ວັນທີ 31 ເດືອນ ມົກກະຣາ ປີ 2007

ສະບາຍດີ ທ່ານຜູ້ຟັງ ທີ່ເຄົາຣົບ ມື້ນີ້ລາຍການຕອບຈົດໝາຍ ຂອງພວກເຮົາ ກໍໄດ້ໝູນວຽນ ມາຄົບຮອບ ອີກເທື່ອນຶ່ງ ໃນທຸກໆ ວັນພະຫັດ ຫວັງໃຈເປັນຢ່າງຍິ່ງວ່າ ຫຼາຍໆທ່ານ ຄົງຈະເປີດ ວິທຍຸຮັບ ຟັງຢູ່ ຖ້າທ່ານ ຜູ້ຟັງທ່ານໃດ ຫາກຟັງບໍ່ທັນຈາກ ທາງວິທຍຸ ທ່ານ ກໍສາມາດຟັງໄດ້ ອີກຕາມທາງ Internet ຂອງ RFA ຫຼັງຈາກ ອອກອາກາດ ໄປແລ້ວ. ເຖິງຢ່າງໃດກໍ່ຕາມ ເພື່ອບໍ່ເປັນການເສັຽເວລາ Maysoly ຂໍເຊີນແຟນໆ ເຂົ້າສູ່ລາຍການເລີຽ.

ຈມ.ສບັບທຳອິດໃນມື້ນີ້ ໄດ້ຮັບຈາກແຟນໃໝ່ຂອງ RFA ທີ່ປະເທດເຍັຽຣະມັນ ຄືທ່ານ ບູນຊູ ສິຣິວິໄຊ ເພີ່ນ ໄດ້ສົ່ງຈມ.ມາທາງ e-mail. ຂຽນວ່າ:

“ສະບາຍດີ ຂ້າພະເຈົ້າຫາກໍ່ໄດ້ຟັງລາຍການຂອງວິທຍຸເອເຊັຽເສຣີເມື່ອ 2-3 ມື້ຜ່ານມານີ້ເອງ ຂ້າພະເຈົ້າ ເປັນຄົນໄທ ຢູ່ປະເທດເຢັຽຣະມັນ ແລະ ມີຄວາມມັກຮັກແພງ ກັບຄົນລາວ. ໃນເດືອນມີນາ ທີ່ຈະມາເຖິງນີ້ ຂ້າພະເຈົ້າ ອາດຈະມີໂອກາດ ເດີນທາງໄປ ສະຫະຣັດ ອະເມຣິກາ ຢາກຖາມວ່າ ຂ້າພະເຈົ້າ ຢາກພົບພ ໍ້ກັບຄົນລາວ ຢູ່ແຖບໆ Washington DC ຫລື ແຖບໆ Atlanta ຈະໄດ້ບໍ່?” ວ່າຊັ້ນ

Maysoly ຂໍຂອບໃຈ ທ່ານ ບູນຊູ ສິຣິວິໄຊ ທີ່ໃຫ້ຄວາມສົນໃຈ ຟັງວິທຍຸເອເຊັຽເສຣີ ພາກ ພາສາລາວ. ບໍ່ເຄີຽຄິດວ່າ ຢູ່ເຢັຽຣະມັນ ຈະມີຄົນໄທ ຟັງລາຍການ ຂອງພວກເຮົາ ຢ່າງໃດກໍຕາມ ຄຳ ຖາມ ທີ່ທ່ານ ເວົ້າມານັ້ນ ຢູ່ເຂດນະຄອນຫຼວງ Washington ນີ້ ຄົນລາວ ກໍ່ຢູ່ຢ່າງຫຼວງຫຼາຍ ຖ້າບໍ່ຮູ້ຈັກຜູ້ໃດ ແທ້ RFA ກໍ່ຍິນດີ ຕ້ອນຮັບ ຖ້າມີເວລາ ເຊີນແວະຢ້ຽມຢາມ ຫ້ອງການ ຂອງພວກເຮົາ ໄດ້ທຸກເວລາ ເຊັ່ນດຽວກັນ ຢູ່ Atlanta ກໍມີຄົນລາວ ຮວມທັງຄົນໄທ ຫຼາຍຮ້ອຍຄອບຄົວ ເຊັ່ນດຽວກັນ ຮັບຮອງວ່າ ທ່ານ ຈະບໍ່ຜິດຫວັງ ດອກ.

e-mail ສະບັບຕໍ່ໄປກໍຄືຂອງທ່ານ Phisith Silalak ຂຽນ ຈາກປະເທດ ຝຣັ່ງເສດ. ເພີ່ນ ຂຽນເຖິງລາຍການ ຂອງ RFA ເພື່ອຢາກຊາບ ທີ່ຢູ່ຂອງ ທ່ານ ສົມເພັຊ ເພັຊວິນຍານ ອາດີດ ສີນລະປິນ ນັກຮ້ອງຊື່ດັງ ຂອງລາວ ໃນ e-mail ບອກວ່າ “ສະບາຍດີ ຂ້າພະເຈົ້າ ໄດ້ຕິດຕາມຮັບຟັງ ລາຍການ ຂອງພວກທ່ານ ທຸກໆ ມື້ໃນຕອນເຊົ້າ ພ້ອມດຽວກັນ ຂໍຝາກຂໍ້ຄວາມ ຜ່ານທາງ RFA ເພື່ອ ຢາກຕິດຕ ໍ່ທີ່ຢູ່ຂອງ ທ່ານ Somphet Phetvinyarn ຫລືຊື່ແທ້ວ່າ Somphet Phanousith.” ຈາກທ່ານ phisit Silalak ທີ່ປະເທດຝຣັ່ງເສດ.

ທີ່ກ່າວມານີ້ ກໍຄືຂໍ້ຄວາມສົ່ງຂ່າວ ຫາທ່ານ ສົມເພັຊ ເພັຊວິນຍານ ຖ້າທ່ານ ຢູ່ແຫ່ງຫົນໃດ ໃນທົ່ວ ສະຫະຣັດ ອະເມຣິກາ ຖ້າໄດ້ຊາບຂ່າວ ນີ້ແລ້ວ ຂໍໃຫ້ຕິດຕໍ່ ໄປຫາທ່ານ Phisith Silalak ທີ່ປະເທດຝຣັ່ງເສດ ດ້ວຍ. ຫລືວ່າ ທ່ານ ຜູ້ຟັງ ທ່ານໃດ ຫາກຮູ້ ຈັກທີ່ຢູ່ຂອງ ຜູ້ກ່ຽວແລ້ວ ກໍຂໍຄວາມ ກະຣຸນາ ຊ່ວຍປະຊາສັມພັນ ແຈ້ງມາຍັງ ທາງວິທຍຸເອເຊັຽເສຣີ ຂອງພວກເຮົາກໍໄດ້ ເພື່ອຈະໄດ້ນຳສເນີໃຫ້ຜູ້ຂໍມາໄດ້ຊາບ ຂໍຂອບໃຈລ່ວງໜ້າ.

e-mail ສະບັບຕໍ່ໄປກໍຄື “ຈມ.ແຈ້ງຂ່າວງານສລອງປີໃໝ່ຂອງພີ່ນ້ອງຊາວລາວເຜົ່າອີວມ້ຽນ ທີ່ເມືອງ North Highland ຣັຖ California” ຢ່າງໃດກໍຕາມ ຈມ.ຂອງພວກທ່ານ Maysoly ກໍໄດ້ຕອບໄປແລ້ວ ໃນມື້ວັນພະຫັດທີ່ຜ່ານມາ. ຖ້າທ່ານບໍ່ມີໂອກາດຟັງເທື່ອ ກໍຂໍເຊີນເຂົ້າໄປຟັງໄດ້ທາງ Internet RFA ໄດ້ອີກ ຕາມວັນເວລາ ທີ່ຕ້ອງການ ແລະ ອີກເທື່ອນຶ່ງ ທາງວິທຍຸ ເອເຊັຽເສຣີ ຂໍອວຍຊັຍ ໃຫ້ພອນ ແກ່ພີ່ນ້ອງ ຊາວລາວ ອີວມ້ຽນ ທີ່ຢູ່ທຸກມຸມ ທຸກແຈ ຂອງໂລກຈົ່ງປະສົບ ແຕ່ຄວາມສຸກ ສະບາຍໃນປີໃໝ່ 2007 ນີ້.

