ວັນທີ 10 ເດືອນ ມົກະຣາ ປີ 2007
2007.01.10
ສະບາຍດີທ່ານຜູ້ຟັງທີ່ເຄົາຣົບ ມື້ນີ້ວັນເວລາແຫ່ງລາຍການ ຕອບຈມ. ຂອງພວກທ່ານ ກໍໄດ້ວຽນມາ ຄົບຮອບອີກເທື່ອນຶ່ງ. ໄມສຸລີຫວັງໃຈເປັນຢ່າງຍີ່ງວ່າ ທ່ານທີ່ເປັນແຟນ ຂອງລາຍການນີ້ ຄົງຈະກຳລັງໃຫ້ກຽດ ຕິດຕາມຮັບຟັງຢູ່ ເອົາຫຼະ ເພື່ອບໍ່ເປັນການ ເສັຽເວລາ ໄມສຸລີ ຂໍເຊີນທ່ານ ເຂົ້າສູ່ລາຍການ ເລີຽເນາະ.
ຈມ.ສບັບທຳອິດ ທີ່ສົ່ງເຂົ້າມາຮ່ວມ ໃນລາຍການ ຂອງພວກເຮົາ ໃນມື້ນີ້ກໍແມ່ນ ຈມ.ຂອງ”ເພື່ອນດົງໂດກ” ເພີ່ນໄດ້ຂຽນມາວ່າ:
“ສະບາຍດີ ຄນະຈັດທຳລາຍການ ຕອບຈມ.ທີ່ວິທຍຸເອເຊັຽເສຣີ ຂ້າພະເຈົ້າ ເປັນຜູ້ນຶ່ງທີ່ຕິດຕາມ ຮັບຟັງລາຍການ ຂອງພວກທ່ານ ເປັນປະຈຳໆ ເໝືອນກັບວ່າ ພວກເຮົາຢູ່ ເມືອງລາວ ໃນສມັຍ ກ່ອນພູ້ນ. ເພາະວ່າທາງສຖານີ ຂອງພວກທ່ານ ໄດ້ນຳເອົາເພັງ ແລະ ສຽງນັກຮ້ອງລາວ ໃນອດີດ ຂອງພຣະຣາຊອານາຈັກລາວ ມາອອກ ອາກາດເປັນປະຈຳ ຢ່າງໃດກໍຕາມ ເນື່ອງໃນ ວາຣະຂຶ້ນປີໃໝ່ ສາກົນ ປີ 2007 ນີ້ ຂໍອວຍພອນໃຫ້ ດວງວິນຍານ ຂອງເພື່ອນຮ່ວມຊາດ ແລະ ພີ່ນ້ອງລາວ ນັບແຕ່ຜູ້ນ້ອຍ ເຖິງຜູ້ໃຫຍ ່ຜູ້ທີ່ລ່ວງລັບໄປ ແລ້ວນັ້ນ ໂດຍສະເພາະ ກໍຄືດວງວິນຍານ ຂອງເຈົ້າອະນຸວົງ ຫຼື ດອກເຕີ້ສົມອົກ ແລະ ຍານາງອຸໄລວັນ ສີຫາຣາດ ທີ່ຖຶກຄາຕກັມ ທີ່ເມືອງໜອງຄາຍ ເມື່ອວັນທີ 18 ມົກຣາ ທີ່ຜ່ານມາ ຈົ່ງໄປສູ່ ສຸຂຄຕິເທິ້ນ. ແລະ ພ້ອມກັນນີ້ ກໍຂໍອວຍພອນໃຫ ້ຄນະຈັດທຳລາຍ ການຂອງ RFA. ຈົ່ງດຳເນີນໜ້າທີ່ ວຽກງານ ຕໍ່ໄປຢ່າງຍືນຍົງຄົງຕົວ ຄຽງຄູ່ກັບພີ່ນ້ອງລາວ ທັງພາຍໃນ ແລະ ຕ່າງປະເທດ ຕລອດໄປ.”
