"13-Besh yilliq pilan" mezgilide Uyghur élidiki yéza-kent sayahetchiliki 40 milyondin artuq sayahetchini kütüwalidiken

Muxbirimiz qutlan
2017-01-01
Élxet
Pikir
Share
Print


29-Dékabir küni Uyghur aptonom rayonluq sayahet idarisi "Yéza-kent sayahetchiliki we sayahet arqiliq namratlarni yölesh" axbarat élan qilish yighini achqan.

Xitay hökümet taratqulirining bu heqtiki xewirige qarighanda, "13-Besh yilliq pilan" mezgilide, yeni 2020-yilighiche bolghan ariliqta Uyghur aptonom rayonidiki yéza-kent sayahetchiliki xitay ichi we sirtidin 40 milyondin artuq sayahetchini kütüwalidiken.

Uyghur aptonom rayonluq sayahet idarisining bu heqtiki axbaratida mundaq déyilgen: "2020-Yilighiche yéza-kent sayahetchiliki omumiy istémal qimmiti 70 milyard yüendin ashidu. Aptonom rayon boyiche sayahetchilik kinishkisi béjirgen namrat kent 600 ge yetküzülüp, yéza-kent sayahetchiliki bilen shughullinidighan kishilerning sani bir milyondin ashurulidu. Buning bilen aptonom rayonimizdiki 300 ming namrat nopusning namratliqtin qutulush mesilisi hel bolidu."

Uyghur aptonom rayonluq sayahet idarisining yoqiriqi axbarati muhajirettiki Uyghur pa'aliyetchiliri bilen közetküchilerni küchlük endishige salmaqta.

Ular birdek, xitay hökümitining gherbni échish istératégiyesi Uyghur élining yer asti bayliqlirini xoritip, rayonning ékologiyelik tengpungluqini buzup tashlidi. Xitay köchmenlirining türkümlep köchürülishi rayondiki yerlik Uyghurlarni asasiy éqimdin chetleshtürüp, ularning en'eniwiy milliy medeniyiti we turmush usuligha xiris élip keldi. Emdilikte yéza-kent sayahetchiliki dégen wiwiska bilen 40 milyun atalmish "Sayahetchi" ni jelp qilishi Uyghur déhqanlirining tarixtin buyan dawamlashturup kelgen bostanliq medeniyitini sün'iy usulda ghayip qiliwétishi mumkin, dégenlerni ilgiri sürmekte.

Toluq bet