Хитай сақчилириниң уйғур районидики “йүз күнлүк һәрикәт” нәтиҗиси елан қилинған

Мухбиримиз әзиз
2022.08.26
Share on WhatsApp
Share on WhatsApp

Хитай һөкүмити башқуришидики “хитай хәвәрлири тори” ниң 26-авғусттики хәвиридә ейтилишичә, уйғур аптоном районлуқ җамаәт хәвпсизлик (җ х) назаритиниң ахбарат елан қилиш йиғинида йеқинқи “йүз күнлүк һәркәт” ниң нәтиҗилири елан қилинған.

Хәвәрдә ейтилишичә, бу йил авғустниң ахириғичә давам қилған бу қетимқи “йүз күнлүк һәркәт” тә җәмийәт тәртипиниң муқимлиқини сақлаш муһим нишан қилинған. Бу җәрянда пүткүл уйғур дияри бойичә төт милйон қетимдин көпрәк сақчи күчлири ишқа селинған. Хәлқ аммисидин сәпәрвәрликкә кәлтүрүлгәнләрму төт милйон адәм қетимдин ашқан. Бу җәрянда 20 миңдин көпрәк җинайәт гумандари қолға елинған болуп, 40 милйон сомдин көпрәк һарам мал қайтуруп келингән.

Хитай ахбарат вастилири бу қетимқи сақчиларниң зәрбә бериш һәркитидә бир қисим җинайи ишларға даир делоларниң паш қилинғанлиқини тәкитлигән болсиму, бу қетимқи зәрбә бериштә юқури пән-техника вастилириниң һәмдә “хәлқ аммисиниң маслишиши” ниң чоң рол ойниғанлиқини алаһидә тилға алған. Шуниң билән биргә җинайи ишлар делосиниң йүз бериш нисбити өткән йилдикидин 20 пирсәнт төвәнлигәнликини алаһидә гәвдиләндүргән.

Хитай һөкүмитиниң уйғур дияридики сақчи күчлиригә аҗратқан хамчотини тәтқиқ қилип чиққан мутәхәссисләрдин доктур адрян зенз 2018-йилиниң өзидила уйғур дияридики бихәтәрлик хираҗитиниң 92 пирсәнт ашурулуп 58 милярд сом (тоққуз милярд америка доллириға йеқин) ға йәткәнликини оттуриға қойған иди. У радийомизниң бу һәқтики зиярәтлирини қобул қилғанда “хитай һөкүмити изчил түрдә ‛қаттиқ зәрбәр бериш‚ яки ‛ашқунлуққа қарши туруш‚ дегәндәк намларда ғайәт зор тутқунни әмәлгә ашуруп кәлмәктә” дегән иди.

Нөвәттә бу қетимлиқ “йүз күнлүк һәркәт” ниңму ашу хилдики тутқунниң бир тәркибий қисми икәнлики алға сүрүлмәктә икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.