ວັນທີ 13 ເດືອນ ທັນວາ ປີ 2006 Radio Free Asia Lao Service 2025 M Street, N.W. Suite 300 Washington, DC 20036 U.S.A.

ຈັດສເນີທ່ານ ໂດຍ: ໄມສຸຣີ ສບາຍດີ ທ່ານຜູ້ຟັງທີ່ເຄົາຣົບ ມື້ນີ້ກໍແມ່ນວັນພະຫັດອີກແລ້ວ ຊຶ່ງກໍໝາຍຄວາມວ່າ ເປັນມື້ຕອບຈມ. ຂອງ ທ່ານຜູ້ຟັງ. ຫວັງວ່າ ທ່ານທີ່ເປັນແຟນຣາຍການ ຄົງບໍ່ລືມເປີດວິທຍຸຮັບຟັງຢູ່ຕິເນາະ ເອົາລະ ເພື່ອບໍ່ເປັນການ ເສັຽເວລາ ຂອງພວກເຮົາ Maysoly ຂໍເຊີນທ່ານເຂົ້າສູ່ ຣາຍການນະບັດນີ້ເລີຽ.

ຈົດໝາຍສບັບທຳອິດ ທີ່ໄດ້ຮັບຈາກທ່ານຜູ້ຟັງ ໃນມື້ນີ້ ກໍຄືຂອງທ່ານ ”ສຸທັດ ຊັບພູ່“ ຂຽນ ຈາກເມືອງ ແກ່ງກະຈານ ອຸທະຍານແຫ່ງຊາຕ ແຂວງເພັຊບູຣີ ປະເທດໄທ. ເພີ່ນຂຽນເປັນພາສາໄທ ມາອີກຕາມເຄີຍ. ຖ້າອ່ານບໍ່ຖຶກ ກໍຂໍອະໄພນຳຫຼາຍໆ. ທ່ານສຸທັດ ກໍຄືແຟນ ປະຈຳຣາຍການ ຕອບຈມ. ເພີ່ນໄດ້ຂຽນ ຈມ.ເຖີງ RFA ຫຼາຍໆ ສບັບ. ສບັບນີ້ກໍ່ບໍ່ແຕກຕ່າງກັບ ສບັບກ່ອນໆ ຄືທ່ານ ໄດ້ຍ້ອງຍ ໍຣາຍການຕ່າງໆ ຂອງ RFA ອີກຕາມເຄີຍ ເພີ່ນບອກວ່າ:

“ຂ້າພະເຈົ້າ ໄດ້ຕິດຕາມ ຮັບຟັງຣາຍການອອກອາກາດ ຂອງວິທຍຸເອເຊັຽເສຣີ ເປັນປະຈຳ ບໍ່ວ່າ ທັງພາກເຊົ້າ ຫຼືພາກຄ່ຳ. ຂ້າພະເຈົ້າເຫັນວ່າ ທຸກໆ ຣາຍການ ຂອງພວກທ່ານນັ້ນ ແມ່ນໃຫ້ປໂຍດ ແລະ ຄວາມຮູ້ ແກ່ຜູ້ຟັງ ເປັນຕົ້ນກໍແມ່ນ ຣາຍການສເນີຂ່າວຕ່າງໆ ຣາຍການປວັຕ ສາຕຣ໌ລາວ ຮວມທັງຣາຍການ ບັນເທີງນຳ ມື້ນ ີ້ມີຄຳຖາມ ຝາກມານຳ ຝາກຖາມວ່າ ໃນຣາຍ ການປວັຕສາຕຣ໌ ລາວນັ້ນ ທ່ານມີແຈກໃຫ້ຜູ້ຟັງບໍ່? ຖ້າມີ ຂໍຄວາມກະຣຸນາ ສົ່ງໄປໃຫ້ແດ່ ເພາະຈະໄດ້ເກັບໄວ້ເພື່ອສຶກສາ. ແລະຢາກຂໍນາມບັດ Maysoly ແດ່ ເພາະ ທີ່ສົ່ງໄປໃຫ້ນັ້ນ ບໍ່ຮູ້ວ່າເອົາໄປໄວ້ໃສ ຫາບໍ່ພົບ. ນອກຈາກນີ້ແລ້ວ ຂໍຟັງເພັງລາວນຳເພັງນຶ່ງ ຄືເພັງທີ່ມີຊື່ວ່າ “ໜາວໝອກເມືອງເໜືອ” ຂອງທ່ານ ກ.ວິເສດ.”

