ວັນທີ 24 ເດືອນ ມົກກະຣາ ປີ 2007

ສະບາຍດີ ທ່ານຜູ້ຟັງ ແລະ ແຟນລາຍການ ຕອບຈມ.ທີ່ເຄົາຣົບ ແລະນັບຖື. ມື້ນີ້ ໄມສຸລ ີກໍໄດ້ກັບມາ ພົບກັບທ່ານ ອີກຕາມເຄີຽ ພາຍຫລັງທີ່ໄດ້ຫ່າງເຫີນ ກັນພຽງນຶ່ງອາທິດ. ຢ່າງໃດກໍຕາມ ໄມສຸລີ ຫວັງໃຈສເມີວ່າ ແຟນ ລາຍການທຸກໆ ທ່ານຄົງຈະສະບາຍດີຕິເນາະ ເອົາລະເພື່ອບໍ່ໃຫ້ ເປັນການເສັຽເວລາ ໄມສຸລີ ຂໍເຊີນທຸກໆ ທ່ານເຂົ້າສູ່ລາຍການ ຕອບຈມ.ໄດ້ເລີຽ.

ຈມ.ສບັບທຳອິດ ທີ່ຈະນຳ ມາອ່ານສູ່ທ່ານຟັງ ໃນມື້ນີ້ ກໍຄືຂອງຜູ້ຟັງທ່ານນຶ່ງ “ຜູ້ບໍ່ປະສົງອອກນາມ” ຂຽນມາ ເພື່ອສແດງ ຄວາມເສົ້າສລົດໃຈ ກ່ຽວກັບການສີ້ນ ພຣະຊົນຂອງເຈົ້າຟ້າ ຍິງສວີວັນ ເມື່ອ ບໍ່ນານມານີ້. ພ້ອມກັນນີ້ ຂໍໃຫ້ດວງວິນຍານ ຂອງເຈົ້າຍິງ ຈົ່ງໄປດີເຖີງສຸກ ຖ້າຫາກວ່າສີ່ງ ສັກສິດ ໃນສາກົລໂລກ ນີ້ມີຈີງ ຂໍໃຫ້ ດວງວິນຍານ ຂອງເພີ່ນ ຈົ່ງມາຄຸ້ມຄອງ ຄົນລາວ ທຸກຖ້ວນໜ້າ ດ້ວຍເທີ້ນ ນອກຈາກນີ້ ປີໃໝ່ 2007 ຂໍໃຫ້ ທາງວິທຍຸ RFA ຈົ່ງປະສົບ ແຕ່ຄວາມສຸກ ຄວາມຈະເຣີນ ປາຖນາ ສີ່ງໃດ ຂໍໃຫ້ໄດ້ດັ່ງໃຈມັກ. ແລະ ອີກຢ່າງນຶ່ງ ຂໍສັລເສີນ ລາຍການ ຂອງພວກທ່ານ ທີ່ຈັດໄດ້ດີຫລາຍ ຂໍໃຫ້ດຳເນີນເຊັ່ນນີ້ໄປເລື້ອຍໆ ວ່າຊັ້ນ.

ທີ່ກ່າວມານີ້ ກໍຄືຂໍ້ຄວາມ ໃນຈົດໝາຍ ຂອງທ່ານ ຜູ້ບໍ່ປະສົງອອກນາມ. ໄມສຸລ ີພ້ອມດ້ວຍ ຄນະຈັດທຳລາຍການ ຂໍຂອບໃຈ ໃນຄວາມປາຖນາດີ ຂອງທ່ານ ທີ່ໄດ້ສົ່ງຄຳຍ້ອງຍ ໍສັລເສີນ ມາໃຫ້ ລາຍການຂອງ RFA. ໃນຂນະດຽວກັນ ພວກເຮົາ ກໍຍິນດີ ຈະຮັບຟັງ ຄຳຕິຊົມ ຈາກພວກທ່ານ ຖ້າ ທ່ານເຫັນວ່າ ລາຍການ ຂອງພວກເຮົາ ຍັງມີບ່ອນໃດ ຂາດຕົກບົກຜ່ອງ ຢາກໃຫ້ມີການປັບປຸງ ເພີ່ມຕື່ມ ແນວໃດ ກາຣຸນາ ສົ່ງຄວາມຕິຊົມ ດ້ວຍຄວາມບໍຣິສຸດໃຈ ຂອງທ່ານ ມາຍັງພວກເຮົາ ໄດ້ທຸກເວລາ ເພື່ອວ່າ ພວກເຮົາ ຈະໄດ້ແກ້ໄຂ ຕາມຄວາມເໝາະສົມ ດ້ວຍຄວາມປາຖນາດີຂອງພວກເຮົາ ຄນະ ຈັດລາຍການ ວິທຍຸເອເຊັຽເສຣີ ທຸກຄົນ.