ຈມ.ສະບັບຕໍ່ໄປ ກໍຄືຂອງ “ລູກສັນພູວຽງ” ໃນຈມ. ເພີ່ນໄດ້ສົ່ງຂໍ້ຄິດເຫັນ ໃນລັກສນະ ສ່ວນຕົວ ກ່ຽວກັບ ສະພາບການ ປ່ຽນແປງ ຢູ່ສປປ.ລາວ ໃນລະຍະ 30 ກວ່າປີຜ່ານມາ. ຊຶ່ງກໍແນ່ນອນ ວ່າ ຄົນລາວ ແຕ່ລະຄົນ ກໍຄົງ ຈະມີຄວາມຄິດເຫັນ ທີ່ແຕກຕ່າງກັນ ແລ້ວແຕ່ເງື່ອນໄຂຂອງ ໃຜລາວເນາະ ໃນຈົດໝາຍຂອງ “ລູກສັນພູວຽງ” ບອກມາວ່າ:

“ຂ້າພະເຈົ້າ ໄດ້ຕິດຕາມຟັງ ຂ່າວຂອງພວກທ່ານ ຜ່ານທາງ Internet ທຸກໆ ວັນ ເປັນປະຈຳ ໂດຍບໍ່ໄດ້ລົດລະ ເໝືອນປະຊາຊົນລາວ ທຸກໆ ຄົນ ທັງຢູ່ໃນ ແລະ ນອກ ປະເທດ. ເພື່ອຢາກເຫັນ ປະເທດລາວ ທີ່ປົກຄອງດ້ວຍ ພັກອັນສລາດສ່ອງໃສ ກວ່າ 30 ປີຜ່ານມາແລ້ວ ນັ້ນ ເຫັນວ່າ ຈະເຣີນລົງ ແບບປະເທດ ເກົາຫຼີເໜືອ. ຕລອດລະຍະຜ່ານມາ ພວກເພີ່ນກໍໄດ້ປະກາດວ່າ ບໍ່ມີງົປມານ ໃນການສ້າງສາ ພັທນາ ປະເທດ. ເງິນທີ່ຢືມຈາກ ທະນາຄານໂລກ ທະນາຄານເອເຊັຽ ຫຼາຍໆ ຕື້ dollars. ແລະຊ່ວຍເຫຼືອລ້າຫຼາຍໆ ຕື້ ແມ່ນຫາຍສາບສູນໄປໃສໝົດ. ແມ່ນແຕ່ເສັ້ນທາງໂຮຈິມິນ ໃນດິນແດນ ຂອງລາວ ກໍຍັງ ຂາຍໃຫ້ວຽດ ໄປແລ້ວ ແຕ່ວ່າງົປມານ ເພື່ອໃຊ້ເຂັ່ນຂ້າປະຊາຊົນລາວ ດ້ວຍກັນ ນັ້ນ ແລະ ໃຊ້ຈ່າຍ ໃຫ້ທະຫານວຽດ ເພື່ອປາບປາມລາວ ເຜົ່າ Hmong ນັ້ນ ແມ່ນເອົາມາແຕ່ໃສ? ເປັນໜ້າອັບອາຍ ຂາຍໜ້າ ຫຼາຍທີ່ສຸດ ເມື່ອພົບເຫັນ ຊາວຝຣັ່ງເສດ ຄົນນຶ່ງ ທີ່ໄດ້ມາທ່ຽວເມືອງລາວ ແລ້ວ ເພີ່ນໄດ້ຂຽນອອກ Internet ຊື່ວ່າ (Jevoyageseule.free.fr./Laos.htm) ຄົນຝຣັ່ງເສດ ຜູ້ນີ້ໄດ້ຂຽນ ວ່າ ທີ່ເມືອງມໍຣະດົກໂລກ ຫຼວງພະບາງ ເປີດຮ້ານຂາຍໝາ ປິ່ນ ຢ່າງເສຣີ ຊຶ່ງປະຊາຊົນລາວ ຖືວ່າ ໝາເປັນສັດ ເປື້ອນເປີະ ແລະ ປະຊາຊົນລາວ ກໍຖືວ່າ ເປັນສັດ ທີ່ບໍ່ຄວນ ແຕະຕ້ອງ (ມັງສັງ 10 ຢ່າງ ເຊັ່ນ: ສີງ ເສືອ ຊ້າງ ມ້າ ໝາ ແມວ ລີງ ເຕົ່າ) ຊ້ຳບໍ່ໜຳ ການຈ່າຍຄ່າໂຮງແຮມ ເມື່ອຈ່າຍໄປແລ້ວ ບໍ່ມີໃບຮັບ ແລະ ກໍມີການທວງ ເອົາຈາກລູກຄ້າ ອີກ. ໃນການເດີນທາງ ໃຊ້ຣົດໂດຍສານ ລະຫວ່າງ ຫຼວງພຣະບາງ-ວຽງຈັນ ກໍ່ບໍ່ເຫັນວ່າ ຈະມີສຖານ ທີ່ພັກເຊົາ ເພື່ອຜູ້ທີ່ຈະເຂົ້າຫ້ອງນ້ຳ ຫ້ອງສ້ວມ ແຕ່ຢ່າງໃດ ແລ້ວແຕ່ໃຜຈະເຮັດຕາມໃຈ. ມື້ນີ້ຂໍຈົບພຽງເທົ່ານີ້ກ່ອນ ໂອກາດໜ້າຈະຂຽນມາອີກ.”

