ວັນທີ 3 ເດືອນ ມົກກະຣາ ປີ 2007

ສະບາຍດີ ທ່ານຜູ້ຟັງທີ່ເຄົາຣົບ ມື້ນີ້ໄມສຸລີ ກໍໄດ້ກັບມາຮັບໜ້າທີ່ຕອບຈມ. ຂອງທ່ານຜູ້ຟັງອີກ ຕາມປົກຕິ ຫວັງໃຈ ເປັນຢ່າງຍິ່ງ ວ່າທ່ານທີ່ເປັນແຟນ ຂອງລາຍການນີ້ ກໍຄົງ ຈະກຳລັງ ໃຫ້ກຽດ ຕິດຕາມຮັບຟັງ ຢູ່ຕິເນາະ. ເປັນຢ່າງໃດ ທ່ານຜູ້ຟັງທີ່ເຄົາຣົບ ປີ 2006 ກໍຜ່ານພົ້ນໄປແລ້ວເນາະ ນັ່ນ ກໍໝາຍຄວາມ ວ່າ ອາຍຸ ສັງຂານ ຂອງພວກເຮົາກໍເສັຽໄປ ແລ້ວອີກນຶ່ງປີ. ຢ່າງໃດກໍຕາມ ໄມສຸລີ ຫວັງໃຈສເມີວ່າ ທ່ານຜູ້ຟັງທຸກໆ ທ່ານ ຄົງຈະມີຄວາມມ່ວນຊື່ນ ຢ່າງສົມໃຈ ໃນວັນສລອງ ປີໃໝ ່ໄປຕາມໆ ກັນເນາະ. ປີນີ້ປາກົດວ່າ ຢູ່ຕາມ ປະເທດລາວ ແລະ ໄທ ກໍມີການ ສເລີມສລອງ ປີໃໝ ່ສາກົນ ຢ່າງຄຶກຄື້ນ ເປັນພິເສດ ຈົນພາ ໃຫ້ມີ ຜູ້ເສັຍຊີວິດ ຈຳນວນຫຼວງຫຼາຍ ຍ້ອນອຸບັດຕິເຫດ ເອົາຫຼະ ເພື່ອບໍ່ໃຫ້ເສັຽເວລາ ບັດນີ້ ໄມສຸລີ ຂໍເຊີນທ່ານເຂົ້າສູ່ລາຍການເລີຽ.

ຈມ.ສບັບທຳອິດໃນມື້ນີ້ກໍ່ໄດ້ຮັບຈາກທ່ານ “ຈັນທະກຸມມານ” ເພີ່ນຂຽນມາວ່າ:

“ສບາຍດີເອເຊັຽເສຣີ ຕິດຕາມຂ່າວມາຕລອດ ແຕ່ມີຄຳຖາມເລັກນ້ອຍ ຫວັງວ່າ ຄົງຈະບໍ່ ເປັນການ ຣົບກວນ ຜິດພາດ ຊ່ວຍອະໂຫສິກັມ ຄຳຖາມມີຢູ່ວ່າ: ເທົ່າທີ່ຕິດຕາມ ອ່ານຂ່າວ ສານຈາກສຽງເສຣີມາ ກໍພົບເຫັນ ວ່າ ຄຳເວົ້າ ບາງຄຳນັ້ນ ເປັນຄຳເວົ້າຂອງພາສາ ປະເທດ ເພື່ອນບ້ານ ແລະ ການສະກົດຕົວອັກສອນນັ້ນ ກໍເຫັນວ່າມີ. ເຖິງຢ່າງໃດ ກໍຂໍແຮງໃຈຕອບຄືນມາດ້ວຍ ໂຊກດີປີໃໝ່ສາກົນ 2007.”

ໄມສຸລີ ຂໍຂອບໃຈນຳທ່ານ “ຈັນທະກຸມມານ” ທີ່ໄດ້ສລະເວລາ ສົ່ງຄຳຕິຕຽນ ມາໃຫ້ ສິ່ງທີ່ທ່ານ ເວົ້າມານັ້ນ ພວກເຮົາ ຄນະຈັດທຳ ລາຍການ ກໍຈະ ພຍາຍາມ ໃຫ້ຄວາມຣະມັດ ຣະວັງ ຫຼາຍກວ່າເກົ່າ. ແລະ ກໍຢາກ ຈະບອກ ໃຫ້ທ່ານອີກວ່າ ນັບແຕ່ນີ້ ຕໍ່ໄປຂ້າງໜ້າ ຖ້າທ່ານມີຄຳຕິຊົມ ແນວໃດ ຂໍໃຫ້ຢ່າເກັບໄວ້ ໃນໃຈເລີຽ ທາງ ວິທຍຸເອເຊັຽເສຣີ ຍິນດີຮັບຟັງ ແລະ ກໍບໍ່ເຄີຽ ຖືວ່າເປັນການຣົບ ກວນດອກ ຕົງກັນຂ້າມ ພວກເຮົາ ຂໍສັນຣະເສີນ ໃນຄຳຕິຊົມ ແບບກົງໄປກົງມາ ຂອງທ່ານ ທັ້ງນີ້ ກໍເພື່ອໃຫ້ພວກເຮົາ ໝົດທຸກຄົນ ໄດ້ມີໂອກາດ ປັບປຸງ-ແກ້ໄຂ ແລະ ເສີມສ້າງຈາກສິ່ງທີ່ຍັງບົກພ່ອງ. ຫວັງວ່າໂອກາດໜ້າ ຄົງຈະໄດ້ຮັບຈມ.ຈາກທ່ານອີກ.

