Америка дөләт мудапиә министири: "хитай билән тоқунуш йүз беришини халимаймиз, әмма мәнпәәтимиз тәһдиткә учриғанда қорқуп қалмаймиз"

Мухбиримиз җәвлан
2021-07-28
Share

CNN Ториниң хәвәр қилишичә, америка дөләт мудапиә министири лойид остин 27-июл күни сингапор хәлқара истратегийә тәтқиқат институтида қилған сөзидә хитайниң һинду-тинч окян районидики тәшәббуси вә қилмишлириниң мәзкур райондики дөләтләрниң игилик һоқуқиға тәһдит шәкилләндүргәнликини, американиң бу райондики дөләтләр билән һәмкарлиқ мунасивитиниң барлиқини һәмдә уларниң һалқилиқ мәнпәәтини қоғдайдиғанлиқини билдүрүп мундақ дегән: "хитайниң җәнуби деңиздики көплигән районларда игидарчилиқ һоқуқиниң барлиқини тәрғип қилиши хәлқара қанунларға хилап. Хитай һөкүмити талаш-тартишларни тинчлиқ билән һәл қилишни халимайду, қанунға һөрмәт қилмайду. Хитайниң җәнуби деңиздила әмәс, һиндистанға қилған таҗавузлуқ һуҗуми, тәйвән хәлқиниң тинчлиқини бузуш һәрикәтлири вә башқа тәһдитлири, шундақла шинҗаңдики уйғур мусулманлириға елип бериватқан ирқий қирғинчилиқ җинайәтлиридин биз буни очуқ көрдуқ".

Хәвәрдә ейтилишичә, бир күн аввал америка ташқи ишлар миниситирлиқиниң муавин минситири винди шерман башчилиқидики өмәк хитай ташқи ишлар министири ваң йи қатарлиқ әмәлдарлар билән сөһбәтләшкәндә қаттиқ талаш-тартиш йүз бәргән. Буму нөвәттә бу икки дөләт оттурисидики вәзийәтниң кәскинликини намайән қилидикән.

Лойид остин йәнә, хитай шунчә көп тәһдитләрни пәйда қилған әһвалдиму американиң хитай билән һәрбий тоқунушқа кирмәйдиғанлиқини, әмма дөләт мәнпәәти еғир тәһдиткә учриғанда арқиға чекинмәйдиғанлиқини билдүрүп мундақ дегән: "хитай билән чоқум урушимиз демәймиз, әмма мәнпәәтимиз тәһдиткә учриғанда қорқуп қалмаймиз".

Лойид остин йәнә американиң өз иттипақдашлири билән һәмкарлишишиниң һинди-тинч окян райониниң бихәтәрлики вә тәрәққияти үчүн зөрүр болған истратегийә икәнликини, американиң бу райондики дөләтләрни америка билән хитайдин бирсини таллашқа мәҗбурлимайдиғанлиқини, бәлки уларни өзара иттипақлишип корона вируси, килимат өзгириши вә район бихәтәрлики қатарлиқ мәсилиләрни бирликтә һәл қилишқа чақиридиғанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт