Amérika dölet mudapi'e ministiri: "Xitay bilen toqunush yüz bérishini xalimaymiz, emma menpe'etimiz tehditke uchrighanda qorqup qalmaymiz"

Muxbirimiz jewlan
2021-07-28
Share

CNN Torining xewer qilishiche, amérika dölet mudapi'e ministiri loyid ostin 27-iyul küni sin'gapor xelq'ara istratégiye tetqiqat institutida qilghan sözide xitayning hindu-tinch okyan rayonidiki teshebbusi we qilmishlirining mezkur rayondiki döletlerning igilik hoquqigha tehdit shekillendürgenlikini, amérikaning bu rayondiki döletler bilen hemkarliq munasiwitining barliqini hemde ularning halqiliq menpe'etini qoghdaydighanliqini bildürüp mundaq dégen: "Xitayning jenubi déngizdiki köpligen rayonlarda igidarchiliq hoquqining barliqini terghip qilishi xelq'ara qanunlargha xilap. Xitay hökümiti talash-tartishlarni tinchliq bilen hel qilishni xalimaydu, qanun'gha hörmet qilmaydu. Xitayning jenubi déngizdila emes, hindistan'gha qilghan tajawuzluq hujumi, teywen xelqining tinchliqini buzush heriketliri we bashqa tehditliri, shundaqla shinjangdiki Uyghur musulmanlirigha élip bériwatqan irqiy qirghinchiliq jinayetliridin biz buni ochuq körduq".

Xewerde éytilishiche, bir kün awwal amérika tashqi ishlar minisitirliqining mu'awin minsitiri windi shérman bashchiliqidiki ömek xitay tashqi ishlar ministiri wang yi qatarliq emeldarlar bilen söhbetleshkende qattiq talash-tartish yüz bergen. Bumu nöwette bu ikki dölet otturisidiki weziyetning keskinlikini namayen qilidiken.

Loyid ostin yene, xitay shunche köp tehditlerni peyda qilghan ehwaldimu amérikaning xitay bilen herbiy toqunushqa kirmeydighanliqini, emma dölet menpe'eti éghir tehditke uchrighanda arqigha chékinmeydighanliqini bildürüp mundaq dégen: "Xitay bilen choqum urushimiz démeymiz, emma menpe'etimiz tehditke uchrighanda qorqup qalmaymiz".

Loyid ostin yene amérikaning öz ittipaqdashliri bilen hemkarlishishining hindi-tinch okyan rayonining bixeterliki we tereqqiyati üchün zörür bolghan istratégiye ikenlikini, amérikaning bu rayondiki döletlerni amérika bilen xitaydin birsini tallashqa mejburlimaydighanliqini, belki ularni öz'ara ittipaqliship korona wirusi, kilimat özgirishi we rayon bixeterliki qatarliq mesililerni birlikte hel qilishqa chaqiridighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet