Chet'ellerdiki xitay démokratliri “4-Iyun weqesi” ni xatirilidi

1989-Yili, 4-iyun küni, béyjing tyen'enmén oqughuchilar herikitining basturulushining 28 yilliqi munasiwiti bilen amérika qoshma shtatliri we bashqa bir qisim ellerdiki xitay démokratliri mezkur weqe qurbanlirini türlük shekilde xatirilidi.

Radi'omiz xitay tili bölümining xewer qilishiche, amérikadiki kishilik hoquq teshkilati“Puqralar hoquqi” ataqliq démokratik öktichi zat yang jyenlining bashchiliqida 3-iyun küni axshamdin 4-iyun sehergiche amérika paytexti washin'gton shehiride mexsus 4-iyun weqesini xatirilesh söhbet yighini achqan we tyen'enmén qurbanlirigha teziye bildürgen.

Shu küni yene amérikaning san-fransisko shehiridiki xitay ahalisi bu yerdiki xitay konsulxanisigha aldida kompartiyening oqughuchilar herikitini basturushigha a'it süret körgezme pa'aliyiti ötküzgen.

6-Ayning 3-küni kéchide xitayning washin'gton shehirige jaylashqan bash elchixanisining aldida bir qisim xitay démokratiye heriket ezaliri sham yéqish pa'aliyiti ötküzüp we nutuq sözlep, 4-iyun weqesini xatiriligen shuningdek shi jinping hökümitidin tyen'enmén oqughuchilar herikitini aqlash pikirlirini otturigha qoyghan. Mundaq sham yéqish arqiliq 4-iyun qurbanlirini xatirilesh xongkongdimu ötküzülgen.

Uyghur kishilik hoquq qurulushimu “4-Iyun weqesi” ning 28 yilliqigha atap mexsus bayanat élan qilip, weqe qurbanlirigha bolghan hésdashliqi, xitay kompartiyesining démokratiye telep qilip, tinch namayish qilghan oqughuchilarni basturghanliqini tenqid qilghan idi.