"11-сентәбир вәқәси" хатирисидә қурбанлар йәнә бир қетим әсләнди

Мухбиримиз әзиз
2019-09-11
Share

Буниңдин 18 йил илгири, йәни 2001-йили 11-сентәбир күни йүз бәргән "11-сентәбир вәқәси" инсанийәтниң һазирқи заман тарихидики зор вәқәләрниң бири һесаблиниду. Шу күни американиң ню-йорк шәһиридики дуня сода мәркизиниң қошмақ бинаси террорчиларниң айропилан һуҗумида гүмүрүлүп чүшкәндин кейин дуняви миқяста "террорлуққа қарши дуняви бирликсәп" һасил болушқа башлиған иди.

Бу йилқи "11-сентәбир вәқәси" хатирисидә америка президенти доналд трамп вә америка ташқи ишлар министири майк помпейо иҗтимаий таратқуларда баянат елан қилип, бу күнниң террорлуққа қарши дуняви күрәшниң башлиниш нуқтиси болуп қалғанлиқини алаһидә тәкитлиди. Шуниңдәк бирдәк "биз бу күнни мәңгү унтумаймиз" деди. 11-Сентәбир күни чүштин бурун бәш бурҗәклик бинада өткүзүлгән хатириләш паалийитидә доналд трамп "11-сентәбир вәқәсиниң қурбанлири мәңгү ядимизда" деди.

Бу күн һарписида вашингтон шәһиридики уйғур кишилик һоқуқ қурулуши тәшкилатиму мәхсус баянат елан қилип, өзлириниң 11-сентәбир қурбанлирини яд етидиғанлиқини билдүрди. Шуниңдәк әнә шу қетимлиқ вәқәдин кейин башланған "террорлуққа қарши дуняви күрәш" долқунида хитай һөкүмитиниң "террорлуққа қарши туруш" ни суйиистемал қилип уйғурларни бастурушни күчәйткәнликини, нөвәттә болса "террорлуқниң алдини елиш" баһанисидә үч милйончә уйғурни лагерларға қамивалғанлиқини йәнә бир қетим тәкитлиди.

Баянатта улар хәлқара җамаәтни террорлуққа қарши туруш билән хитай һөкүмитиниң "террорлуқ" ни суйиистемал қилип уйғурларни нишан қилған һалда "қаттиқ зәрбә бериш" һәрикитини давам қилдуруши оттурисидики рошән пәрқни тонуп йетишкә чақирди. Шундақла уйғурларниң әмәлийәттә "11-сентәбир вәқәси" ниң әң чоң қурбанлириниң бири икәнликини, шу сәвәбтин террорлуқниң қурбанлирини яд етиш билән биргә өзлириниң миллий кимликини сақлап қелиш үчүн тиришиватқан тинч аһалиниң һуҗум нишани болуп қелишиға хәлқара җамаәтниң ярдәм қилиши лазимлиқини тәкитлиди. Бу җәһәттики конкрет ярдәм түрлириниң бири қатарида америка дөләт мәҗлисидә музакирә қилиниватқан уйғурларға даир қанун лайиһилиригә имза қоюшни тезлитиш үчүн америка пуқралиридин авам вә кеңәш палата әзалириға телефон қилиш яки уларға хәт йезиш тәләп қилинди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт