Hüsenjan: ‏eydiz insanlar tewbe qilghanda yoqilidu

Her yili 12‏-ayning 1‏-küni dunya eydiz küni. Bu yilqisi dunya eydizge qarshi turush künining 24‏-qétimliq seperwerlikidur. Shu munasiwet bilen eydiz kebi qebih késellerning mahiyitini izdep, ilahi desturlargha hawale qilghan iduq.
Ixtiyariy muxbirimiz pida'iy
2011-11-30
Share
Husenjan-Gollandiye-TV-qanilida-uyghurlar-heqqide-inkas-305.jpg Hüsenjan gollandiyidiki islam nmo qanilida 2009-yili 5-iyul küni xitayning Uyghurlargha qaratqan qirghinchiliqi heqqide ispat bériwatmaqta.
RFA/Pidaiy

Gollandiyide yashawatqan hüsenjan ependim bu mesile heqqide bilgenlirini hemdusana oqush bilen birge musibetke duchar bolghanlargha du'a qilip turup shundaq anglatti.

-Allahqa hemdilirmiz, peyghember sellehu eleyhi wesellemge durut we salmimiz bolsun. Bügün eydiz küni munasiwiti bilen insanlar ichide yamrawatqan eydiz késilidin ibaret bu wabadin, ulugh perwerdigarimizning pütkül insaniyet dunyasini qutulduruwélishni soraymen we bu késelni yuqturuwalghan minglighan bigunah insanlargha allaning shipaliq bérishini ümid qilimen.

U eydiz balasini, ilahi desturlarda bayan qilin'ghan ré'al weqeler we ularning halakiti bilen delillep, mundaq dédi:
-Eydiz, saris, siflis, dégendek bu wabalar yéqinqi yillardin biri insanlar arisigha tarqilishqa bashlidi. Buni shundaq déyishke boliduki؛ bu perwerdigarning heddidin ashqan quwumlerge bergen jazasining bir qismi. Yeni insaniyet dunyasigha bérilgen agahlandurush. Alla qur'an kerimide insanlarning yaman qilmishliri tüpeyli quruqluqta we déngizda apet yüz bérishke bashlidi. Dep insanlarning arisigha mundaq késellerning tarqilishni herxil apetlerning köpiyishni insanlarning yaman qilmishliri yeni gunah me'ishetke pétip yaratquchisidin yiraqlashqanliqi tüpeylidin boluwatqanliqini alla bizge agahlandurush xaraktéride dep bériwatidu. Halbuki bendiler bolsa gheplette allaning ayetlirige qulaq salmaywatidu. Shuning üchün gunah me'ishetler balayi'apetler bilen netijiliniwatidu.

Hüsenjan, exlaq krizisining bedili boluwatqan bu xil riyakarliqning tarixtiki büyük ülgiliri heqqide misallar keltürüp, uning heqqide chiqirilghan qur'an-hedisning hökümlirini mundaq anglatti.

-Bu xil balalar yéqinqi yillardila yüz bergen bir ish emes. Belki, burunqi ümmetlerdimu körülgen. Mesilen: lut eleyhissalamning qowmimu allaning buyruqidin yüz örüp zinayi-zalalatlerge pétip, liwate ewj alghan waqtida, lot qowmining shu waqittiki peyghembiri lut eleyhissalam, ularni liwate (bechchiwazliq qilish yaki jinisdashlar ara muhebbetleshmek) qilmasliqqa chaqirghan. Yeni "... Alla silerge shunche güzel qizlarni xotunluqqa élishqa buyrusa, siler némishqa erler bilen erler toy qilisiler?" dep ulargha allaning jazasi chüshidighanliqi bilen agahlandurghan. Shu waqittiki u millet peyghembirining bu sözlirige qulaq salmighan. Axirida allaning jazasi ulargha ewetilgen. Islamning qanuni bolghan qur'an kerimide: "Ötken ümmetlerning bu xil halakiti bayan qilinish arqiliq alla bizlerge, silermu zina zalaletke patsanglar, liwate qilsanglar shu lutning qowmigha oxshash qismetke duchar bolisiler yaki undinmu qattiq azab silerni qorshiwalidu" dep agahlandurush bergen.

Peyghember eleyhissalam 1400 yilning aldidila bu xil késelliklerning otturigha chiqishidin ümmetni agahlandurghan. Ibni maje riwayet qilghan "Sehi hedis" ta: "Bir qowmda pahishe ashkara bolghanda hetta uning élanliri her yerge tarqalghanda, ularning ichide ata bowilirining arisida bolup baqmighan waba we aghriqlar tarqilip kétidu." deydu. Mana bu hedis bu késellerning otturigha chiqishigha qarshi islamning bizge bergen eng chong agahlandurushlirining biridur.

U yene eydiz késilining kélip chiqishi we tarqilishi heqqide toxtilip:
-Tunji eydiz bimari 1983 yili fransiyide bayqaldi. Bu kishi liwatichi idi. Yeni bechchiwaz. Liwatichiliq-dinimizda qattiqi cheklen'gen bir gunah. Undin bir yil kéyin bu késel amérikida bayqaldi. Shundaq qilip pütün dunyagha tarqaldi. Hetta wetinimiz sherqiy türkistandimu tiz sür'ette yamrashqa bashlidi, dédi.

Eydiz wirusi bayqalghandin kéyin dunyadiki meshhur tetqiqatchi doxturlar, bu wirusqa qarshi dora üchün 25 yildin biri qattiq izdiniwatidu. Insaniyet dunyasida bu wabalar peyda bolghandin kéyin, hemme seperwerlikke kélip bu késellikning aldini élishqa térishiwatidu. Herxil usullar üstide izdiniwatidiyu, emma késelge giriptar bolghuchilarning sani yildin-yilgha köpiyiwatidu. Bu néme üchün?

-Buning sewebi shuki: eydiz, siflis kebi késelliklerni keltürüp chiqiridighan menbeler ünümlük bir shekilde tosalmaywatidu. Qur'an we hedisning hökümi boyiche bu ümmet? ötkenki ümmetlerning halidin ibret élishi kérek idi. Insaniyet dunyasini weyran qiliwatqan bu xil siflis, eydiz késelliklirining kélip chiqishigha seweb boluwatqan amillarni yoq qilishi, omumyüzlük islah qilishi kérek idi. Elwette, eydizning yuqush yolliridin biri bolghan zeherlik chékimlik, pütün dunya miqyasida oxshash shekilde cheklendi. Buninggha qarshi döletlerde qanunlar chiqirildi. Bir tereptin pütün hökümet we xelq ammisi ortaq xizmet qiliwatidu. Epsus eydiz wirusining kélip chiqish menbesi bolghan pahishixanilar, liwate qilish-er bilen er toy qilish qatarliq ishlargha qarshi turush uyaqta tursun؛ belki, qanunlishiwatidu. Bu xil menbelerdin insanlar arisida késelliklerning tarqilishigha téximu keng yol échiliwatidu. Yéghip éytqanda: insanlar allaning buyruqigha qarshi eng chong xataliqqa qarap méngiwatidu.

U söhbet axirida eydiz balasidin qachan we qandaq qutulghili bolidighanliqi heqqide öz köz qarishini xulasilep: peyghember eleyhissalamning؛ her qandaq késelning shipasi bolidu. Dégen hedisi bar. Insanlar zina-pahishdin yiraq bolghanda, liwatiler(bechchiwazliq qilghuchilar yaki jinisdashlar ara muhebbetleshküchiler dégen menide) süpürülgende, zeherlik chékimlikler yoqitilghanda bu xil késelliklerning yiltizi quruydu. Insanlar allahqa tewbe qilghanda, allahqa yéqinlashqanda, perwerdigarimiz bu wabalargha bir shipaliq ewetküsi, dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet