خىتاي كومپارتىيەسىنىڭ ئىنتىزام تەكشۈرۈش ئورگىنى ئۇيغۇر رايونىنىڭ سابىق پارتكوم سېكرېتارى ما شىڭرۈينىڭ « ئىنتىزامغا ۋە قانۇنغا ئېغىر خىلاپلىق قىلىش» گۇمانى بىلەن تەكشۈرۈلۈۋاتقانلىقىنى ئېلان قىلدى.
ما شىڭرۈي 2021-يىلى ئۇيغۇر ئاپتونۇم رايونىغا پارتكوم سېكرېتارى بولۇپ تەيىنلىنىشتىن بۇرۇن، گۇاڭدۇڭ ئۆلكىسىنىڭ باشلىقى، شېنجېن شەھەرلىك پارتكوم سېكرېتارى ۋە دۆلەت ئاۋىئاتسىيە ئىدارىسىنىڭ باشلىقى قاتارلىق مۇھىم ۋەزىپىلەرنى ئۆتىگەن. ئۇيغۇر رايونىدا ۋەزىپىگە ئولتۇرۇپ ئۇزۇن ئۆتمەي، 2022-يىلى خىتاي كومپارتىيەسى مەركىزىي كومىتېتى سىياسىي بىيۇروسىنىڭ ئەزالىقىغا سايلانغان.
ما شىڭرۈي خىتاي ھۆكۈمىتى خەلقئاراغا لاگىرلارنى ئاللىقاچان تاقىۋەتكەنلىكىنى ئېيتقاندىن كېيىن ۋەزىپىگە تەيىنلەنگەن بولسىمۇ، ئۇ ۋەزىپىگە چىققاندىن كېيىن، بۇ لاگىرلارنىڭ كۆپىنچىسىنىڭ تۈرمە شەكلىدىكى قاماق مەركەزلىرىگە ئايلاندۇرۇلغانلىقى ۋە نۇرغۇن كىشىلەرنىڭ ئويدۇرۇپ چىقىرىلغان جىنايەتلەر بىلەن ئېغىر قاماق جازالىرىغا ھۆكۈم قىلىنغانلىقى مەلۇم.
ما شىڭرۇي ۋەزىپە ئۆتەۋاتقان مەزگىلدە يەنە ئۈرۈمچى شەھىرى كوۋىد يۇقۇمى سەۋەبىدىن 2022-يىلى ئاۋغۇستتىن باشلاپ 100 كۈندىن ئارتۇق قامال قىلىنغان. 24-نويابىر، ئۈرۈمچىدىكى بىر ئائىلىلىكلەر قورۇسىدا زور ئوت ئاپىتى يۈز بېرىپ، 20 دىن ئارتۇق ئۇيغۇر ئاھالە قازا قىلغان.
ما شىڭرۈي 2025-يىلى ئىيۇلدا ئۇيغۇر رايونىدىكى ۋەزىپىسىدىن يۆتكىلىپ، مەركىزىي كومىتېت يېزا خىزمىتىگە رەھبەرلىك قىلىش گورۇپپىسىنىڭ مۇئاۋىن باشلىقلىقىغا تەيىنلەنگەن. ئەمما ئۇ شۇنىڭدىن كېيىن قاتنىشىشقا تېگىشلىك چوڭ يىغىن ۋە پائالىيەتلەردە كۆرۈنمىگەن. گەرچە ئۇنىڭ ھازىر كونكرېت قايسى جىنايەت بىلەن تەكشۈرۈلۈۋاتقانلىقى ئاشكارىلانمىغان بولسىمۇ، بۇ خەۋەر تۈپەيلىدىن خەلقارا مەتبۇئاتلارنىڭ دىققىتى يەنە بىر قېتىم خىتاينىڭ ئۇيغۇرلارغا قاراتقان ئىرقىي قىرغىنچىلىق سىياسىتىگە مەركەزلەشكەن.
ما شىڭرۈي خىتايدا بۇ يىل ۋەزىپىسىدىن ئېلىپ تاشلانغان ئەڭ يۇقىرى دەرىجىلىك سىياسىي ئەربابلارنىڭ بىرى بولۇپ قالدى.