Maysoly ຂໍຂອບໃຈ ນຳທ່ານສຸທັດ ທີ່ໃຫ້ຄວາມສົນໃຈ ໃນຣາຍການຂອງ RFA ຕລອດມາ ຕໍ່ຄຳຖາມ ຂອງທ່ານທີ່ເວົ້າມານັ້ນ Maysoly ຂໍສແດງຄວາມເສັຽໃຈ ເນື່ອງຈາກວ່າ ທາງພວກເຮົາ ຍັງບໍ່ທັນກະຕຽມ ໂຄງການ ເພື່ອແຈກຢາຍ ຣາຍການປວັຕສາຕຣ໌ລາວ ໃຫ້ຜູ້ຟັງເທື່ອ ແຕ່ເຖີງຢ່າງໃດກໍຕາມ ທ່ານ ກໍສາມາດ ເຂົ້າໄປພິມຣາຍການ ປວັຕສາຕຣ໌ລາວ ຈາກທາງ Website ຂອງ ພວກເຮົາໄດ້ທຸກເວລາ ພາຍຫຼັງ ອອກອາກາດ ແລ້ວ ຣາຍການນີ້ກໍຈະຖຶກບັນທຶກ ຕີພິມໄວ້ໃນ Website. ຣາຍລະອຽດຕ່າງໆ ກ່ຽວກັບ ວິທີເຂົ້າຢ້ຽມຊົມ Website ຂອງພວກເຮົານັ້ນ Maysoly ຈະໃຫ້ທ່ານຜູ້ຟັງ ໄດ້ຟັງຫຼັງຈາກ ຕອບຈມ. ຂອງຜູ້ຟັງ ອີກທ່ານນຶ່ງ ຂໍໃຫ້ອົດໃຈລໍຖ້າກໍແລ້ວກັນ ສ່ວນເພັງຕາມ ຄຳຂໍນັ້ນ ກໍຍິນດີ ຈັດໃຫ້ໃນ ທ້າຍຣາຍການ. ຫວັງວ່າທ່ານສຸທັດ ຄົງບໍ່ໃຈຮ້ອນເກີນໄປຕິເນາະ ຫວັງວ່າ ໂອກາດໜ້າ ທ່ານຈະຂຽນ ຈມ. ມາເຖີງ ຣາຍການ ຂອງພວກເຮົາອີກ.

ຈົດໝາຍສບັບຕໍ່ໄປກໍຄືຂອງນ້ອງ “ອາລັນ” ຂຽນຈາກປະເທດລາວ ນ້ອງອາລັນບອກວ່າ:

“ໄດ້ຕິດຕາມ ຮັບຟັງຣາຍາການຂອງ RFA ຕລອດມາ ແລະ ຈຸດປະສົງ ທີ່ຂຽນມາຮ່ວມໃນມື້ນີ້ ກໍເພາະ ຢາກໄດ້ທີ່ຢູ່ທາງ Internet ຂອງ RFA ເພາະແຕ່ລະເທື່ອນ້ອງຈົດນຳບໍ່ທັນ ເພາະ ເພີ່ນເວົ້າເທື່ອດຽວ ຟັງບໍ່ທັນ ບາງມື້ກໍບໍ່ບອກ ສນັ້ນ ຖ້າເປັນໄປໄດ້ຢາກຂໍໃຫ້ຕິດຕໍ່ຫາແດ່ ຕາມເບີໂທຣະສັບທີ່ບອກມານີ້ ສຸດທ້າຍນີ້ຂໍໃຫ້ທາງສຖານີທຸກໆ ຄົນຈົ່ງມີສຸຂພາບແຂງແຮງ”.

Maysoly ຂໍຂອບໃຈ ນຳນ້ອງອາລັນທີ່ອົດສາຂຽນ ຈມ.ມາເຖີງ ພວກເຮົາຍ້ອນຢາກໄດ້ທີ່ຢູ່. ຢ່າງໃດກໍຕາມ ເພື່ອໃຫ້ນ້ອງ ອາລັນ ແລະ ຜູ້ຟັງຫຼາຍໆ ທ່ານໄດ້ຮູ້ຈັກທີ່ຢູ່ Address ຂອງພວກເຮົາ ຫຼືຮູ້ຈັກວິທີເຂົ້າຊົມ Website ຂອງ RFA.

ທ່ານຜູ້ຟັງທີ່ເຄົາຣົບ ເພື່ອຊ່ວຍປັບປຸງຣາຍການຂອງພວກເຮົາໃຫ້ດີຂຶ້ນ ກະຣຸນາສົ່ງຈມ. ເຖິງພວກເຮົາ ໄດ້ທຸກເວລາຕາມທີ່ຢູ່ດັ່ງນີ້:

ວິທຍຸເອເຊັຽເສຣີ ຜແນກພາສາລາວ ຕູ້ ປ.ນ. 1487 ທີ່ທຳການ ໄປສະນີນານາ ບາງກອກ 10112 ປະເທດໄທ

ຫຼືທ່ານຈະສົ່ງໂດຍຕົຼງໄປຍັງສຳນັກງານໃຫຍ່ດັ່ງນີ້:

Radio Free Asia Lao Service 2025 M Street, N.W. Suite 300 Washington, DC 20036 U.S.A.

ສຳລັບ ທ່ານທີ່ໃຊ້ຣະບົບ Internet ຈະ E-mail ຫາພວກເຮົາ ໄດ້ທຸກເວລາທີ່ www.Lao@rfa.org ແລະ ທ່ານ ສາມາດ ຮັບຟັງຣາຍການ ຂອງພວກເຮົາ ໄດ້ທາງ Internet ຕາມທີ່ຢູ່ດັ່ງນີ້: www.rfa.org/lao ຫຼັງຈາກ ທີ່ຕີທີ່ຢູ່ດັ່ງກ່າວ ນີ້ແລ້ວ ທ່ານກໍຈະເຫັນ ຄຳແນະນຳ ໄປເປັນຂັ້ນຕອນ ຣາຍການປະຈຳວັນທີ່ບັນທຶກໄວ້ໃນ Internet ທັງພາກເຊົ້າ ແລະ ພາກແລງ ມີຢູ່ປະມານ 2 ອາທິດດ້ວຍກັນ. ນອກຈາກນັ້ນ ທ່ານກໍຍັງ ສາມາດຕິດຕາມ ອ່ານແລະຮັບຟັງຂ່າວສານ, ສາຣະ ຄະດີ,ການບັນເທີງ ແລະ ຣາຍການ ອື່ນໆ ຈາກ Website ຂອງເຮົາໄດ້ຕລອດ 24 ຊົ່ວໂມງນຳອີກ ໂດຍເຂົ້າໄປຫາ www.rfa.org/lao ແລ້ວ click ເອົາຣາຍການຕາມວັນ ແລະ ເວລາ ຊຶ່ງທ່ານຕ້ອງການ... ຂອບໃຈ.

ທ່ານຜູ້ຟັງທີ່ເຄົາຣົບ ບັດນີ້ ກໍຂໍເຊີນທ່ານ ກັບຄືນສູ່ຣາຍການ ຕອບຈມ.ອີກເທື່ອນຶ່ງ ສບັບຕໍ່ໄປ ກໍຄືຂອງທ່ານ”ດວງດີ ວົງດາຣາ”. ຂຽນຈາກເມືອງ Chico ຣັຖ California ໃນຈມ.ຂຽນມາ ດັ່ງນີ້:

