«Уйғур аптоном районидики милләтләрниң әйдиз нисбити» дин туғулған шүбһиләр

Уйғур елидики сәһийә тармақлири, бәзи гезит вә тор бәтләрдә «уйғур аптоном районидики милләтләрниң әйдиз нисбити» ни елан қилған.
Мухбиримиз гүлчеһрә
2012-09-05
Елхәт
Пикир
Share
Принт
Уйғур аптоном районидики милләтләрниң әйдиз нисбити статистикиси. 2012-Йили.
Уйғур аптоном районидики милләтләрниң әйдиз нисбити статистикиси. 2012-Йили.
www.yarp.net.cn

Униңда уйғур ели миқясида һазирғичә байқалған 36 миңдин артуқ әйдиз юқумдарлириниң ичидә уйғурларниң 27058 нәпәр, хитайларниң 2337 нәпәр, туңганларниң 1315 нәпәр, қалған санни башқа милләтләрниң игиләйдиғанлиқи көрситилгән.

Гәрчә бу хитай даирилириниң милләтләрниң әйдиз нисбитини тунҗи қетим елан қилиши болсиму, мәзкур статистика кишиләрдә шүбһә вә нәпрәт пәйда қилған.

Бу һәқтә пикир баян қилған чәтәлләрдики уйғур зиялийлар болса бу санға гуман билән қараштин сирт, буни хитайниң уйғурларни йәниму кәмситиш, йәниму чүшкүнләштүрүшни мәқсәт қилған бир һәрикити, дәп қаримақта.

«Уйғур аптоном районидики милләтләрниң әйдиз нисбити» намлиқ статистикилиқ хәвәр «ярп» зәһәрлик чекимлик вә әйдиздин мудапиәлиниш ториға көчүрүп чапланған. Хәвәргә «уйғур аптоном районимизда әйдиз билән юқумланғучилар һәр қайси милләтләр ара пәрққә игә болған болуп, бу милләтниң характери билән еңиға мунасивәтлик болса керәк, шундақла әхлақсизлиққа җамаәт пикри назарәтчиликиму болмайватқанлиқидин болса керәк» дегәндәк кәмситиш характерини алған изаһатлар йезилған.

Буниңға чүшәндүрүш бәргән тор бәт саһиби әхмәт қурбан әпәнди: бу җүмлиләр тор бәт хадимлириниң өзиниң шәхси қариши болуши мумкин, деди.

Канада уйғур җәмийитиниң сабиқ рәиси руқийә турдуш ханим болса: мәйли бу санлиқ мәлумат раст яки ялған болсун, әмәлийәт шуки уйғурлардики зәһәрлик чекимлик вә әйдизниң тарқилишини хитай һөкүмитиниң уйғурларға йүргүзүватқан сияситидин айрип қариғили болмайду. Хитай уйғурларни йоқитиш үчүн әйдизгә охшаш милләтниң мәвҗудийитигә тәһдит елип келиватқан зияндашларниң тарқилишни тосмайла қалмай, әксичә йәниму кәң тарқилишиға йол ечип бәрди вә әсли уйғурларниң өзидә әсли бар болған дин, мәдәнийәт вә миллий әхлақидин ибарәт бу хил вабаларға тақабил туруш күчиниму аҗизлаштурмақта.

Хитай һөкүмити һәтта әң ахири уйғурларни роһий җәһәттиму чүшкүнләштүрүп түгәтмәкчи болуватиду. Уйғурлар мәсилиниң негизни тонуп йетип, өзлүкидин ойғанмиғучә хитайниң һазирқи сиясити билән уйғурлардики әйдиз мәсилиси йәниму еғирлап бариду, дәп агаһландурди.

Пикирләр (0)
Share
Толуқ бәт