“Yette dölet bashliqliri” yighinida mejburiy emgek mesilisi muhim témilarning biri boldi

“Yette dölet bashliqliri guruhi” ning soda ministirliri 22-öktebir küni londonda birleshme yighin chaqirip, buningdin kéyinki xizmetlerning bir muhim nuqtisi dunya miqyasida mejburiy emgekni chekleshke merkezlishishi lazimliqini tekitligen.

“Siyaset” zhurnilining bu heqtiki xewiride éytilishiche, yighindin kéyinki birleshme bayanatta: “Yette dölet bashliqliri guruhining soda ministirliri herqandaq shekildiki mejburiy emgekni hemde uninggha chétishliq teminlesh zenjirini men'iy qilidu. Jümlidin dölet hakimiyiti arqa tirek bolghan halda ajiz milletlerni yéza-igilik, quyash énérgiyesi we kiyim-kéchek saheside zamaniwi qullar emgikige sélishi qet'iy eyiblinidu,” déyilgen. Gerche bu bayanatta Uyghurlarning nami biwaste tilgha élinmighan bolsimu, emma uningdiki mezmun asasiy jehettin Uyghur diyaridiki mejburiy emgek hadisisi bilen toluq oxshashliqqa ige iken.

Xewerde éytilishiche, nöwette dunya miqyasida az dégendimu 21 milyon kishi mejburiy emgekning we zamaniwi qulluqning ziyankeshlikige uchrawatqan bolup, bularning zor bir qisimining xitayda ikenliki ‍alahide tekitlen'gen. Shundaqla amérika, kanada, en'gliye qatarliq döletlerning mejburiy emgekni men'iy qilish heqqide éniq qarar élip bolghanliqini alahide eskertish bilen birge yawropa ittipaqiningmu bu heqte éniq tedbir élishi lazimliqi tilgha élin'ghan.

Melum bolushiche, “Yette dölet bashliqliri guruhi” dunyadiki eng küchlük we qudretlik, dep qariliwatqan amérika, en'gliye, fransiye, gérmaniye, yaponiye qatarliq yette döletning xelq'araliq siyasiy ittipaqi bolup, bu döletler dunyadiki bayliqning 60 pirsentini kontrol qilip turmaqta iken.