ຄົນງານລາວທີ່ຄ້າງຢູ່ ມາເລເຊັຽ ໄດ້ມາບ້ານແລ້ວ

ສຸພັດຕາ
2021-01-16
Share
ຄົນງານລາວທີ່ຄ້າງຢູ່ ມາເລເຊັຽ ໄດ້ມາບ້ານແລ້ວ ຄົນງານປະມົງລາວ ທີ່ຕົກຄ້າງ ຢູ່ເມືອງຣອມປິ້ນ, ແຂວງປາຫັງ, ປະເທດມາເລເຊັຽ ຈໍານວນ 177 ຄົນ, ກຳລັງເດີນທາງ ກັບ ສປປລາວ ໃນຕອນເຊົ້າ ວັນທີ 17 ມົກກະຣາ 2021.
ນັກຂ່າວພົລເມືອງ

ຊາວປະມົງລາວ ທີ່ຍັງຕົກຄ້າງ ຢູ່ເມືອງຣອມປິ້ນ, ແຂວງປາຫັງ, ປະເທດ ມາເລເຊັຽ ຈໍານວນ 177 ຄົນ, ມີກຳນົດເດີນທາງ ກັບ ສປປລາວ ໃນຕອນເຊົ້າ ວັນທີ 17 ມົກກະຣາ 2021 ນີ້, ໂດຍເຮືອບິນເໝົາລໍາ ຂອງ ສາຍການບິນ ແອຣ໌ເອເຊັຽ ເບີຣ໌ຮາດ (AirAsia Berhad), ອີງຕາມຄວາມເວົ້າ ຂອງຊາວປະມົງລາວ ທີ່ພວມຕຣຽມເຄື່ອງຂອງ ກັບບ້ານ ຕໍ່ ວິທຍຸ ເອເຊັຽ ເສຣີ ໃນວັນທີ 16 ມົກກະຣາ ນີ້.

“ທຸກຄົນກະປື້ມອົກປື້ມໃຈ, ດີອົກດີໃຈແຫຼະ ທຸກຄົນກະດາຍ, ຊິໄດ້ກັບເມືອບ້ານເມືອຊ່ອງ, ທຸກຄົນກະພາກັນມ່ວນ ປື້ມອົກປື້ມໃຈຫຼາຍ, ດີອົກດີໃຈແຮງແຫຼະມື້ນີ້ນະ, ຂຶ້ນຍົນມື້ອື່ນ ພຸ້ນແຫຼະ ຂຶ້ນຍົນຫັ່ນນະ, ມື້ອື່ນ ຕອນ 6 ໂມງເຊົ້າພຸ້ນແຫຼະ, ແຕ່ຕອນນີ້ນິ່ ພາກັນມາ ຕຣຽມ ກໍາລັງລໍຣົດ ຊິມາຮັບໄປສນາມບິນ.”

ຊາວປະມົງລາວ ອີກທ່ານນຶ່ງເວົ້າວ່າ, ກ່ອນໜ້ານີ້ ຄືຕອນທີ່ກວດໂຄວິດ-19 ກໍມີຮອດ 180 ຄົນ, ແຕ່ພໍເມື່ຶອຮູ້ວ່າ ບໍ່ໄດ້ເມືອ ໃນວັນທີ 9 ມົກກະຣາ, ຄົນງານຫຼາຍຄົນ ກໍຖອນໂຕ ໄປເຮັດວຽກ ຢູ່ບ່ອນອື່ນຕໍ່ ກໍມີ:

