Özbék öktichiliri islam kerimof üstidin xelq'ara sot mehkimisige erz sundi

“Erkin özbékistan dostluq munbiri” özbékistanda 7 yil ilgiri köp sanda ademning ölüshi bilen axirlashqan “Endijan qetli'ami” ning 7 yilliqi munasiwiti bilen axbarat élan qilish yighini ötküzdi we özbékistan re'isi islam kerimofni qirghinchiliq qilish jinayiti bilen eyiblep sotqa tartilishini telep qilip xelq'ara sot mehkimisige erz sundi.

Bu teshkilat, 2012-yili 5-ayning 10-küni istanbulda pa'aliyet ötküzüp özbékistan dölet re'isi kerimofni eyiblep sotqa tartilishini telep qilghan.
“Erkin özbékistan dostluq munbiri” ning mes'ulliridin elibey yolyaxshi ependi, buningdin 7 yil ilgiri özbékistanda yüz bergen endijan qetli'amining jawabkarining özbékistan dölet re'isi kerimof ikenlikini bildürdi.

Bu teshkilatning bash katipi borhan kawunji ependi teripidin sunulghan erznamining axirida mundaq yézilghan:
“2005-Yili 5-ayning 12-13-künliri özbékistanning endijan shehiride we kéyin özbékistanning oxshimighan sheherliride jinayetchi kerimof teripidin xelq ammisigha qarshi kolléktip shekilde élip bérilghan tutqun qilish, sürgün qilish, köchüshke mejburlash, xelq'ara qanunlargha xilap türmige qamash, qirghin qilish, jismaniy erkinlikke dexli-teruz qilish qatarliq depsendichilikler insaniyetke qarshi jinayet we qirghinchiliq jinayiti hésablinidu. Bu erznamini oqup chiqip jinayetchi üstidin tekshürüsh élip bérishni sot mehkimiside sot échilishini telep qilimiz.”

Biz bu heqte erkin özbékistan dostliri munbirining mes'ulliridin nurmömin we elibey yolyaxshi ependiler bilen söhbet élip barduq.