Чапчалдики йәр тәврәш апәт райони һәққидә учурлар

Уйғур елидики илгирики йәр тәврәшләрдин бир көрүнүш.

Йәрлик даириләр тарқатқан хәвәрлиридә мәзкур йәр тәврәшниң тәсириниң анчә еғир болмиғанлиқини, өлүм‏ - йетим әһвали көрүлмигәнликини қәйт қилған болсиму , әмма апәттики хәлқниң һазирқи һаят әһваллири һәққидә тәпсилий мәлумат бәрмиди , җудунға тоғра кәлгән бу йәр тәврәш апитиниң хәлқниң һаятиға қанчилик тәсир пәйда қиливатқанлиқи , апәттики хәлқниң немиләргә муһтаҗ икәнлики һәққидә йәниму толуқрақ мәлумат елиш үчүн чапчал наһийисидин учурлар игилидуқ.

Бәш миңға йеқин амма бивастә тәсиргә учриди

Уйғур елиниң или областиға қарашлиқ чапчал наһийиси тәвәсидә 25 - январ әтигән саәт 7дин 47 минут өткәндә 5 бал әтрапида йәр тәвригән болуп, хәвәр торлири һәмдә или областиниң һөкүмәт учур торидин ашкарилинишичә, бу қетимлиқ йәртәврәштә апәткә учриған адәм 4549 ға йәткән.

Чапчал наһийисини мәркәз қилған бу қетимлиқ йәр тәврәштә чапчал наһийисидин 76 километир йирақтики ғулҗа шәһәр ичи һәмдә 25 километир йирақтики қорғас наһийилиридиму силкинишниң ениқ тәсири көрүлгән. Даириләрниң дәсләпки толуқ болмиған статистикисида көрситишичә, чапчал һәмдә қорғас наһийилирини һәмдә бәш тағлиқ кәнт ‏ - йезиларни өз ичигә алған йәр тәврәш мәркизи районлирида 11 өй өрүлгән . 133Аилиликниң 416 еғиз өйигә дәз кәткән . 2950 Купметир әтрапида қотанлар бузулған ,бәш миңға йеқин апәткә учриған амминиң ичидә еғир апәткә учриған адәм 588 нәпәргә йәткән , өйлири өрүлгән вә дәз кәткән 305 киши чидирларға көчүрүлгән.

Чапчал наһийилик һөкүмәт апәттин қутқузуш ишханисиниң или һөкүмәт учур торида елан қилишиға қариғанда , һазирға қәдәр адәм яки мал ‏ - чарвиларниң өлүш яки ярилиниш әһваллири мәлум қилинмиған.

Апәттики хәлқ йеқилғу һәм ашлиққа муһтаҗ

Чапчал наһийә базиридин телефон зияритимизни қобул қилған бир уйғур аял , йәр тәврәшниң наһийә ичидики аммиға анчә чоң тәсир көрсәтмигәнликини ,әмма иттипақ кәнтидики хәлқниң бивастә тәсиргә учриғанлиқини ейтти.

Биз йәр тәврәш апити еғиррақ болған чапчал наһийиси чоң буғра йезисиниң апәт әһвали һәққидә тәпсилий мәлумат елиш үчүн , йезилиқ һөкүмәт ишханисиға телефон қилдуқ, исмини ашкарилашни халимиған бир йезилиқ һөкүмәт хадими апәтниң тәсиригә учрап өйлири өрүлгән вә чак кәткән бир қисим деһқанларниң чидирларға көчүп кириватқанлиқини, апәт әһвалини тәкшүрүш хизмитиниң давамлишиватқанлиқини , нөвәттә апәттин қутқузуш хизмитидә амминиң йеқилғу һәмдә ашлиққа муһтаҗ боливатқанлиқини билдүрди.

Апәттә қалған бир қисим амма йәнила хәтәрлик өйләрдә олтурушқа мәҗбур болмақта

Или областлиқ һөкүмәт учур торида гәрчә чапчалдики йәр тәврәш апити һәққидә бәзи хәвәрләр берилгән болсиму, мәзкур хәвәрләрдә пәқәт , област һәм наһийә рәһбәрлириниң чағанлиқ дәм елишини қурбан қилип йәр тәврәш апитигә учриған хәлққә бәкму көңүл бөлүватқанлиқини , һөкүмәтниң апәттин қутқузуш тәйярлиқини җиддий елип бериватқанлиқини , апәттики хәлққә 50 чедир әвәтилгәнликини тәшвиқ қилған .

Әпсус апәттики хәлқниң қандақ қийинчилиқларға учраватқанлиқи һәм қандақ ярдәмләргә муһтаҗ икәнлики һәққидә һечқандақ учур бәрмигән.
 
Бу қетимлиқ йәр тәврәштә чапчал наһийисиниң чоңбуғра йезиси иттипақ кәнтиниң апәткә учраш әһвали бир қәдәр еғир болуп , биз бу кәнттики апәткә учриған амма билән алақилишишқа тириштуқ ,телефонимиз иттипақ кәнтигә наһайити тәстә уланди. Зияритимизни қобул қилған бир деһқан аял йәр тәврәш апити йүз бәргинигә икки күн болған болсиму , һөкүмәтниң ярдәмлириниң һәтта чидирниңму техи бу йезидики апәттә қалған хәлққә йетип кәлмигәнликини, өйигә чак кәткән қошнисиниңму һазирғичә хәтәрлик өйдә олтуруватқанлиқини билдүрди.

Чапчалда йүз бәргән йәр тәврәш апити или областида қишниң җудун күнлиригә тоғра кәлди, һаварайи учуридин мәлум болушичә , ғулҗа тәвәсиниң бүгүнки һава температуриси нөлдин төвән 10 гирадус әтрапида болуп , бир нәччә күн ичидә қар йеғип қелиши мумкин.