Axbaratchiliq exlaq qa'idisi

Axbaratchiliqning aliy ölchemlirige qattiq ri'aye qilish erkin asiya radiyosi burchining yadrosidur.

Erkin asiya radiyosi burchining heqiqiy yadrosi axbaratchiliqning aliy ölchemlirige qattiq ri'aye qilishtin ibarettur. Erkin asiya radiyosining barliq muxbirliri ( bular erkin asiya radiyosi üchün uchur yighidighan, igileydighan, xewer-maqalilerni torgha chaplaydighan we xewer programmilarni élan qilidighan barliq xadimlarni öz ichige alidu) töwendiki négizlik prinsiplargha boysun'ghan halda kespiy we exlaqiy ölchem boyiche ish tütishi hemde axbaratchiliqning yuqiri ölchemlirini teshebbus qilishi kérek.

• Erkin asiya radiyosining xewer-programmiliri choqum toghra, xalis we tengpung bolushi kérek.

• Erkin asiya radiyosining muxbirliri choqum éghir bésiq we temkin keypiyatni saqlishi hemde herqandaq shexs, guruppa we hökümetke qaritilghan jédel-majira, bir tereplime teshwiqat we yaki haqaretlerdin xali bolushi kérek. Uningdin bashqa erkin asiya radiyosining muxbirliri radiyo anglighuchilargha wez éytmasliqi we ularni kemsitmesliki kérek.

• Erkin asiya radiyosi muxbirliri radiyo anglighuchilarni zorawanliq qilishqa küshkürtmesliki we yaki ularni qozghilang kötürüsh, toliship köchüsh qatarliq heriketlerge righbetlendürmesliki؛ eksiche, uchur-axbarat erkinliki qatarliq démokratik qimmet qarashlirida ching turup, oxshimaydighan pikir-qarashlargha sorun hazirlap bérishi kérek.

• Erkin asiya radiyosi muxbirliri herqandaq epqachti gep, söz-chöchek we yaki delillenmigen uchurlarni herqandaq xewer we programmilargha arilashturmasliqi, maqalini mumkin qeder birdin artuq menbedin paydilinip yézishi kérek.

• Eger erkin asiya radiyosi muxbirliri xata matériyal, xewer, obzorlar we uchurlarni radiyoda bérip yaki torda élan qilip qalghan bolsa, derhal xataliqini étirap qilishi hemde xataliq qeyerde körülgen bolsa shu shu xil wasitini qollinip xataliqni tüzitishi kérek.

• Erkin asiya radiyosi muxbirliri bashqa axbarat orunliri yaki xewer menbelirining ziyaret xatirisi, xewer- doklatliri yaki matériyalliridin neqil élip ishletkende ularni toluq tilgha élishi we ularning ejrini hörmetlep, toluq izah bérishi kérek.

• Erkin asiya radiyosi muxbirliri choqum herqandaq bir siyasiy partiye, öktichi guruppa, sergerdan teshkilat yaki erkin asiya xewer-uchurliri anglitilidighan döletlerdiki diniy gewdilerdin musteqil turushi hemde erkin asiya radiyosining obyéktipliq we bitereplik meydanigha dagh tegküzidighan yaki dagh tegküzüsh éhtimalliqi bolghan herqandaq siyasiy köz qarashlarni himaye qilmasliqi kérek.

• Erkin asiya radiyosi xadimliri sirttin maqale ewetküchilerni choqum éniq tonushturushi, obzor-maqalilerning axirida, ular otturigha qoyghan köz-qarashlarning erkin asiya radiyosigha wekillik qilmaydighanliqini éniq izahlishi kérek. Qandaq bolushidin qet'iy nezer, ularning eserlirini tehrirlesh hoquqi erkin asiya radiyosida bolidu we qaysi mezmunlarni radiyoda bérish qararni radiyo chiqiridu.

• Erkin asiya radiyosi muxbirliri erkin asiya radiyosining xewer programmilirigha tesir körsitish éhtimalliqi bolghan herqandaq xewer qilinidighan shexs, organ we teshkilattin sogha-salam, tartuq yaki heqsiz sayahet qildurush hediyilirini qobul qilmasliqi kérek.

• Erkin asiya radiyosi xadimliri sirttin, radiyodiki mes'uliyetlirige dexli yetküzidighan xizmetlerni qobul qilmasliqi, herqandaq xizmetchi sirtta erkin asiya radiyosigha munasiwetlik bolghan nutuq sözlesh yaki ammiwi sorunlarda otturigha chiqish qatarliq pa'aliyetlerni öz ichige alghan shundaq mes'uliyet we pa'aliyetler bilen shughullanmaqchi bolsa choqum, aldi bilen erkin asiya radi'usi chiqarghan “Menpe'et toqunushi siyasiti” de körsitilgen qa'idiler boyiche munasiwetlik orunlardin testiq élishi kérek.

• Muxbirlar erkin asiya radiyosi üchün xewer ishlesh jeryanida, özini herqandaq bir teshkilat yaki bashqa axbarat orgini, hökümet apparati we yaki hökümettin xali teshkilatlarning wekili salahiyitide körsetmesliki kérek.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.