ຈມ.ສບັບຕໍ່ໄປ ກໍຄືຂອງຜູ້ບໍ່ປະສົງອອກຊື່ ອີກທ່ານນຶ່ງ ໂດຍໃຊ້ນາມປາກກາວ່າ “ຊາວລາວ ນອກ” ທ່ານຜູ້ນີ້ ມີຂໍ້ສເນີ ປະກອບ ກັບຄຳຖາມ ມາດັ່ງນີ້:

“ສະບາຍດີ ພະນັກງານ ວິທຍຸເອເຊັຽເສຣີ ທີ່ເຄົາຣົບ ແລະ ຮັກແພງ. ການຕັດສິນ ປະຫານຊີວິດ ແຂວນຄໍ ຂອງຊາດຳ ຮູເຊນ ອາດີດ ຜູ້ນຳປະເທດ ອີຣັ່ກ ຂ້າພະເຈົ້າຄິດວ່າ ເປັນຂ່າວດີ ແລະ ຂ່າວບໍ່ດີ ໄປທົ່ວໂລກ. ແຕ່ ຂ້າພະເຈົ້າ ຢາກຖາມວ່າ ນັບແຕ່ນີ້ຕໍ່ໄປ ຖ້າຜູ້ນຳຜູ້ໃດ ຫາກໄດ້ກະທຳຄວາມຜິດ ຄື ຊາດຳ ກໍຈະຖຶກໂທດ ປະຫານ ເຊັ່ນດຽວກັນບໍ່? ຫລືມີແຕ່ຊາດຳ ເທົ່ານັ້ນ? ຈາກຜູ້ບໍ່ປະສົງອອກຊື່. ທີ່ຣັດ Winconsin.”

ຂໍຂອບໃຈ ທີ່ທ່ານ ຂຽນມາເຖິງລາຍການ ຂອງພວກເຮົາ ຕໍ່ຂໍ້ຂ້ອງໃຈ ທີ່ທ່ານເວົ້າວ່າ ເມື່ອຊາດຳ ຖຶກຕັດສີນ ປະຫານຊີວິດ ໂດຍວິທີແຂວນຄໍ ເຊັ່ນນີ້ແລ້ວ ຕໍ່ໄປຖ້າຜູ້ນຳຜູ້ໃດ ໄດ້ກະທຳຜິດ ຄືຊາດຳ ຈະຖຶກໂທດຄືກັນບໍ່? ຄຳຕອບກໍຄືວ່າ ມັນແລ້ວແຕ່ ກົດໝາຍ ຂອງແຕ່ລະປະເທດ ຕົວຢ່າງໃນກໍຣະນີ ການຖຶກແຂວນຄໍຕາຍ ຂອງ Saddam ນີ້ ກໍແມ່ນເປັນໄປຕາມກົດໝາຍໃໝ່ ຂອງອີຣັ່ກ ຊຶ່ງການແຂວນຄໍ ກໍຈະມີ ຢູ່ຫລາຍໆ ປະເທດ. ສ່ວນຢູ່ສປປ.ລາວ ນັ້ນ ກໍມີໂທດປະຫານຊີວິດ ຄືກັນ ຫາກແຕ່ວ່າ ບໍ່ແມ່ນການແຂວນຄໍ ແຕ່ເປັນການ ປະຫານຊີວິດ ດ້ວຍການຍິງເປົ້າ ກົດໝາຍກ່ຽວກັບ ອາຊຍາກັມ ສົງຄາມຢູ່ໃນລາວ ກໍ່ບໍ່ທັນມີເທື່ອ ມີແຕ່ຄວາມຜິດ ໃນທາງອາດຍາ ຕົວຢ່າງ ມາຕຣາ 135. ວ່າດ້ວຍກົດໝາຍ ຕໍ້ຕ້ານ ຢາເສບຕິດ ທີ່ມີໂທດ ຂັ້ນປະຫານຊີວິດ ດ້ວຍການຍິງເປົ້າ ແຕ່ກົດໝາຍ ເປັນສີ່ງທີ່ປ່ຽນແປງໄດ້ ໃນຂັ້ນຕໍ່ໄປ ລາວ ອາດຈະມີກົດໝາຍ ອາຊຍາກັມ ວ່າດ້ວຍການຕ້ານມະນຸດຊາດ ກໍເປັນໄດ້. ທີ່ກ່າວມານີ້ ບໍ່ຮູ້ວ່າ ຈະຊ່ວຍ ຕອບຂໍ້ຂ້ອງໃຈ ຂອງທ່ານ ຜູ້ບໍ່ປະສົງອອກນາມ ໄດ້ແດ່ບໍ່ເນາະ? ຢ່າງໃດກໍຕາມ ພໍເວົ້າມາເຖິງຕອນນີ້ ເພື່ອເປັນການ ຜ່ອນຄາຍ ຄວາມເຄັ່ງຕຶງ ໄມສຸລີ ຂໍເຊີນທ່ານຟັງເພັງລາວ ສມັຍທີ່ອອນຊອນ ເພັງນຶ່ງ ກ່ອນຈະຕອບຈມ. ສບັບຕໍ່ໄປ. ຂໍເຊີນທ່ານ ຫາຄວາມສຳຣານ ໄດ້ເລີຽ ຈາກສຽງເພັງທີ່ມີຊື່ວ່າ “ຣາຕຣີພາຝັນ” ຂັບຮ້ອງໂດຍ “ແສງເພັດ” ເຊີນຮັບຟັງໄດ້.

