ໄທ ໂຈະ ຮັບຈົດທະບຽນ ແຮງງານ ຕ່າງດ້າວ

ກະ​ແສ​ຂ່າວ ​ທ້ອງ​ຖິ່ນ ລາຍ​ງານ​ວ່າ ​ເມື່ອ​ວັນ​ອາທິດ ທີ 4 ມົກກະລາ 2009 ຜ່າ​ນມາ ວ່າ ທ່ານ ພິ​ໄຊ ​ເອກ​ພິທັກ​ດຳລົງ ອະທິບໍດີ​ກົມ ການຈັດ​ຫາ​ງານ​ ຂອງ​ໄທ ​ເປີດ​ເຜີຍ​ວ່າ ຫລັງ​ຈາກ ຄະນະ ຣັດຖະມົນຕຣີ ມີ​ມະຕິ​ ບໍ່​ເຫັນ​ພ້ອມ​ ໃຫ້​ເປີດ​ ການ​ຈົດ​ທະບຽນ ຄົນ​ງານ​ຕ່າງ​ດ້າວ ຮອບ​ໃໝ່ ຕັ້ງ​ແຕ່​ວັນ​ທີ 9 ທັນວາ 2008 ຜ່ານ​ມາ ​ເນື່ອງ​ຈາກ​​ເຫັນວ່າ ສະພາບ​ ເສດຖະກິດ​ຂອງ​ໄທ ໃນ​ປັດຈຸບັນ ສົ່ງ​ຜົນ​​ໃຫ້ ​ເກີດ​ມີ​ການ​​ຍຸດຈ້າງ ​ຄົນ​ງານ​ຊາວ​ໄທ ​ຢູ່​ຕາມ​ໂຮງ​ຈັກ​ໂຮງງານ ຕ່າງໆ​ເປັນ​ຈຳນວນ​ ຫລວງຫລາຍ.

ຖ້າ​ປ່ອຍ​ໃຫ້​ມີ​ການ​ຈົດ​ທະບຽນຢູ່​ຕໍ່​ໄປ ຄົນ​ງານ​ຕ່າງ​ດ້າວ ອາດ​ຈະຍາດ​ແຍ່ງ ​ວຽກງານ​ ຂອງ​ຄົນ​ງານ​ໄທ​ໄປ​ໄດ້. ດັ່ງນັ້ນ ຄະນະ ​ບໍລິຫານ​​ ແຮງງານ ຕ່າງ​ດ້າວ ທີ່​ລັກລອບ ​ເຂົ້າ​ເມືອງ ​ແບບ​ຜິດ​ກົດໝາຍ ຂອງ​ໄທ ຈຶ່ງ​ມີ​ມະຕິ​ ໃຫ້​ລະງັບ ຫລື ​ໂຈະ ​ການ​ຈົດ​ທະບຽນນັ້ນ ​ໄວ້​ກ່ອນ.

ສ່ວນວ່າ ຄົນ​ງານຕ່າງ​ດ້າວ ທີ່​ເຄີຍ​ ຂື້ນທະບຽນ ຂໍອະນຸຍາດ​ ເຮັດ​ວຽກມາ ​ແລ້ວນັ້ນ ກໍ​ຍັງ​ສາມາດ ​ຍື່ນ​ຂໍ​ຕໍ່ສັນຍາ ​ເພື່ອ​ປະກອບ​ ອາຊີບ​ ໃນ​ປະ​ເທດ​ໄທ ​ຕໍ່​ໄປ​ໄດ້. ການ​ຕໍ່ອາຍຸ​ ໃບ​ອະນຸຍາດ​ ໃຫ້​ຄົນ​ງານ​ຕ່າງ​ດ້າວ ​ແບ່ງ​ອອກ​ເປັນ 4 ​ໄລຍະ ຄື:

1. ຄົນ​ງານທີ່​ມີ​ໃບ​ອະນຸ ຍາດ ​ແລະ ຈະໝົດອາຍຸ ​ໃນ​ວັນ​ທີ 20 ມົກກະລາ 2009 ສາມາດ​ ຕໍ່ອາຍຸ​ໄດ້ ​ຕັ້ງ​ແຕ່ ວັນ​ທີ 5 ຫາ​ວັນ​ທີ 20 ມົກກະລາ 2009;

2. ຖ້າ​​ໃບ​ອະນຸຍາດ ຈະໝົດອາຍຸ ​ໃນ​ວັນ​ທີ 28 ກຸມພາ 2009 ສາມາດ​ເລີ່​ມ ຕໍ່ອາຍຸ​ໄດ້ ​​ແຕ່ໃນ​ວັນ​ທີ 10 ຫາ ວັນ​ທີ 28 ກຸມພາ 2009;

3. ຖ້າ​​ໃບ​ອະນຸຍາດ ຈະໝົດອາຍຸ ​ໃນ​ວັນ​ທີ 14 ມິ​ນາ 2009 ສະ ເພາະ 4 ​ແຊວ​ງພາກ​ໄຕ້​ຂອງ​ໄທ ຄື ​ແຂວງ ຍະ​ລາ, ປັດ​ຕານີີ, ນະລາ​ທິວາ​ດ ​ແລະ​ແຂວງ ສົງ​ຂາ ຈະຕໍ່ອາຍຸ​ໄດ້​ຕັ້ງ​ແຕ່ ວັນ​ທີ 13 ຫາ​ວັນ​ທີ 24 ມິ​ນາ 2009;

4. ຄົນ​ງານ ຕ່າງ​ດ້າວ ທີ່​ມີ​ ໃບ​ອະນຸຍາດ ຈະໝົດອາຍຸ ​ໃນ​ວັນ​ທີ 30 ມິຖຸນາ 2009 ຈະ​ໄປຕໍ່ ອາຍຸ​ໄດ້ ​ແຕ່​ວັນ​ທີ 1 ຫາ​ວັນ​ທີ 30 ມິຖຸນາ 2009.