“ເມື່ອບໍ່ນານມານີ້ ຂ້າພະເຈົ້າໄດ້ຍິນຂ່າວ ກ່ຽວກັບ ການປຸ້ນຈີ້ ແລະ ມີການຄ້າໂສເພນີ ຫຼາຍຂຶ້ນ ໃນສປປ.ລາວ ສນັ້ນ ຂ້າພະເຈົ້າ ໃນນາມຄົນລາວ ຜູ້ນຶ່ງກໍຢາກຂໍອອກຄວາມຄິດ ຄວາມເຫັນ ສ່ວນຕົວດັ່ງນີ້: ປະຊາຊົນລາວ ຕົກທຸກໄດ້ຍາກ ກໍເກີດຈາກ ການບໍ່ກ້ຳເກີ່ງ ຂອງຣັຖບານນັ້ນເອງ ຂ້າພເຈົ້າ ຄິດວ່າ ຖ້າຢາກໃຫ້ ປະຊາຊົນລາວ ພົ້ນຈາກ ຄວາມທຸກຍາກ ເພື່ອກຸ້ມຕົວເອງ ຣັຖບານລາວ ຄວນມີການປ່ຽນ ຣະບອບການ ປົກຄອງ. ສຸດທ້າຍ ຂໍອວຍພອນ ໃຫ້ສຖານີວິທຍຸເອເຊັຽເສຣີ ຈົ່ງປະສົບ ແຕ່ຄວາມສຸຂສບາຍ”.

Maysoly ຂໍຂອບໃຈ ນຳທ່ານດວງດີ ທີ່ໃຫ້ຄວາມຄິດ ຄວາມເຫັນ ໃນລັກສນະ ສ່ວນຕົວມາໃຫ້ ປັດຈຸບັນນີ້ ທາງຣັຖບານລາວ ກໍບອກວ່າ ກຳລັງດຳເນີນ ຫາວິທີແກ້ໄຂ ຄວາມຍາກຈົນ ຂອງປະຊາຊົນຢູ່ ແຕ່ ທີ່ສຳຄັນ ກໍຄືຍັງຂາດເຂີນ ງົປມານ ຢູ່ນັ້ນແຫຼະ. ທ່ານຜູ້ຟັງທີ່ເຄົາຣົບ ພໍເວົ້າມາເຖິງຕອນນີ້ ເວລາ ແຫ່ງ ຣາຍການຕອບຈມ. ກໍ່ໃກ້ຈະໝົດລົງແລ້ວ ສນັ້ນ ເພັງທ້າຍຣາຍການ ຂອງພວກເຮົາ ມື້ນີ້ມີຊື່ວ່າ “ໜາວໝອກເມືອງເໜືອ” ຜົນງານຂອງທ່ານ “ກ.ວິເສດ” ເພັງນີ້ຈັດຕາມຄຳຂໍຂອງທ່ານສຸທັດ ຊັບພູ່ ຫວັງວ່າ ເຈົ້າຂອງ ຜູ້ຂໍເພັງຄົງຈະກຳລັງ ຕິດຕາມຮັບຟັງຢູ່. ພ້ອມດຽວກັນນີ້ Maysoly ກໍຂໍມອບເປັນພິເສດໃຫ້ແກ່ທຸກໆ ທ່ານທີ່ກຳລັງຕິດຕາມຮັບຟັງຣາຍການຕອບຈມ.ຂອງ RFA ຢູ່ ໂດຍສະເພາະກໍຄືແຟນເພັງຂອງທ່ານ “ກ.ວິເສດ” ນັກຮ້ອງ ຊື່ດັງບໍ່ວ່າ ທັງໃນອາດີດ ແລະ ປັດຈຸບັນ ເຊີນຮັບຟັງໄດ້.

-----------(ເພັງ)-----------

ນັ້ນກໍຄືເພັງ “ໜາວໝອກເມືອງເໜືອ” ຂອງທ່ານ “ກ.ວິເສດ” ຫວັງວ່າ ທ່ານຄົງ ຈະໄດ້ຮັບ ຄວາມມ່ວນຊື່ນ ຈາກສຽງເພັງນີ້ບໍ່ຫຼາຍກໍໜ້ອຍ. ບັດນີ້ Maysoly ກໍຂໍອຳລາທ່ານຜູ້ຟັງໄປກ່ອນ ພົບກັນໃໝ່ໃນວັນພະຫັດໜ້າ.

ສະບາຍດີ.

• ຟັງສຽງ
• Download story audio