Amérikida chiqidighan "mari klér" zhornili rabiye qadirgha mukapat berdi


2004.11.22

Amérikida chiqidighan dangliq "mari klér" ayallar zhornili 2004 - yili 12 - aydiki sanida, dunyadiki 10 ayal qehrimanni mukapatlap, bularning arisida Uyghur karxanichi rabiye qadirgha ayallar hoquqini ilgiri sürüshte qoshqan töhpisi boyiche mukapat berdi.

On "dunya ayalliri" ning biri

rebiya_150.jpg

"Mari klér" zhornili mukapatlighan 10 ayal dunyadiki nechche onlighan ayal qehrimanliri arisidin inchikilik bilen tallap chiqilghan bolup, namzatlar Uyghur élidin tartip, asiya, yawropa we afriqa qatarliq jaylarghiche tarqalghan. Mezkur zhornal bu 10 ayalning insanlargha qoshqan töhpisi, tewrenmes iradisi we harmas emgikini étirap qilish we righbetlendürüsh süpitide ulargha "dunyaning ayalliri" dep atalghan bu mukapatni bergen we mezkur programma üchün 50 ming dollar ajratqan.

Zhornalda yene, her bir mukapatqa érishküchilerning qisqiche tarixi we ish- izliri tonushturulup, ularning mukapatqa érishish türi körsitilgen. Uningda ayallar hoquqini ilgiri sürüshke qoshqan töhpisi boyiche mukapatlan'ghan rabiye qadirning nöwette türmidiki ehwalining nacharliqi we ten salametlikining yaxshi bolalmaywatqanliqi yézilghan.

"Men heq ish qildim, shunga xitay saqchiliri aldida béshinglarni igiz kötürüp merdane ménginglar"

"Ming anilar herikiti" ning berpa qilghuchisi

Zhornal yene, rabiye qadirning birleshken döletler teshkilatining 4 - nöwetlik ayallar qurultiyigha qatnashqanliqini we uning türtkiside Uyghur éligha qaytip kelgendin kéyin "ming ana herikiti" ni berpa qilghanliqini yazidu. Rabiye qadirning yoldishi, hazir amérikida yashawatqan sidiq haji rozi ependi bizning ziyaritimizni qobul qilip, rabiye xanimning "ming ana herikiti" pa'aliyitini tonushturdi.

"Béshinglarni igiz kötürüp merdane ménginglar"

"Mari klér" zhornili rabiye qadirni tonushturup teyyarlighan bétide yene, uning peqet hökümet élan qilghan gézit-zhornallarni yoldishigha ewetkenliki üchünla xitay hökümiti teripidin "dölet mexpiyetlikini ashkarilashqa urun'ghan" dégen jinayet bilen 8 yilliq qamaq jazasigha tartilghanliqi yézilghan. Hemde rabiye qadirning türmide yétip turupmu insan hoquqi jümlidin Uyghurlar üchün küresh qilish iradisidin qet'iy yanmay hetta balilirigha "men heq ish qildim, shunga xitay saqchiliri aldida béshinglarni igiz kötürüp merdane ménginglar" dégen sözini neqil keltürgen. Rabiye xanimning bu sözlirini eslep ötken sidiq haji rozi ependi mundaq dédi:

Rabiye qadir téxi buning aldida 2004 - yilliq "rafto" xelq'ara kishilik hoquq mukapatigha érishken bolup, adette bu mukapatqa érishküchilerning köpinchisi uzun ötmeyla nobél tinchliq mukapatigha érishken idi. Rabiye qadirning arqa-arqidin xelq'araliq mukapatlargha érishiwatqanliqi heqqide toxtalghan sidiq haji rozi ependi, özining hemmidin bek bu arqiliq Uyghurlar mesilisining dunyagha tonuliwatqanliqidin xushal ikenlikini bildürdi:

Xitay hökümiti xelq'ara kechürüm teshkilati qatarliq kishilik hoquq teshkilatlirining bésimi astida bu yil, rabiye qadirgha bérilgen késimni bir yil qisqartqan bolup, shundaq bolghanda rabiye xanim 2006 - yili 8 - ayning 11 - küni qoyup bérilishi kérek. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.