ໄມສຸລີ ຂໍຂອບໃຈ ນຳເພື່ອນດົງໂດກ ພວກເຮົາຄນະຜູ້ຈັດລາຍການ ກໍຂໍອວຍພອນໃຫ້ທ່ານ ຈົ່ງໂຊກດີ ເຊັ່ນດຽວກັນ ໃນວາຣະປີໃໝ່ 2007 ນີ້.
ຈມ.ສບັບຕໍ່ໄປ ກໍແມ່ນ ຈມ.ອວຍພອນປີໃໝ່ ອີກສບັບນຶ່ງ ຂຽນຈາກ ທ່ານ”ຈົ່ງຢີ່ວາງ” ທີ່ເມືອງ ເມວ ວົກກີ້ ຣັຖ ວິສຄອນເຊັນ ເພີ່ນບອກວ່າ ປີເກົ່າ 2006 ກໍໄດ່ຜ່ານພົ້ນໄປ ແລ້ວ ຂໍໃຫ້ໂຣກພັຍໄຂ້ ເຈັບ ຫຼືສິ່ງທີ່ຄົນລາວ ທົ່ວໂລກ ບໍ່ເພີ່ງປາຖນາ ຈົ່ງໝົດໄປຕາມປີເກົ່າ ປີ 2007 ນີ້ ຂໍໃຫ້ຊົນຊາດລາວ ຈົ່ງມີຄວາມຮັກແພງ ຖຶກຕ້ອງ ປອງດອງກັນ ເພື່ອຊ່ວຍກັນ ສ້າງສາພັທນາ ໃຫ້ປະເທດລາວ ເປັນປະເທດ ທີ່ຈະເຣີນກ້າວໜ້າເໝືອນ ກັບປະເທດທີ່ມີ ຄວາມສີວິໄລ ໃນໂລກ ໃນຈມ.ຂອງທ່ານ ຍັງໄດ້ສົ່ງຂໍ້ ຄິດເຫັນກ່ຽວກັບ ບັນຫາພີ່ນ້ອງມົ້ງທີ່ ບ້ານຫ້ວຍນ້ຳຂາວ ທີ່ບອກວ່າ ບໍ່ຢາກກັບໄປລາວ ຍ້ອນຢ້ານວ່າ ຈະບໍ່ມີຄວາມປອດພັຍ ນັ້ນ ຂ້າພະເຈົ້າໃນ ນາມສ່ວນຕົວ ຄິດວ່າ ຖ້າທາງການລາວ ຫາກມີຄວາມຈິງໃຈ ຕ້ອນຮັບ ເອົາພີ່ນ້ອງຊາວມົ້ງ ຫ້ວຍ ນ້ຳຂາວກັບໄປ ລາວເພື່ອໃຫ້ພວກເພີ່ນ ມີທີ່ພັກພາອາສັຍ ທຳມາຫາກິນ ເປັນຫຼັກເປັນແຫຼ່ງ ດັ່ງທີ່ເພີ່ນໄດ້ປະກາດໄປແລ້ວ ນັ້ນແທ້ ຢ່າວ່າແຕ່ອົພຍົບເມືອງ ຫ້ວຍນ້ຳຂາວເລີຽ ຄືດວ່າພວກທີ່ຢູ່ຕ່າງປະເທດ ຫຼາຍໆ ຄົນກໍຢາກຈະກັບລາວ ເຊັ່ນດຽວກັນ.