ຈມ. ສບັບຕໍ່ໄປ ແມ່ນຈມ.ອວຍພອນປີໃໝ່ 2007 ຈາກ ”ອົງການ ສະພາຮ່ວມຊາດລາວ ເພື່ອ ປະຊາ ທິປະໄຕ” ທີ່ປະເທດຝຣັ່ງເສດ ໃນຈມ.ເພີ່ນຂຽນມາດັ່ງນີ້: “ໂຊກສະບາຍປີໃໝ່ 2007 ພວກ ຂ້າພະເຈົ້າ ປະທານ ແລະ ສມາຊິກ ທຸກປະເພດ ຂອງສະພາຮ່ວມຊາດລາວ ເພື່ອປະຊາທິປະໄຕ ພ້ອມດ້ວຍ ບັນດາ ຜູ້ຮັກຊາດ ທີ່ສູ້ຊົນດ້ວຍສັນຕິວິທີ ເພື່ອຄວາມເປັນລາວ ຄວາມຮັກແພງ ສາມັກຄ ີຣະຫວ່າງ ພີ່ນ້ອງລາວ ທັ້ງຢູ່ໃນ ແລະ ນອກປະເທດ ທີ່ມີຢູ່ແລ້ວ ໃຫ້ເພີ່ມທະວີຄູນ ໃຫ້ເປັນເອກພາບ ຢູ່ໃນ ວົງສາຄະນາຍາດ ດຽວກັນ ໂດຍ ຖືເອົາວ່າ ປະເທດລາວ ເປັນຂອງຄົນລາວ ທຸກຖ້ວນໜ້າ ບໍ່ໄຈ້ແຍກ ເຊື້ອຊັ້ນ ວັນນະ ແລະ ການເຊື່ອຖື ຂໍອວຍພອນ ຊັຍອັນປະເສີດ ແດ່ທ່ານ ພ້ອມດ້ວຍຄອບຄົວ ແລະ ຍາດມິຕ ຈົ່ງປະສົບແຕ່ຄວາມ ສຸກກາຍ ສະບາຍໃຈ ປຣາຖນາສົ່ງໃດ ທີ່ເປັນທັມ ກໍຂໍໃຫ້ ໄດ້ດັ່ງສົມມະໂນນຶກ ຕລອດປີ 2007 ນີ້ເທີ້ນ.”

ຈມ.ສບັບຕໍ່ໄປ ກໍຄືຂອງນ້ອງ “ໜຸ່ມນ້ຳຄານ” ຈາກເມືອງຊຽງພໍ້ ຣັດມິນິໂຊຕ້າ ໃນຈມ.ບອກ ວ່າ ສບັບນີ້ ເປັນ ສບັບທຳອິດ ທີ່ຂຽນມາຮ່ວມ ແລະ ກໍຈະພຍາຍາມ ຂຽນສັ້ນທີ່ສຸດ ໃນຈມ.ນ້ອງ ນ້ຳຄານ ໄດ້ບອກເລົ່າມາ ວ່າ: “ເມື່ອບໍ່ນານມານີ້ ໄດ້ມີໂອກາດ ໄດ້ເດີນທາງ ກັບໄປຢ້ຽມຢາມລາວ ພ້ອມດ້ວຍ ນ້ອງສາວ 3 ຄົນ ເມື່ອ ເດີນທາງ ເຖິງສນາມບິນ ວຽງຈັນ ກໍຖຶກເຈົ້າໜ້າ ທີ່ລາວ ທີ່ທຳໜ້າ ທີ່ກວດກາ passport ຖາມ ນ້ອງສາວ 3 ຄົນນັ້ນວ່າ ມາຢາມບ້ານເບາະ? ແຕ່ພໍມາເຖີງນ້ອງ ເພີ່ນຊ້ຳພັດຖາມວ່າ ມາທ່ຽວເມືອງລາວເບາະ? ອັນນີ້ ກໍຄືຂໍ້ຂ້ອງໃຈ ຂອງນ້ອງ ຊ່ວຍຕອບໃຫ້ແດ່.”