------------------ເພັງ-------------------

ທີ່ຈົບລົງໄປນັ້ນ ກໍຄືເພັງທີ່ມີຊື່ວ່າ “ຣາຕຣີພາຝັນ” ຈາກສຽງຂັບຮ້ອງ ຂອງ”ແສງເພັດ” ຫວັງວ່າ ຄົງຈະໃຫ້ ຄວາມມ່ວນຊື່ນ ແກ່ທ່ານ ບໍ່ຫລາຍກໍໜ້ອຍ. ບັດນີ້ ຂໍເຊີນທ່ານເຂົ້າ ສູ່ລາຍການຕໍ່.

ຈມ.E-mail ສບັບສຸດທ້າຍ ໃນລາຍການ ຂອງພວກເຮົາ ໃນມື້ນີ້ ກໍຄືຈມ.ຂອງທ່ານ”ເກົ່າປູ ຟອງປະເສີດ” ຜູ້ຕາງໜ້າ ຊາວລາວອີວມ້ຽນ ເຜົ່າຢ້າວ ແຫ່ງເມືອງ North Hichland ຣັຖ California ໃນຈມ. ບອກວ່າ “ຂໍເຊີນຊວນ ພີ່ນ້ອງຊາວລາວ ພ້ອມດ້ວຍຄນະໂຄສົກ ຂອງເອເຊັຽເສຣີທຸກໆ ທ່ານ ເຂົ້າຮ່ວມ ໃນງານ ບຸນປີໃໝ່ ຂອງພີ່ນ້ອງຊາວລາວ ອີວມ້ຽນ ທີ່ຈະຈັດຂຶ້ນຢູ່ທີ່ຫ້ອງອາຫານ “Holiday Village” ໃນຄ່ຳຄືນ ຂອງວັນ ທີ 3 ເດືອນ ກຸມພາ ປີ 2007. ຫວັງເປັນຢ່າງຍິ່ງວ່າ ພວກທ່ານ ຄົງຈະບໍ່ເຮັດ ໃຫ້ພວກເຮົາ ຊາວຄນະ ກັມມະການ ຜູ້ຮັບຜິດຊອບ ໃນງານ ຜິດຫວັງໃນຄັ້ງນີ້. ສຸດທ້າຍຂໍຟັງເພັງ “ສວັສດີປີໃໝ່” ເພັງນີ້ຂໍມອບ ໃຫ້ແກ່ພີ່ນ້ອງຊົນຊາວລາວ ອີວມ້ຽນ ເຜົ່າຢ້າວທຸກຖ້ວນໜ້າ ບໍ່ວ່າໃນປະເທດ ຫລື ຕ່າງປະເທດ. ຟັງແລ້ວ ຂໍໃຫ້ທຸກທ່ານຈົ່ງໂຊກດີ ມີຊັຍຕລອດປີ 2007.” ວ່າຊັ້ນ.

