ປຶ້ມຄູ່ມື ສື່ມວນຊົນ ລາວ-ໄທ

ຄູ່ມືດັ່ງກ່າວນີ້ ແມ່ນພາຍ​ໃຕ້ ການລຽບລຽງ ແລະ ຈັດຂື້ນ ລະຫ່ວາງ ສະມາຄົມ ນັກຂ່າວ ຂອງລາວ ແລະ ໄທ ຫລັງຈາກ ທີ່ໄດ້ຄົ້ນຄົ້ວາ ກັນໄປກັນມາ ເປັນເວລາ ສອງປີ ແລະ ປັດຈຸບັນນີ້ ໄດ້ສໍາເຣັດລົງແລ້ວ. ການຈັດຄູ່ມື ສື່ມວນຊົນ ລາວ-ໄທ ຮ່ວມກັນ ແມ່ນເພື່ອຊ່ວຍໃຫ້ ການສເນີຂ່າວ ລະຫ່ວາງ ສອງປະເທດ ເປັນໄປ ໃນທາງສ້າງສັນ ແລະ ມີປະສິດທິພາບ ຫລາຍຂື້ນ.

ເມື່ອວັນທີ 26 ທັນວາ ຜ່ານມານີ້ ທ່ານ ກະສິດ ພິຣົມ ຣັຖມົນຕຣີ ຕ່າງປະເທດ ຂອງໄທ ແລະ ທ່ານ ຄໍາສວຍ ແກ້ວດາຣາ ທີ່ປືກສາ ປະຈໍາສະຖານທູດ ລາວ ທີ່ປະເທດໄທ ໄດ້ຮ່ວມເປັນ ປະທານພິທີ ເປີດໂຕໜັງສື ຄູ່ມື ສື່ມວນຊົນ ລາວ-ໄທ ຢູ່ທີ່ ສະມາຄົມ ນັກຂ່າວ ນັກໜັງສືພິມ ແຫ່ງປະເທດໄທ ທີ່ບາງກອກ.

ທ່ານ ຄໍາສວຍ ໄດ້ກ່າວວ່າ ໜັງສືຫົວນີ້ ຈະຊ່ວຍ ສ້າງຄວາມສັມພັນ ອັນດີ ລະຫ່ວາງ ປະຊາຊົນ ຂອງສອງປະເທດ:

“ໃນລະຍະ ຜ່ານມາ ເກີດຄວາມບໍ່ເຂົ້າໃຈ ລະຫ່ວາງ ສອງສື່ມວນຊົນ ກໍຄື ນັກຂ່າວ ຊື່ງວ່າ ນັກຂ່າວ ຂຽນໄປ ບາງຄັ້ງບາງຄາວ ເກີດຄວາມບໍ່ເຂົ້າໃຈ ຊື່ງກັນແລະກັນ. ດັ່ງນັ້ນ ໜັງສືໂຕນີ້ ຈະຊ່ວຍໃຫ້ ຄວາມເຂົ້າອົກເຂົ້າໃຈ ການຂຽນຂ່າວ ຄວາມສັມພັນ ລະຫ່ວາງ ສອງປະເທດ. ການຂຽນຂ່າວ ຂອງ ສື່ມວນຊົນໄທ ກໍຈະຖືກຕ້ອງ ຍິ່ງໆຂື້ນ ໃນຕໍ່ໜ້ານີ້.

ໃນຂະນະດຽວກັນ ທ່ານ ກະສິດ ກໍໄດ້ກ່າວວ່າ ກະຊວງການຕ່າງປະເທດໄທ ໄດ້ຫລິງເຫັນ ຄວາມສໍາຄັນ ຂອງການຈັດພິມ ໜັງສືຄູ່ມື ດັ່ງກ່າວ ແລະ ຈະຂໍຊື້ ເພື່ອນໍາໄປມອບ ໃຫ້ສະຖານທູດ ຕ່າງໆ ຂອງໄທ ໃຫ້ມະຫາວິທະຍາໄລ ໃຫ້ໜ່ວຍຣາຊະການ ໂຮງຮຽນ ຫໍສມຸດ ຜູ້ວ່າ ຣາຊການ ໂດຍສະເພາະ ໃນພາກອິສານ:

“ເພື່ອຈະໄດ້ໃຊ້ ໃຫ້ຖືກຕ້ອງ ແລະ ກໍ ສື່ຄວາມໝາຍໄດ້ ແລະ ກໍຈະໄດ້ມີ ຄວາມເຂົ້າອົກເຂົ້າໃຈວ່າ ຊາວລາວເຂົາເວົ້າ ຄໍາວ່າ ຢ່າງນີ້ ມັນມີຄວາມໝາຍ ຄືແນວໃດ ໃນພາສາໄທ.”

ໜັງສືຄູ່ມື ສື່ມວນຊົນ ລາວ-ໄທ ທີ່ວ່ານີ້ ປັດຈຸບັນ ບໍ່ທັນ ໄດ້ພິມຮຽບຮ້ອຍສົມບູນ ເທື່ອ ຄາດວ່າ ຕົ້ນປີ 2009 ນີ້ ຈະສາມາດພິມ ໃຫ້ເປັນ ສະບັບສົມບູນແບບ ເພື່ອວາງຈໍານ່າຍ.