ຂໍຂອບໃຈ ທີ່ນ້ອງໄດ້ຂຽນຈມ. ມາຮ່ວມລາຍການ ນີ້ເປັນເທື່ອທຳອິດ ແລະ ຫວັງວ່າ ຄົງຈະບໍ່ແມ່ນ ເທື່ອສຸດທ້າຍເນາະ. ຄຳຖາມທີ່ນ້ອງເວົ້າມານັ້ນ ເມື່ອຟັງເບີ່ງແລ້ວ ກໍບໍ່ເຫັນວ່າ ມີຫຍັງ ຜິດປົກະຕິໃດ. ນ້ອງອາດ ຈະຄິດຫຼາຍເກີນໄປ ກໍເປັນໄດ້ ຄຳວ່າ ມາຢາມບ້ານ ຫຼືມາທ່ຽວເມືອງລາວເບາະ? ອັນນີ້ ກໍເປັນ ຄຳສຸພາບ ທີ່ຄົນລາວ ເຮົາມັກເວົ້າກັນຢູ່ເລື້ອຍໆ ຂໍໃຫ້ນ້ອງຈົ່ງທຳຈິດໃຈ ໃຫ້ສບາຍ ກໍແລ້ວກັນ.

ທ່ານ ຜູ້ຟັງທີ່ເຄົາຣົບ ພໍເວົ້າມາເຖິງຕອນນີ້ ຄິດວ່າເວລາ ແຫ່ງລາຍການຕອບຈມ. ກໍໃກ້ຈະໝົດລົງ ແລ້ວ ສະນັ້ນ ເພື່ອບໍ່ເສັຽເວລາ ກໍຂໍເຊີນທ່ານຟັງ ເພັງທ້າຍລາຍການຂອງພວກເຮົາໄດ້ເລີຽ ໃນເພັງ ທີ່ມີຊື່ວ່າ “ປີໃໝ່ແລ້ວແກ້ວຕາ” ຄິດວ່າຄົງ ສິບໍ່ລ້າບໍ່ສວາຍເກີນໄປ ຕິເນາະຖ້າ ໄມສຸລີອວຍພອນປີໃໝ່ ໃຫ້ທຸກໆ ທ່ານ ເນື່ອງຈາກສັປດາຜ່ານມາ ໄມສຸລ ີບໍ່ໄດ້ມາ ຈັດລາຍການ ຢ່າງໃດກໍຕາມ ໃນວາຣະວັນຂຶ້ນປີໃໝ ່ສາກົນ 2007 ທີ່ຫາກໍ່ຜ່ານໄປນັ້ນ ໄມສຸລີ ພ້ອມດ້ວຍຄນະທີມງານ ວິທຍຸເອເຊັຽເສຣີ ຂໍນ້ອມອວຍຊັຍ ໃຫ້ພອນ ແດ່ທ່ານ ຜູ້ຟັງທຸກໆ ທ່ານ ໂດຍສະເພາະທ່ານ ທີ່ເປັນແຟນລາຍການ ຕອບຈົດໝາຍ ຂໍໃຫ້ທຸກໆ ທ່ານ ຈົ່ງປະສົບແຕ່ ຄວາມສຸກຄວາມຈເຣີນ ປາສຈາກພຍາດໂຣຄາ ຈາກເຄາະເຂັນມານຮ້າຍ ສິ່ງໃດ ທີ່ ່ທ່ານປາຖນາ ໃນຊີວິດ ຂໍໃຫ້ສົ່ງນັ້ນ ຈົ່ງສຳເຣັດ ຕາມເປົ້າໝາຍ ແລະ ຂໍໃຫ້ມີຄວາມຈເຣີນກ້າວໜ້າ ທາງດ້ານ ການງານ ຈົ່ງບັງເກີດແກ່ ທ່ານຕລອດໄປ ເຊີນທ່ານຮັບຟັງເພັງໄດ້ເລີຽ.

( ເພັງ ປະກອບ ໃນຣາຍການ )

ທີ່ຈົບລົງໄປນັ້ນຄືເພັງ “ປີໃໝ່ແລ້ວແກ້ວຕາ” ທ່ານຜູ້ຟັງທີ່ເຄົາຣົບ ເປັນອັນວ່າລາຍການຕອບຈມ.ໃນມື້ນີ້ ເວລາກໍໝົດລົງພຽງເທົ່ານີ້ ໄມສຸລີ ຂໍເຊີນທ່ານທີ່ສົນໃຈ ຈົ່ງຕິດຕາມຮັບຟັງໄດ້ໃໝ່ ໃນສັປດາໜ້າ ສະບາຍ ດີປີໃໝ່.

ສເນີທ່ານ ໂດຍ: ໄມສຸຣີ

• ຟັງສຽງ
• Download story audio