ໄມສຸລີຂໍຂອບໃຈ ແທນຕາງໜ້າ ຄນະທີມງານ ຂອງວິທຍຸເອເຊັຽເສຣີ ທຸກຄົນ ໃນຄຳເຊື້ອເຊີນຂອງ ພວກທ່ານ. ສ່ວນເພັງທີ່ຂໍມາ ໄມສຸລີ ກໍຍິນດີຈະຈັດໃຫ້ພ້ອມດຽວກັນນີ້ ຂໍມອບກະວີບົດນີ້ ເພື່ອເປັນພອນປີໃໝ່ ໃຫ້ແກ່ ພີ່ນ້ອງລາວຊາວ ອີວມ້ຽນທຸກໆ ຖ້ວນໜ້າ.

  ;   ; *ປີເກົ່າແຮມຫ່າງຮ້າງ   ;   ;   ;   ; ທຸກກໍຈາກຈອນໜີ ໝູ່ເອີ່ຍ   ;   ; ມີແຕ່ຄຸນຄວາມງາມ   ;   ;   ;   ; ໄລ່ຕາມສນອງເຈົ້າ   ;   ; ທຸກເກົ່າໄລລາລີ້   ;   ;   ;   ; ໜີໄປນຳປີເກົ່າ   ;   ; ມີແຕ່ໂຊກເຄື່ອນເຂົ້າ   ;   ;   ;   ; ເຫງົາງ້ວງກໍໃຫ້ເຊົາ ແທ້ເດີ້.   ;   ; *ຄ.ສ.ໃໝ່ມາຮອດແລ້ວ   ;   ;   ;   ; ໃຫ້ພົບແຕ່ແນວດີ   ;   ; ອັບປີມານມົວໝອງ   ;   ;   ;   ; ກໍ່ຈາກຈອນໄກຈ້ອຍ   ;   ; ໄດ້ຟັງພອນນີ້ແລ້ວ   ;   ;   ;   ; ເຫງົາຫງອຍກໍ່ໃຫ້ຊື່ນ   ;   ; ຮ້ອງໄຫ້ແສບສະອື້ນ   ;   ;   ;   ; ຂວັນເຈົ້າໃຫ້ຕ່າວຄືນ ວ່ານາ   ;   ; *ປີໃໝ່ໃຫ້ສ້ຽງສິ້ນ   ;   ;   ;   ; ສຸດລະບອບຜເດັດການ   ;   ; ມວນໝູ່ມານມາລາວ   ;   ;   ;   ; ໃຫ້ຫ່າງແດນດິນພື້ນ   ;   ; ກາງຄືນນອນຫລົງແຈ້ງ   ;   ;   ;   ; ຖແລງມາໃຫ້ຊວາດຕື່ນ ໃດເດ້   ;   ; ພາກັນລວມລຸກຂຶ້ນ   ;   ;   ;   ; ຊູຊວ້ານຊາດຄືນ ແທ້ໃດ.   ;   ; ແຕ່ງໂດຍໂມທນາ.

-------------------------------ເພັງ------------------------------

ທີ່ຈົບລົງໄປນັ້ນ ກໍຄືເພັງ “ສວັສດີປີໃໝ່” ຂັບຮ້ອງໂດຍ “ພົມມະ ພີມມະສອນ” ທ່ານ ຜູ້ຟັງທີ່ເຄົາຣົບ ເປັນອັນວ່າ ລາຍການຕອບຈມ.ໃນມື້ນີ້ ເວລາກໍໝົດລົງ ພຽງເທົ່ານີ້ແລ້ວ ຂໍເຊີນທ່ານ ຕິດຕາມ ຮັບຟັງໄດ້ໃໝ່ ໃນວັນພະຫັດໜ້າ. ສຳລັບມື້ນີ້ ໄມສຸລີຂໍກ່າວຄຳວ່າ ສະບາຍດີ.

ຈັດສເນີທ່ານ ໂດຍ: ໄມສຸຣີ

• ຟັງສຽງ
• Download story audio