Дуня уйғур қурултийи муһаҗирәттики уйғурларни «5‏-июл вәқәси» ни хатириләшкә чақирди

Мухбиримиз әркин
2018-07-02
Елхәт
Пикир
Share
Принт

Йеқинда дуня уйғур қурултийи баянат елан қилип, муһаҗирәттики уйғурларни һәр хил шәкилләрдә «5‏-июл үрүмчи вәқәси» ниң 9 йиллиқини хатириләшкә чақирған.

Д у қ баянатида муһаҗирәттики уйғурларни б д т кишилик һоқуқ кеңиши, явропа парламенти, америка дөләт мәҗлиси вә кишилик һоқуқ тәшкилатлириға мәктуп йезиш, хитайға қарши кәң көләмлик наразилиқ намайишлирини өткүзүш, 5‏-июл күни тор сәһипилирини қарайтиш, чәтәл гезит-журналлирида мақалә елан қилиш, бу бир һәптидә той-төкүн вә көңүл ечиш паалийәтлирини өткүзмәслик, «5‏-июл» қурбанлириға дуа-тилавәт қилиш қатарлиқ паалийәтләр арқилиқ бу қирғинчилиқниң 9 йиллиқини хатириләшни тәләп қилған.

«5‏-Июл үрүмчи вәқәси» ни хитай пуқралириниң гуаңдуң өлкисиниң шавгүән шәһиридики бир оюнчуқ завутида ишләйдиған уйғур ишләмчилирини өлтүрүши кәлтүрүп чиқарған. Хитай һөкүмити 2009‏-йили 5‏-июл күни үрүмчидә намайиш қилип «шавгүән вәқәси» ни адил бир тәрәп қилишни, уйғур ишләмчиләрниң һаятиға капаләтлик қилишини тәләп қилған уйғур намайишчиларни қанлиқ бастурған. Нәтиҗидә намайиш наһайити тезла уйғурлар билән хитай оттурисидики етник тоқунушқа айланған.

Хитай һөкүмити вәқәдә 200 дәк адәм өлгәнлики, өлгәнләрниң көп қисминиң хитай икәнликини җакарлиған. Лекин хәлқарадики уйғур тәшкилатлири мәзкур вәқәдә миңлиған уйғурниң өлтүрүлгәнлики вә из-дерәксиз ғайиб қиливетилгәнликини елан қилған иди.

Д у қ ниң баянатида «шәрқий түркистан хәлқиниң әркинлики вә һөрлүкини қолға кәлтүрүш йолида қиммәтлик һаятлирини тәқдим қилған батур оғул - қизлиримизни яд етиш, уларға еһтирам билдүрүш вә хитай һакимийитиниң хәлқимизгә қарита рәһимсизләрчә йүргүзүватқан ирқий қирғинчилиқини дуня җамаәтчилики алдида паш қилиш - биз чәт’‍әлләрдики барлиқ шәрқий түркистанлиқларниң виҗданий, инсаний вә миллий бурчимиз,» дейилгән.

Пикирләр (0)
Share
Толуқ бәт