ທີ່ກ່າວມານີ້ ກໍເປັນພຽງຂໍ້ຄິດເຫັນ ສ່ວນຕົວຂອງ “ລູກສັນພູວຽງ” ຖ້າທ່ານ ຜູ້ໃດຫາກມີ ຄວາມຄິດເຫັນ ແນວໃດຕໍ່ສີ່ງທີ່ກ່າວມານີ້ ກໍສາມາດຂຽນຈມ. ມາຮ່ວມໃນລາຍການ ຂອງພວກເຮົາໄດ້ ເພື່ອ ຈະໄດ້ສຶກສາ ຮ່ວມກັນເນາະ.

ຈມ.ສະບັບຕໍ່ໄປ ກໍຄືຂອງທ່ານ “ພູເງິນ” ຂຽນມາຈາກປະເທດລາວ. ໃນຈມ.ເພີ່ນຂຽນມາດັ່ງນີ້:

“ສະບາຍດີ ທຸກໆ ທ່ານທີ່ວິທຍຸເອເຊັຽເສຣີ. ກ່ອນອື່ນຂໍອະພັຍນຳ ຍ້ອນວ່າ ພາສາອັງກິດ ຂອງຂ້າພະເຈົ້າ ບໍ່ຄ່ອຍຄ່ອງ ປານໃດ ຂ້າພະເຈົ້າເປັນຜູ້ນຶ່ງ ທີ່ເຄີຽຕິດຕາມ ຮັບຟັງລາຍການວິທຍຸ ຂອງພວກທ່ານ ຈາກທາງ website ພ້ອມກັບ ພໍ່ຕອນທີ່ເພີ່ນຍັງ ມີຊີວິດຢູ່. ແລະ ໃນເວລານີ້ ເພີ່ນໄດ້ຈາກໂລກນີ້ ໄປແລ້ວ ເມື່ອຟັງ ຢາມໃດ ກໍພາໃຫ້ຄິດຮອດພໍ່. ຢ່າງໃດກໍຕາມ ຕາມປົກຕິແລ້ວ ຂ້າພະເຈົ້າມັກຟັງລາຍການ ຂອງພວກທ່ານ ຫຼາຍ ໂດຍສະເພາະ ລາຍການໝໍລຳ ພ້ອມດ້ວຍບົດກອນລາວມ່ວນໆ. ແຕ່ກໍໜ້າເສັຽດາຍ ຂ້າພະເຈົ້າ ຮູ້ສຶກເສັຽໃຈ ບາງເທື່ອ ເມື່ອຟັງຂ່າວ ທີ່ພວກທ່ານກ່າວຕິຕຽນ ຣັຖບານລາວ ຊຶ່ງພວກທ່ານ ກໍເປັນຄົນລາວ ເໝືອນກັນ. ຂ້າພະເຈົ້າ ຢາກຈະຖາມວ່າ ທຸກໆ ທ່ານ ທີ່ເປັນຄົນລາວນອກ ທ່ານກໍຍັງແມ່ນຄົນລາວ ຢູ່ບໍ່? ເປັນຫຍັງ ພວກທ່ານ ຄືບໍ່ກັບຄືນປະເທດ ເພື່ອຊ່ວຍກັນສ້າງສາພັທນາ ປະເທດຊາດ ບ້ານເມືອງ ນຳກັນ ແທນທີ່ຈະກ່າວຕິຕຽນ ແຕ່ເຣື່ອງນັ້ນເຣື່ອງນີ້. ຢາກຖາມວ່າ ນັບ ແຕ່ພວກທ່ານ ຈາກປະເທດລາວ ໄປເປັນເວລາດົນນານ ເທົ່າໃດແລ້ວ? ທ່ານເຄີຽກັບຄືນໄປຢາມລາວບໍ່? ພວກທ່ານຮູ້ບໍ່ ພວກເຮົາ ຄົນລາວ ທຸກຄົນ ຢູ່ທາງພີ້ ກໍ່ມີຄວາມສຸກ ແລະ ຍັງຮັກສາປະເທດຊາດ ບ້ານເມືອງ ຂອງເຮົາຢູ່ ຈະເປັນການດີ ຫຼາຍທີ່ສຸດ ຖ້າຄົນລາວນອກ ທຸກໆ ຄົນ ຫາກກັບຕ່າວຄືນມາຢູ່ລາວ ເພື່ອຊ່ວຍກັນສ້າງສາ ປະເທດຊາດ ບ້ານເມືອງ ຂອງພວກເຮົາ ໃຫ້ຈະເຣີນກ້າວໜ້າ. (ອັນນີ້ບໍ່ແມ່ນເວົ້າຫລີ້ນເດີ້). ທີ່ກ່າວມານີ້ຕ້ອງ ຂໍອະພັຍນຳ ຖ້າວ່າຜິດພາດ. ຕາມທັມມະດາ ແລ້ວ ຂ້າພະເຈົ້າ ເປັນຄົນຜູ້ນຶ່ງ ທີ່ບໍ່ຄ່ອຍມັກ ເວົ້າໃສ່ຜູ້ໃດ. ແຕ່ ກໍອົດລົນທົນ ບໍ່ໄດ້ ຍ້ອນວ່າ ນັບແຕ່ຟັງລາຍການ ຂອງພວກທ່ານມານັ້ນ ບໍ່ເຄີຽໄດ້ຍິນຄຳດຽວເລີຽ ທີ່ພວກທ່ານເວົ້າ ແນວດີໃຫ້ ແກ່ລາວ ບາງເທື່ອເຮັດໃຫ້ພວກເຮົາ ພາກັນສົງສັຍວ່າ ພວກທ່ານຍັງເປັນຄົນລາວບໍ່ ຫລືວ່າ ເປັນຊາດອື່ນໄປເສັຽແລ້ວ?.”