ນັ່ນກໍຄືຂໍ້ຄິດເຫັນ ສ່ວນນຶ່ງ ຂອງທ່ານຈົ່ງຢີ່ວາງ. ຈມ.ສບັບຕໍ່ໄປ ກະແມ່ນ ຂອງທ່ານ”ອດີດສິດພຣະແກ້ວ” ໃນຈມ.ເພີ່ນຂຽນມາດັ່ງນີ້:
“ສະບາຍດີໄມສຸລີທີ່ຮັກແພງ ແລະ ນັບຖືຢ່າງສູງ ປີໃໝ່ຟ້າໃໝ່ ຫາກໍ່ສເລີມສສອງກັນ ຜ່ານພົ້ນໄປນີ້ເອງ ແລະປີໃໝ່ ຫາກໍ່ຍ່າງເຂົ້າມາ ຫວັງສເມີວ່າ ໄມສຸລີ ແລະ RFA. ທຸກໆ ທ່ານ ຍັງຄົງ ສະບາຍດີ ເຊັ່ນເຄີຽ ປີໃໝ່ເຂົ້າມາ ສິ່ງໃໝ່ດີໆ ກໍຈະເຂົ້າມາ ເຊັ່ນກັນ ວັນນີ້ຂ້າພະເຈົ້າ ເອງໄດ້ ຍິນຂ່າວ ໃໝ່ໆ ແລະ ບໍ່ເຄີຽຄິດ ວ່າ ຈະໄດ້ຍິນ ເຊັ່ນນີ້ອີກ. RFA. ສເນີຂ່າວວ່າ ປັດຈຸບັນ ຢູ່ໃນລາວ ມີທະຫານວຽດນາມ ເຖິງ 6 ກອງພັນ ແລະ ສາມາດສົ່ງມາ ເພີ້ມໄດ້ ທຸກເວລາ ຖ້າຫາກ ມີສຖານະການ ເກີດຂຶ້ນ ຈາກຂ່າວນີ້ ຂ້າພະເຈົ້າໃນນາມຄົນລາວ ຄົນນຶ່ງ ເຖິງຈະຢູ່ນອກແຜ່ນດິນລາວ ແຕ່ກໍມີຄວາມເປັນລາວ ຄິດເຖີງ ແລະ ຮັກແຜ່ນດິນລາວ ຢູ່ສເມີ, ຂ້າພະເຈົ້າ ບໍ່ເຂົ້າໃຈວ່າ ເປັນຫຍັງຣັຖບານ ສປປ.ລາວ ຈຶ່ງອນຸຍາດ ໃຫ້ທະຫານວຽດນາມ ມາຢູ່ໃນ ແຜ່ນດິນລາວ ໂດຍອີງຕາມສັນຍາປີ 1954, 62 ແລະ 73 ວ່າດ້ວຍ ທະຫານຕ່າງຊາດ ຕ້ອງຖອນອອກຈາກດິນລາວໃຫ້ໝົດ ສ້າງລາວໃຫ້ເປັນປະເທດ ເອກຣາຊ ປະຊາທິປະໄຕ ແລະ ມີສັນຕິພາບ ອັນແທ້ຈິງ ແກ່ປວງຊົນຊາວລາວທັງຊາດ ນີ້ບໍກັບຄຳວ່າ ຣັຖບານສປປ.ລາວ ສລາດສ່ອງໃສ ຮັກຊາດລາວ ແລະ ຄົນທັ້ງຊາດ ຍ້ອນເຫດການ ນີ້ເອງ ຊາວລາວເຮົາ ຈຶ່ງຕົກຣະກຳລຳບາກ ພັດພາກ ຈາກຄອບຄົວ ແລະ ຜືນແຜ່ນດິນ ບ່ອນໃຫ້ກຳເນີດ ແຍກຢາຍກັນໄປທົ່ວ ທຸກມຸມໂລກ. ເວລາຜ່ານມາໄດ້ 31 ປີແລ້ວ, ຂ້າພະເຈົ້າ ຫວັງເປັນຢ່າງຍິ່ງວ່າ ບັນດາ ທ່ານຄົງຈະຄິດ ເຫັນຄວາມເປັນລາວ ແລະ ໃຫ້ຊາດລາວ ເປັນປະເທດ ເອກຣາຊ ປະຊາທິປະໄຕ ເປັນຂອງຄົນລາວ ຢ່າງແທ້ຈິງ. ເຖິງເວລາແລ້ວ ທີ່ລາວນອກລາວໃນ ຄວນຈະຈັບມືຖືແຂນ ສ້າງຄວາມເປັນລາວ ຂອງເຮົາ ເພື່ອລູກລາວ ຫຼານລາວ ຈະໄດ້ມີແຜ່ນດິນລາວ ສືບຕໍ່ໄປຊົ່ວ ກາລະນານ. ທ້າຍສຸດຂໍວິ່ງວອນເອົາຄຸນພຣະ ສຣີຣັຕນະໄຕຣ ຈົ່ງດົນບັນດານ ໃຫ້ຊາວລາວທຸກໆ ທ່ານໃນທົ່ວໂລກ ຈົ່ງປະສົບແຕ່ຄວາມສຸກສົມຫວັງທຸກສິ່ງທຸກຢ່າງ ມີອາຍຸວັນນະ ສຸຂະພລະ ຕລອດກາລະນານ ດ້ວຍເທີ້ນ.
ພິເສດຂໍໃຫ້ RFA. ທຸກທ່ານ ຈົ່ງປະສົບ ແຕ່ຄວາມສຳເຣັດ ໃນວຽກງານ ແລະ ຄວາມປາຖນາ ດ້ວຍເທີ້ນ.”
ນັ່ນກໍແມ່ນຈມ.ຂອງທ່ານ “ອດີດສິດພຣະແກ້ວ” ໄມສຸລີ ຂໍໃຫ້ທ່ານ ຈົ່ງປະສົບແຕ່ຄວາມສຸກ ຄວາມສົມຫວັງ ໃນທຸກດ້ານເຊັ່ນດຽວກັນ.
ທ່ານຜູ້ຟັງທີ່ເຄົາຣົບ ພໍເວົ້າມາເຖິງຕອນນີ້ ເວລາແຫ່ງລາຍການຕອບຈມ.ກໍໃກ້ເຂົ້າມາທຸກລະຍະແລ້ວ. ສນັ້ນ ເພື່ອບໍ່ເປັນການເສັຽເວລາ ໄມສຸລີຂໍເຊີນທ່ານຟັງເພັງລາວສມັຍເກົ່າໆ
ເພັງນຶ່ງ ເພັງນີ້ ແມ່ນໄດ້ຮັບ ຈາກທ່ານ ຈຳປາແດງ ທີ່ຣັດອາຄັນຊໍ ສົ່ງມາໃຫ້ ທາງວິທຍຸ ເອເຊັຽເສຣີ ເພື່ອນຳອອກອາກາດ ປະກອບດ້ວຍ ບົດກວີ ຂອງເພີ່ນທີ່ສົ່ງມາ ທີ່ມີຊຶ່ວ່າ “ບຸນຄຸນຄູ” ບົດກະວີ ແລະ ເພັງທີ່ສົ່ງມາໃຫ້ນີ້ ຂໍຝາກ ໃຫ້ຄນະ ອດີດນັກສຶກສາ ຄູອາຈານ ຈາກວິທຍາລັຍ ຄູສວັນນະເຂດ ໂດຍສະເພາະ ກໍແມ່ນສາວຫລັກ 7 ວ່າຊັ້ນ ໃນບົດກະວີເພີ່ນເລີ່ມວ່າ:
ສິດເທີດທູນ ບຸນຄຸນຄູ ; ; ; ; ຜູ້ຍິ່ງໃຫຍ່ ສອນສິດໃຫ້ ກາຍເປັນຄົນ ; ; ; ; ລົ້ນວິຊາ່ ຊີ້ຊ່ອງທາງ ສວ່າງສໄວ ; ; ; ; ໃຫ້ໂລກາ ເສີມປັນຍາ ໃຫ້ຄວາມຮູ້ ; ; ; ; ຄູແສນດີ ຄູສູ້ທົນ ໝັ່ນຝຶກຝົນ ; ; ; ; ທັ້ງຄົ້ນຄວ້າ ສູ້ຜ່ານຜ່າ ອຸປະສັກ ; ; ; ; ມັກເກີດມີ ຫວັງພຽງໄດ້ ເຫັນສິດຕົນ ; ; ; ; ເປັນຄົນດີ ສົມສັກສີ ແມ່ພິມທອງ ; ; ; ; ຂອງຊາດເຮົາ ຄູນັ້ນເປັນເຊັ່ນພໍ່ແມ່ ໃຫ້ແກ່ລູກ ; ; ; ; ສິດພັນຜູກ ປູກອົບຮົມ ບົ່ມນິສັຍ ເພື່ອສິດມີ ອະນາຄົດ ອັນກ້າວໄກ ; ; ; ; ຈະເຣີນສົດໃສ ໃນສັງຄົມ ອຸດົມການ ບຸນຄຸນຄູ ສິດສຳນຶກ ຈາລຶກໄວ້ ; ; ; ; ຢູ່ໃນໃຈ ຂອງທຸກຄົນ ຈົນຊົ່ວກາລ ຄຸນຄວາມດີ ຂອງຄູນີ້ ມີມະຫັນ ; ; ; ; ຕຣາບນິຣັນ ຂໍເທີດທູນບຸນຄຸນຄູ.
