"йәттә дөләт башлиқлири" йиғинида мәҗбурий әмгәк мәсилиси муһим темиларниң бири болди

Мухбиримиз әзиз
2021-10-26
Share

"йәттә дөләт башлиқлири гуруһи" ниң сода министирлири 22-өктәбир күни лондонда бирләшмә йиғин чақирип, буниңдин кейинки хизмәтләрниң бир муһим нуқтиси дуня миқясида мәҗбурий әмгәкни чәкләшкә мәркәзлишиши лазимлиқини тәкитлигән.

"сиясәт" журнилиниң бу һәқтики хәвиридә ейтилишичә, йиғиндин кейинки бирләшмә баянатта: "йәттә дөләт башлиқлири гуруһиниң сода министирлири һәрқандақ шәкилдики мәҗбурий әмгәкни һәмдә униңға четишлиқ тәминләш зәнҗирини мәний қилиду. Җүмлидин дөләт һакимийити арқа тирәк болған һалда аҗиз милләтләрни йеза-игилик, қуяш енергийәси вә кийим-кечәк саһәсидә заманиви қуллар әмгикигә селиши қәтий әйиблиниду," дейилгән. Гәрчә бу баянатта уйғурларниң нами бивастә тилға елинмиған болсиму, әмма униңдики мәзмун асасий җәһәттин уйғур дияридики мәҗбурий әмгәк һадисиси билән толуқ охшашлиққа игә икән.

Хәвәрдә ейтилишичә, нөвәттә дуня миқясида аз дегәндиму 21 милйон киши мәҗбурий әмгәкниң вә заманиви қуллуқниң зиянкәшликигә учраватқан болуп, буларниң зор бир қисиминиң хитайда икәнлики ‍алаһидә тәкитләнгән. Шундақла америка, канада, әнглийә қатарлиқ дөләтләрниң мәҗбурий әмгәкни мәний қилиш һәққидә ениқ қарар елип болғанлиқини алаһидә әскәртиш билән биргә явропа иттипақиниңму бу һәқтә ениқ тәдбир елиши лазимлиқи тилға елинған.

Мәлум болушичә, "йәттә дөләт башлиқлири гуруһи" дунядики әң күчлүк вә қудрәтлик, дәп қариливатқан америка, әнглийә, франсийә, германийә, японийә қатарлиқ йәттә дөләтниң хәлқаралиқ сиясий иттипақи болуп, бу дөләтләр дунядики байлиқниң 60 пирсәнтини контрол қилип турмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт