60 Нәпәр парламент әзаси б д т ни уйғур қирғинчилиқини тәкшүрүшкә чақирди

Мухбиримиз әзиз
2021.06.22

Шиветсарийәниң җәнвә шәһиридә бирләшкән дөләтләр тәшкилати (б д т) кишилик һоқуқ кеңиши йиғини чақирилиш һарписида “хитай ишлири бойичә хәлқара парламент иттипақи” ниң 60 нәпәр парламент әзаси б д т ға бирләшмә мәктуп йоллап, “уйғур қирғинчилиқини вә инсанийәткә қарши җинайәтләрни тәкшүрүш комитети” қурушқа чақирди.

Мәзкур иттипақниң тор бетидә 21-июн күни елан қилинған бу һәқтики хәвәрдә ейтилишичә, 18 дөләттики парламент әзалири бирләшкән дөләтләр тәшкилати кишилик һоқуқ кеңишиниң рәиси наҗат шәмим ханға йолланған бу мәктупқа имза қойған. Улар арисида америка сиясйонлиридин боб менандез, германийә парламентиниң әзаси, явропа парламенти хитай бөлүминиң рәиси ренхард бутикофир, әнглийә парламентиниң әзаси дункан симит, японийәниң сабиқ дөләт мудапиә министири ген накатани, германийә йешиллар партийәсидин болған парламент әзаси маргарет бавуз қатарлиқ кишиләр бар икән.

Хәвәрдә ейтилишичә, нөвәттә бир қисим явропа парламентлири арқиму-арқидин хитай һөкүмитиниң ирқий қирғинчилиқини етирап қиливатқан әһвалда елан қилинған бу мәктуп хитай һөкүмитиниң бу мәсилидики җавабкарлиқини сүрүштә қилишта зор әһмийәткә игә икән.

Бирләшмә мәктупта дункан симит әпәнди “нөвәттә б д т кишилик һоқуқ кеңиши әнҗүр япрақлири арқилиқ һакиммутләқ һакимийәтниң җинайәтлирини йошурмақта. Биз буни қобул қилалмаймиз. Чүнки уйғурлар һазир ирқий қирғинчилиққа учраватиду” дегән.

Мәлум болушичә, мәзкур бирләшмә мәктуп йәнә фирансийә, германийә, италийә, японийә, әнглийә қатарлиқ сәккиз дөләтниң ташқи ишлар министирлириғиму йолланған болуп, уларму бу чақириққа аваз қошушқа дәвәт қилинған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.