Хитайниң зәһәрлик сүт мәһсулатлиридин дуня һәзәр әйлимәктә

Хитайдики бовақлар сүт парашокидин зәһәрлиниш мәсилиси еғир киризис һасил қилди. Сүрәттә, хитай анилар зәһәрлик мадда бар сүт парашокини қоллирида көтүрүп наразилиқини билдүрмәктә.

Тәкшүрүш доклати йоллинип 38 күн өткәндә, андин юқириға мәлум қилинған

Мәркизи агентлиқиниң баян қилишичә, шиҗяҗуаң шәһиридики 'сәнлу' маркилиқ сүт парашуки гуруһиниң 'сәнлу' сүт мәһсулатлири тоғрисидики тәкшүрүш доклати шәһәрлик парткомға йоллинип 38 күн өткәндә, андин мәсилә хебей өлкилик парткомға мәлум қилинған. Бу җәрянда сәнлу маркилиқ сүт парашуки билән зәһәрлинип кесәл болған кичик балиларниң сани 50 миңдин ашқан.

'Сәнлу' сүт парашуки өткән айдила базардин чекиндүрүлүшкә башлиған

Роейтерс агентлиқиниң бүгүн бейҗиңдин баян қилишичә, хитайниң 'сәнлу' маркилиқ сүт парашуки билән тәминләнгән кичик балилар кесәл болушқа башлиғандин кейин, сингапор, малайшия, бруней, хоңкоң, тәйвән, японийә, бенгал, габон, бурунди, филипинләрдә хитайниң сүт мәһсулатлири базардин чекиндүрүлүшкә башлиди.

Хәвәрдә баян қилинишичә, мунасивәтлик орунлар өткән айдила хитайниң 'сәнлу' маркилиқ сүт парашокида бөрәктә таш пәйда қилидиған 'меланин' дәп атилидиған хемийивий мадда барлиқини ениқлап чиққан иди. Хоңкоңдики 'ханиш маргарит дохтурханиси'ниң балилар дохтури чав чуңбоң 'сәнлу' маркилиқ сүт парашукини қолланған икки кичик балиниң бөрикидә таш һасил болғанлиқини мәлум қилғандин кейинла, тәйвәндә хитайдин киргән бу хил сүт парашукини инчикиләп тәкшүрүшкә башлиған иди. Африқидики намрат дөләтләрдин габон, бурундиларму хитайдин бу хил сүт парашукини импорт қилишни чәклигән вә голландийә ширкәтлириму бу хил сүт мәһсулатлирини сингапор, хоңкоң, макавлардики базарлардин чекиндүрүшкә башлиған иди.

Японийә 'сәнлу' сүт парашукини 90 миң ширкәттин ениқлашни тәләп қилған

японийиниң һөкүмәт баянатчиси набутака макимураниң ейтишичә, японийә сәһийә министирлиқи хитайниң зәһәрлик мелатин хемийивий маддиси бар сүт мәһсулатлири импорт қилинған яки қилинмиғанлиқини дуня миқясида 90 миң ширкәттин ениқлашни тәләп қилди.
 
Җәнубий корийиниң намяң сүт мәһсулатлири ширкити болса, хитайниң бу хил зәһәрлик сүт мәһсулатлиридин тәхминән һәр һәптидә 16 миң қута сетип келиватқанлиқини, әмди буни базарға салмайдиғанлиқини җакарлиди.

Сәнлу гуруһиниң партком секритари, мәбләғ мудири 'биринчи май шөһрәт медали' бар әрбаб

Америка авазиниң баян қилишичә, шиҗяҗуаң шәһиридики сәнлу гуруһи хитайниң йемәк санаити саһәсидә алтә йилдин буян алдинқи орунда туридиған ширкәт дәп санилип келиватқан ширкәтләрниң бири. Бу ширкәтниң партком секритари, мәбләғ мудири тйән венху йиллардин буян хитайда 'биринчи май шөһрәт медали' алған' әрбаб, 'мәмликәтлик әмгәк нәмуничиси', 'сәккизинчи март қизилбайрақдари' дәп махтилип келиватқан вә мәмликәтлик сиясий кеңәшниң әзаси болуп туруватқан имтиязлиқ әрбаб.

'Сәнлу' сәтчилики хитайда узундин буян мәвҗут сақлиниватқан йемәк - ичмәк бихәтәрлики мәсилилириниң давами

Америкида чиқидиған 'заман' журнили 9 ‏ - айниң 16 ‏ - күни елан қилған доклатта баян қилинишичә, хитайда 'сәнлу' маркилиқ сүт мәһсулатлири сәтчилики хитайда узундин буян мәвҗут болуп келиватқан йемәк - ичмәк бихәтәрлики мәсилилириниң давами икәнлики йәнә бир қетим испатланди.

Бу доклатта ейтилишичә йәнә, дуня хитайда ишләпчиқирилған өй һайванлири йемәклириниң америкида миңлиған түмәнлигән ит вә мүшүкләрни өлтүргәнликини көрди. Һазир америка хәлқи хитайда ишләпчиқирилған һайванат йемәклиридин аллиқачан һәзәр әйлиди.

'Дөләтни пән - илим билән башқуруш' дәватқан ху җинтав, вен җябав һөкүмитиниң бир партийә түзүми астида йүз бериватқан мәсилә

Хитайниң сабиқ рәһбири җав зияңниң катиби бавтуң әпәндиниң радиомиз үчүн язған обзорида баян қилинишичә, хитайда сәнлу гуруһи пәвқуладдә имтиязға игә ширкәт. Униң башлиқиниң өзила партком секритари. Бу ширкәтниң бултур сатқан мәһсулатлириниң қиммити 10 милярд юәндин ашқан. Йиллиқ пайдиси %15 дин тохтаватиду.

Бавтуң әпәндиниң баян қилишичә, мәсилә әмди паш болуватиду, гәрчә шинхуа агентлиқи һазир бу мәсилини 'чәтәлләр җуңго мәһсулатлирини яман көрситиватиду' дәп җар селиватсиму, әмәлийәттә һәр қандақ адәм бундақ мәсилиниң ширкәттики мәсилә яки җинайәт делоси икәнликини биләләйду, тоғрисини ейтқанда, бу пән - илим билән дөләтни башқуруш дәватқан ху җинтав, вен җябав һөкүмитиниң бир партийә түзүми астида йүз бериватқан мәсилә.