“177 ປະມານນີ້ແຫຼະ, ເພາະວ່າ ຂະເຈົ້າບໍ່ໄດ້ກັບວັນທີນັ້ນລະ [ວັນທີ 9], ມີຄົນຖອນໂຕ ແນ່ເດ້, ກວດໂຄວິດ 180 ຄົນ, ແຕ່ຖອນໂຕໄປ 2 ຄົນ 3 ຄົນນີ້ແຫຼະ, ຕອນນັ້ນ ເຮົາລວມຄົນ ໄດ້ 300 ກວ່າເດ້, ແຕ່ເຮົາຈອງເຄື່ອງໄດ້ແຕ່ 180, ລະບາດນີ້ ອະນຸມັດມາ ນີ້ວ່າ ມີ 2 ຖ້ຽວບິນ, ທີ 17 ນິ່ ກັບວັນທີ 24, ຊິພະຍາຍາມໃຫ້ກັບ ກ່ອນວັນທີ 26 ນີ້ແຫຼະ, ເພາະວ່າ ວີຊ້າ ທຸກຄົນ ກໍຈະໝົດອາຍຸ ໃນວັນທີ 26-27 ນີ້, ທີ່ແນ້ໆລະ ຄົນຍັງເຫຼືອຫຼາຍແຫຼະ ເຫຼືອເປັນຮ້ອຍ, 100 ກວ່າພຸ້ນແຫຼະ ວ່າງ 3-4 ມື້ ກະມີໝູ່ເຮົາ ຄົນຮູ້ຈັກ ຂະເຈົ້າລໍບໍ່ໄຫວ ຂະເຈົ້າ ເລີຍຖອນພາສປອດໄປໄດ້, ຂະເຈົ້າກະເລີຍ ຊິໄປອອກເຮືອຕໍ່ ຢູ່ຄອງຕາເວັນຕົກ, ປະມານ 5-6 ຄົນທີ່ວ່າໄປຫັ່ນ ຈາກທີ່ຄອງນີ້.”

ນອກຈາກຄົນງານ ຈໍານວນ 177 ຄົນ ທີ່ເຮັດວຽກຢູ່ ເມືອງຣອມປິ້ນ, ແຂວງປາຫັງ ນີ້ແລ້ວ, ກໍຍັງມີຄົນງານລາວ ອີກຈໍານວນ 100 ປາຍຄົນ ທີ່ຍັງລໍຖ້າກັບລາວ ນໍາເຮືອບິນເໝົາລໍາ ໃນມື້ວັນທີ 24 ມົກກະຣາ, ດັ່ງຄົນງານ ຜູ້ດຽວກັນນີ້ ໄດ້ອະທິບາຍ ສູ່ຟັງວ່າ:

“ໜ້າຊິເຫຼືອຢູ່ອີກ ປະມານ 100 ປາຍພຸ້ນແຫຼະ, ເພາະວ່າຕອນທີ່ພວກເຮົາລົມກັນ ຊິຈອງປີ້ຍົນ ວັນທີ 9 ນີ່, ຕອນນັ້ນມັນລວມຄົນ ໄດ້ 328 ຄົນເດ໋, ລະບັດນີ້ ພໍໄດ້ເຄື່ອງລໍາດຽວ ທີ່ເຫຼືອນັ້ນ ກໍເລີຍກະແຈກກະຈາຍ, ບໍ່ແມ່ນສະເພາະ ຢູ່ບ່ອນນີ້, ພໍໄດ້ຍິນຂ່າວວ່າ ຊິໄດ້, ຄົນງານປະມົງ ຢູ່ທາງອື່ນ, ຢູ່ຄອງອື່ນ ກະໄດ້ຍິນຂ່າວວ່າ ກະຊິມາລວມນໍາກັນ, ອັນນີ້ ກະບໍ່ແນ່ໃຈຄືກັນ, ແຕ່ວ່າ ທີ່ແນ້ໆ ທີ 24 ມີອີກຖ້ຽວບິນນຶ່ງ, ແຕ່ຊິມີຈັກຄົນ ຂະເຈົ້າ ກໍາລັງລວບລວມ ກັນຢູ່ຕອນນີ້.”

ການກັບບ້ານ ຂອງຄົນງານລາວ ໃນຄັ້ງນີ້ ໂດຍການຊ່ອຍເຫຼືອ ຂອງສະຖານທູດລາວ ປະຈໍາມາເລເຊັຽ, ແລະ ສາຍການບິນ ແອຣ໌ເອເຊັຽ ເບີຣ໌ຮາດ (AirAsia Berhad) ຂອງບໍຣິສັດ ອຸດົມສິນ ບໍຣິການ ການຄ້າ ແລະ ການທ່ອງ (Oudomsin Trading & Travel Service).

ເຖິງຢ່າງໃດກໍດີ, ຫວັງວ່າ ຄົນງານລາວ ທີ່ຍັງຕົກຄ້າງຢູ່ ມາເລເຊັຽ ຄົງຈະເດີນທາງຮອດບ້ານ ຕາມທີ່ໄດ້ກຳນົດໄວ້ ໃນມໍ່ໆນີ້.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