Санаәтләшкән 7 дөләт гуруһи хитайға қарши 600 милярд долларлиқ ул әслиһәләр қурулуши пиланини башлатқан

Мухбиримиз әркин
2022.06.27
Share on WhatsApp
Share on WhatsApp

Германийәдә өткүзүлгән санаәтләшкән 7 дөләт гуруһиниң рәһбәрлири йиғини 26-июн, йәни йәкшәнбә күни хитайниң “бир бәлвағ бир йол” қурулушиға қарши кәлгүси бәш йилда тәрәққий қиливатқан дөләтләрниң ул әслиһә қурулушиға 600 милярд доллар мәбләғ селиш пиланини қобул қилған.

Германийәниң баварийә шитатидики шилос әлмо қоруқида учрашқан америка президенти байден вә санаәтләшкән 7 дөләт гуруһидики әнгилийә баш министири борис җонсон, канада баш министири җастин тредо, японийә баш министири фумио кишида, франсийә президенти емануел макрон қатарлиқ рәһбәрләр “йәр шари ул әслиһәрләр вә мәбләғ селиш ортақ һәмкарлиқи” намлиқ программини бирликтә тәстиқлиған.

Ройтерс агентлиқиниң хәвәр қилишичә, бу йиғинда президент байден, “тәрәққий қиливатқан дөләтләрдә юқумға охшаш йәр шари характерлик давалғушларни контрол қилишқа ярдәм беридиған моһим ул әслиһәләр кәмчил, шуңа улар буниң тәсирини техиму кәскин һес қилди вә әслигә келиштә қийналди… бу пәқәт инсанпәрвәрлик мәсилисила әмәс, у һәммимизниң иқтисадий вә бихәтәрлик мәсилисидур,” дегән. Президент байденниң ейтишичә, америка кәлгүси бәш йилда федирал һөкүмәт вә хусусий мәбләғ фондилиридин 200 милярд доллар чиқирип, төвән вә оттура һал киримдики дөләтләрниң һава келимат өзгириши, йәр шари сағламлиқ, җинсий баравәрлик вә дигитал ул әслиһә қурулушлирини яхшилишиға ярдәм беридикән.

Ройтерс агентлиқиниң ейтишичә, йиғинда явропа комиссийониниң президенти урсула фон дер лейин, ‍охшаш бир вақитта явропаниң 317 милярд доллар топлап, хитайниң 2017-йилдин башлап йолға қоюшқа башлиған “бир бәлвағ бир йол” қурулушиға қарши изчилиққа игә йәнә бир қурулуш елип баридиғанлиқини ейтқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.