ່ເນົ່າ ຫຼືວ່າບໍ່ເສັຍຫັ້ນນ່າ ຢາກໃຫ້ແກ້ໄຂລະແມ່ນ ປ່ອຍໃຫ້ຄົນ ຣົຖສ່ວນຕົວຫັ້ນ ຂັບໄດ້ປົກກະຕິ.”

ທ່ານກ່າວຕື່ມວ່າ ບາງເທື່ອຣົຖຂົນສົ່ງສິນຄ້າ ທີ່ມາຈາກທົ່ວປະເທດກໍມີຈໍານວນຫຼາຍ ເພື່ອຈະຂົນສົ່ງສິນຄ້າໄປຈີນ ແລະທາງຈີນກໍນໍາເຂົ້າສິນຄ້າມາລາວ ກໍເຮັດໃຫ້ການສັນຈັນຈອນ ຢູ່ຕາມຖນົນຫົນທາງ ກ່ອນຈະໄປຮອດດ່ານພາສີບໍ່ເຕັນ ໄລຍະທາງປະມານ 1-2 ກິໂລແມັດ ເຮັດໃຫ້ມີຣົຖຕິດນໍາດ້ວຍ.

ໃນຂະນະດຽວກັນ ທາງການແຂວງຫຼວງນໍ້າທາ ມີການປະຊຸມກັນ ກ່ຽວກັບບັນຫາດັ່ງກ່າວນີ້ຢູ່ ເພື່ອຫາທາງແກ້ໄຂ ແຕ່ທາງການຈີນ ມີການຈໍາກັດ ການເຂົ້າ-ອອກ ຂອງຣົຖຂົນສົ່ງສິນຄ້າ ມື້ນຶ່ງ ຮັບພຽງແຕ່ 200 ຖ້ຽວເທົ່ານັ້ນ ເພື່ອປ້ອງກັນບໍ່ໃຫ້ເຊື້ອ ໂຄວິດ-19 ໄປແຜ່ຣະບາດຢູ່ຈີນ, ດັ່ງເຈົ້າໜ້າທີ່ ທີ່ກ່ຽວຂ້ອງ ໃນແຂວງຫຼວງນໍ້າທາ ອີກທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ໂຕນີ້ກໍມີການປະຊຸມກັນຢູ່ ເພາະວ່າຈີນ ມັນກໍອີງໃສ່ວ່າ ການກວດສອບການຮອງຮັບ ຂອງເຈົ້າໜ້າທີ່ຮັບຜິດຊອບ ໄດ້ປະມານສໍ່ານັ້ນ ຈີນຮັບມື້ນຶ່ງ 200 ຖ້ຽວ ສົມມຸດວ່າ ເມື່ອເກີນ ມັນອັ່ງຢູ່ຫັ້ນໄດ້ຈັດຄິວ ມື້ນຶ່ງມັນສາມາດສົ່ງອອກໄດ້ແຕ່ 200 ຖ້ຽວຈັ່ງຊີ້ນະເນາະ.”

ສໍາລັບການຕິດເຊື້ອ ໂຄວິດ-19 ຢູ່ປະເທດລາວ ໃນມື້ວັນທີ່ 7 ທັນວາ 2021 ນີ້ ທາງການລາວ ກວດພົບຜູ້ຕິດໂຄວິດ-19 ໃໝ່ເພີ່ມອີກ 1,378 ຄົນ ໃນນີ້ ສ່ວນໃຫຍ່ແມ່ນຕິດເຊື້ອໃນຊຸມຊົນ ມາຮອດປັດຈຸບັນ ສປປ.ລາວ ມີຜູ້ຕິດເຊື້ອໂຄວິດ-19 ສະສົມທັງໝົດ 82,082 ຄົນ ແລະເສັຽຊີວິດສະສົມ 214 ຄົນ.

ສ່ວນການສັກວັກຊິນ ປ້ອງກັນເຊື້ອໂຄວິດ-19 ມາຮອດວັນທີ່ 6 ທັນວາ 2021 ຜູ້ມີໄດ້ຮັບການສັກວັກຊິນເຂັມທີ່ 1 ຈໍານວນ 4,059,940 ຄົນ ກວມເອົາ 55% ແລະເຂັມທີ່ 2 ຈໍານວນ 3,232,862 ຄົນ ກວມເອົາ 44%.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