40 Нәччә дөләт уйғур диярида чәклимисиз тәкшүрүшкә йол қоюшни тәләп қилди

Мухбиримиз әзиз
2021.06.22

Хитай һөкүмити ғәрб дунясидики һәр саһә затлириниң “уйғур қирғинчилиқи” һәққидики тәнқидлирини изчил рәт қилип келиватқан болуп, буниң бир ипадиси мустәқил тәкшүрүш гуруппилириниң уйғур дияридики мустәқил тәкшүрүш паалийәтлиригә чәк қоюшта ипадилинип кәлмәктә.

Ройтерс агентлиқиниң 22-июндики хәвиригә қариғанда, австралийә, әнглийә, фирансийә, германийә, японийә қатарлиқ 40 нәччә дөләт бирләшмә баянат елан қилип, хитай һөкүмитини бирләшкән дөләтләр тәшкилати кишилик һоқуқ алий кеңишиниң уйғур дияридики мустәқил вә чәклимисиз тәкшүрүшигә рухсәт қилишқа чақирди. Хәвәрдә ейтилишичә, бирләшмә баянатта “ишәнчлик мәлуматлар аллиқачан бир милйондин ошуқ кишиниң қанунсиз тутқун қилинип, әркинликтин мәһрум болуватқанлиқини көрсәтмәктә. Биз хитай һөкүмитини бу һәқтики тәкшүрүшкә һечқандақ чәклимә қоймаслиққа җиддий дәвәт қилимиз” дейилиду.

Хитай һөкүмити буниңға тездин инкас қайтуруп, өзлириниң “сиясий ғәрәз арилашқан тәкшүрүш” ни рәт қилидиғанлиқини, бу хил тәкшүрүшниң җәзмән һәмкарлиқ асасида болуши керәкликини билдүргән.

Мәлум болушичә, б д т кишилик һоқуқ алий кеңишиниң рәииси мишел бачелетниң уйғур дияридики мустәқил тәкшүрүш паалийити изчил зиддийәтлик мәсилиләргә дуч келиватқанлиқи үчүн мәзкур баянат елан қилинғаникән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.