------ ເພັງ -------
ທ່ານຜູ້ຟັງທີ່ເຄົາຣົບ ເປັນອັນວ່າ ລາຍການຕອບຈມ. ຂອງພວກເຮົາໃນມື້ນີ້ ເວລາກໍໝົດລົງ ພຽງເທົ່ານີ້ ແລ້ວ ໄມສຸລີ ຕ້ອງຈຳໃຈຈາກລາ ທ່ານຜູ້ຟັງໄປກ່ອນ ພົບກັນໃໝ່ໃນ ວັນພະຫັດໜ້າ, ສະບາຍດີ.
ຈັດສເນີທ່ານ ໂດຍ: ໄມສຸຣີ
ຣາຍການອື່ນໆ
ຕອບຈົດໝາຍສັປະດາຜ່ານມາ
- ວັນທີ 3 ເດືອນ ມົກກະຣາ ປີ 2007
- ວັນທີ 20 ເດືອນ ທັນວາ ປີ 2006
- ວັນທີ 13 ເດືອນ ທັນວາ ປີ 2006
- ວັນທີ 6 ເດືອນ ທັນວາ ປີ 2006
- ວັນທີ 29 ເດືອນ ພຶສະຈິກາ ປີ 2006
- ວັນທີ 22 ເດືອນ ພຶສະຈິກາ ປີ 2006
- ວັນທີ 15 ເດືອນ ພຶສະຈິກາ ປີ 2006
- ວັນທີ 8 ເດືອນ ພຶສະຈິກາ ປີ 2006
- ວັນທີ 1 ເດືອນ ພຶສະຈິກາ ປີ 2006
- ວັນທີ 25 ເດືອນ ຕຸລາ ປີ 2006
- ວັນທີ 18 ເດືອນ ຕຸລາ ປີ 2006
- ວັນທີ 11 ເດືອນ ຕຸລາ ປີ 2006
- ວັນທີ 4 ເດືອນ ຕຸລາ ປີ 2006
- ວັນທີ 27 ເດືອນ ກັນຍາ ປີ 2006
- ວັນທີ 20 ເດືອນ ກັນຍາ ປີ 2006
- ວັນທີ 13 ເດືອນ ກັນຍາ ປີ 2006
- ວັນທີ 6 ເດືອນ ກັນຍາ ປີ 2006
- ວັນທີ 30 ເດືອນ ສິງຫາ ປີ 2006
- ວັນທີ 23 ເດືອນ ສິງຫາ ປີ 2006
- ວັນທີ 16 ເດືອນ ສິງຫາ ປີ 2006
- ວັນທີ 9 ເດືອນ ສິງຫາ ປີ 2006
- ວັນທີ 2 ເດືອນ ສິງຫາ ປີ 2006
- ວັນທີ 26 ເດືອນ ກໍຣະກະດາ ປີ 2006
- ວັນທີ 19 ເດືອນ ກໍຣະກະດາ ປີ 2006
- ວັນທີ 12 ເດືອນ ກໍຣະກະດາ ປີ 2006
ເລື່ອງທີ່ອ່ານຫຼາຍ
RFA