ທີ່ກ່າວມານີ້ກໍຄືເນື້ອໃນ ໃຈຄວາມໃນຈມ.ຂອງທ່ານ ຜູ້ຟັງທີ່ຂຽນຈາກ ປະເທດລາວ. ກ່ອນອື່ນ Maysoly ຂໍຂອບໃຈ ທີ່ທ່ານໃຫ້ກຽດ ຕິດຕາມຮັບຟັງ ລາຍການ ຂອງວິທຍຸເອເຊັຽເສຣີ ແລະ ກໍຮູ້ສຶກເສັຽໃຈນຳ ດ້ວຍ ທີ່ທ່ານເວົ້າວ່າ ເຄີຽຟັງວິທຍຸເອເຊັຽເສຣີ ຮ່ວມກັບ ຍາພໍ່ຂອງທ່ານ ແຕ່ເພີ່ນໄດ້ເສັຽຊີວິດ ໄປແລ້ວ. ຟັງຄັ້ງໃດ ພາໃຫ້ຄິດເຖິງ ເພີ່ນ ວ່າຊັ້ນ. ຢ່າງໃດກໍຕາມ ຕໍ່ຄຳເວົ້າຂອງທ່ານ ທີ່ກ່າວມານີ້ ຂໍຕອບສັ້ນໆດັ່ງນີ້: ຕາມ ຄວາມເປັນຈິງແລ້ວ ວິທຍຸເອເຊັຽເສຣີ ບໍ່ມີເຈຕະນາ ຈະກ່າວໂຈມຕີ ຫລືຍົກຍ່ອງຣັຖບານ ລາວແຕ່ຢ່າງດຽວ ແຕ່ພວກເຮົາ ຈະສເນີ ແຕ່ຄວາມຈິງ ຊຶ່ງໃນນັ້ນ ກໍມີທັງຂ່າວດີແລະບໍ່ດີເທົ່າໆ ກັນ ຂໍຂອບໃຈ ແທນຊາວລາວ ນອກ ທີ່ທ່ານບອກວ່າ ຢາກໃຫ້ກັບຄືນ ເມືອສ້າງສາ ປະເທດຊາດ ບ້ານເມືອງຊ່ວຍກັນ ສິບໍ່ດີກວ່າບໍ່? ອັນນີ້ ຄິດວ່າຄົງຈະເປັນ ຄວາມປາຖນາ ຂອງຄົນລາວນອກ ເກືອບທຸກໆຄົນ ຢູ່ແລ້ວ ບັນຫາກໍມີຢູ່ວ່າ ຄວາມຈິງໃຈ ມີພຽງໃດເນາະ? ເພາະເຖິງຢ່າງໃດໆ ຣັຖບານລາວ ກໍຖືວ່າ ຄົນລາວນອກ ເຖິງແມ່ນຍັງຈະເປັນ ຄົນລາວ ແຕ່ບໍ່ແມ່ນ ສັນຊາດລາວ ແລ້ວ ເພາະພວກເພີ່ນ ໄດ້ໄປຈາກປະເທດລາວເ ປັນເວລາ 30 ກວ່າປີແລ້ວ. ຖ້າຈະກັບ ໄປຢູ່ລາວ ກໍຖືວ່າເປັນຄົນຕ່າງຊາດ ມາຂໍອາສັຍຢູ່ໃນ ແຜ່ນດິນລາວ. ແລະ ທຸກສິ່ງທຸກຢ່າງ ກໍຈະຕ້ອງເປັນໄປ ຕາມເງື່ອນໄຂ.

ທ່ານຜູ້ຟັງທີ່ເຄົາຣົບ ພໍເວົ້າມາເຖິງຕອນນີ້ ເວລາ ແຫ່ງລາຍການຕອບຈມ. ກໍໃກ້ຈະໝົດ ລົງແລ້ວ ເພື່ອ ບໍ່ເສັຽເວລາ Maysoly ຂໍເຊີນທ່ານຟັງ ເພັງທ້າຍລາຍ ການຂອງພວກເຮົາ ໄດ້ເລີຽ ຊຶ່ງຈະຂໍ ສເນີເພັງທີ່ມີຊື່ວ່າ “ບ້ານເກີດທີ່ຮັກ” ຂັບຮ້ອງໂດຍ “ອູ່ແກ້ວ ໄຊຍະວົງ”

---ເພັງ---

ທີ່ຈົບລົງໄປນັ້ນ ກໍຄື ເພັງ “ບ້ານເກີດທີ່ຮັກ” ແຕ່ງໂດຍ ທ່ານວໍຣະເດດ ດິດທະວົງ ຂັບຮ້ອງໂດຍ “ອູ່ແກ້ວ ໄຊຍະວົງ” ທ່ານຜູ້ຟັງ ທີ່ເຄົາຣົບ ເປັນອັນວ່າ ລາຍການຕອບຈມ.ໃນມື້ນີ້ເວລາກໍໝົດລົງ ພຽງເທົ່ານີ້ແລ້ວ ຂໍເຊີນ ທ່ານພົບກັບ ລາຍການນີ້ ໄດ້ອີກໃນ ວັນພະຫັດໜ້າ. ສະບາຍດີ.

ຈັດສເນີທ່ານ ໂດຍ: ໄມສຸຣີ

• ຟັງສຽງ
• Download story audio