Altun tawaqliq tilemchilerning qurban héyti


2007-12-24
Share

Erkin dunya musulmanliri cheksiz söyünüsh we iptixarlinish tuyghusi ichide özlirining mubarek qurban héytini tentene bilen tebriklewatqan shu künlerde, diniy étiqad, démokratiye, kishilik hoqoq we qanun - tüzümning düshmini hésablan'ghan xitay kommunistik hakimiyitining manapolluqidiki adaletsiz we rehimsiz bir séstima ichide yashawatqan sherqiy türkistan mosulmanliri, jümlidin Uyghur xelqi bügünki künde dunya musulmanlirining bu ortaq xoshalliqidin mustesna halda qayghu we elem ichide yashashqa mejbur bolmaqta.

Kommunist hakimiyetning qolgha keltürgen " ajayip muwapiqiyetliri"

Mubarek qurban héyt kirgendin buyan, sherqiy türkistandiki xitay metbu'atliri, kommunist hakimiyetning qolgha keltürgen " ajayip muwapiqiyetliri" ni bolushigha maxtap kökke kötürüp, goya Uyghur musulmanlirini xitay hakimiyitining " shepqiti " astida her küni gösh - maygha chilinip rahet - paraghet ichide yashawatqandek bir saxta menzirini peyda qilishqa tirishmaqta.

Atalmish " aptonom rayonluq xelq hökümiti " ning re'isi isma'il tiliwaldining 12 - ayning 16 - küni ürümchide qurban héyt munasiwiti bilen hökümet teripidin ötküzülgen qutluqlash murasimida qilghan sözidin melum bolushiche, bu yil sherqiy türkistandiki sheher ahalisining kishi béshigha toghra kilidighan yilliq otturiche kirimi 10 ming 120 yüen'ge, déhqanlarning bolsa 3150 yüen'ge yetkenmish.

Uyghurlarning nopusining 85 pirsentidin köpreki yenila yézilarda

Undaqta bügün sherqiy türkistanning sheherliride kimler yashawatidu ? elwettiki xitay köchmenliri yashawatidu, Uyghurlarning nopusining 85 pirsentidin köpreki yenila yézilarda yashimaqta, démek, bu 10 ming 120 yüenlik kirimning Uyghurlar bilen anche chong bir alaqisi yoq, emdi déhqanlarning 3150 yüenlik kirimige kelsek, hökümetning resmiy statistikilirida, bügün qeshqer déhqanlirining yilliq kishi béshigha toghra kilidighan yilliq otturiche kirimi 1800 yüen, xotenning 1300 yüendin köprek, atush rayonining bolsa 1100 yüen etrapida, hazir Uyghur xelqining nopusining 50 pirsentige yéqinraqi bu 3 wilayette yashimaqta, qisqisi, Uyghur déhqanlirining yilliq otturiche kirimi, pütün sherqiy türkistandiki déhqanlarning yilliq otturiche kirimidinmu bir hessidin artuq töwen, 3150 yüenlik kirim bilenmu Uyghur déhqanlirining anche chong bir alaqisi yoq.

Yene isma'il tiliwaldining qurban héyt harpisida qilghan sözidin melum bolushiche, bu yil sherqiy türkistanning yilliq néfit ishlepchiqirish miqdari 26 milyon tonnidin ashidiken we éshish miqdari 18 yildin buyan xitay buyiche birinchi orunda turup kelgen, tebi'iy gaz ishlepchiqirish miqdarimu 21 milyard kup métirgha yitip, yilliq otturiche éshish sür'iti 27 pirsenttin yuqiri bolghan. Yene kélip, bu yilliq altun ishlepchiqirish miqdarimu 7 tonnidin éship, tarixtiki eng yuqiri sewiye yaritilghan.

Xitayning ichki ölkilirige ishlemchilikke ewetilgen Uyghur déhqanlirining sani bir milyondin ashidu

Qorchaq emeldarlarning bayanlirigha qarisingiz, sherqiy türkistanda pütün ishlepchiqirish sahesi tiz sür'ette tereqqi qilghan, bughu rast, emma ri'alliqqa nezer salsingiz, tereqqi qilmighan we yuqiri kötürülmigen nerse - Uyghur déhqanlirining iqtisadi kirimi we turmush sewiyisidin ibaret.

Hökümetning resmiy istatistikilirigha asaslan'ghandimu, peqet bu yilning ichidila sherqiy türkistandin xitayning ichki ölkilirige ishlemchilikke ewetilgen Uyghur déhqanlirining sani bir milyondin ashidu, bu bichariler hazirmu hem ichki ölkilerdiki rehimsiz we insapsiz xitay xojayinlirining qolida xuddi qullardek kéche - kündüzlep ishleshke mejbur bolmaqta, emma yilda bir kilidighan mubarek qurban héytta bu bicharilerning ghémini qilidighan héchbir emeldar yaki hökümet yoq, xitay metbu'atlirigha diqqet qilidighan bolsingiz, qurban héytni tebriklesh munasiwiti bilen hökümet teripidin oyushturulghan murasimlarda, héch bir hökümet emeldarining, xitayning ichki ölkiliride mejburiy medikarliqqa séliniwatqan Uyghurlarni tilgha élipmu qoymighanliqini bayqiyalaysiz.

Ismi - jismigha layiq altun tawaqliq tilemchiler

Qurban héyt kirgendin buyan, xitayning ichki ölkiliride xitay xojayinlirigha yallinip ishlewatqan Uyghur déhqanlirining bayram ötküzüsh üchün yurtlirigha qaytqanliqi heqqide héch bir uchur yoq.

Xitayning chaghinini köz aldingizgha keltürüp béqing, her yilliq chaghan mezgilide sherqiy türkistandiki her derijilik hökümetler xitay aqqunlirining öz yurtlirigha qaytip chaghan ötküzüshi üchün omumyüzlük seperwerlik élip baridu, tömür yol we hawa qatnishi üchün mexsus léniyelerni köpeytip orunlashturidu, ish heqqi, banka resmiyiti we bashqa maddi jehetlerde alahide étibar bérish tüzümlirini yolgha qoyidu.

Démek, yuqurqi sélishturmigha qaraydighan bolsaq, bügün Uyghur xelqining neqeder éghir bir xorluq we adaletsizlik ichide yashawatqanliqini körüwélish tes emes, bir waril yeni bir tung néfitning bahasi 100 dollardin ashqan bügünki künde, néfit déngizi hésablan'ghan jungghar we tarim wadisida yashawatqan Uyghurlar xuddi chet'ellik siyasiy küzetküchilerning atap kelginidek, heqiqeten ismi - jismigha layiq altun tawaqliq tilemchilerdin ibaret. (Perhat muhemmidi)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet