Xitay taratquliri abdulétip abduréhim damollining "Ochuq xéti" ni élan qildi

Muxbirimiz qutlan
2017-05-15

Xitay taratquliri tünügün, yeni 14-may küni xoten nawagh jamesining xatipi abdulétip abduréhim damollining bir parche "Ochuq xéti" ni élan qilghan we uni hökümet taratqulirida ulap tarqatqan.

Xitay memliketlik islam dini jem'iyitining mu'awin re'isi, Uyghur aptonom rayonluq siyasiy kéngeshning mu'awin re'isi, Uyghur aptonom rayonluq islam dini jem'iyitining re'isi, xoten wilayetlik islam dini jem'iyitining re'isi qatarliq yuqiri derijilik wezipilerni ötewatqan abdulétip abduréhim damollining bir mezgillik süküttin kéyin tuyuqsizla "Ochuq xet" élan qilishi diqqet qozghimaqta.

Aldinqi ayda chet'ellerdiki bir qisim tor betler bilen ijtima'iy taratqularda abdulétip abduréhim damollining xitayda échilghan "Ikki yighin" mezgilide tutqun qilinip, 3 yil késiwétilgenliki heqqide xewer tarqalghan idi.

Radiyomizning bu heqtiki éniqlashliri jeryanida xotendiki bir qisim saqchixanilar bilen qanun orunliri abdulétip abduréhim damollining tutup kétilgenlik xewirini inkar qilmighan bolsimu, emma bu heqte tepsiliy melumat bérishni ret qilghan idi.

Xoten shehirige qarashliq nawagh saqchixanisining bir neper nöwetchi saqchisi bu déloning teptishke ötküzüp bérilgenlikini ilgiri sürgen idi.

Abdulétip abduréhim damollining "Milletler ittipaqliqi shinjangdiki her millet xelqining jan tomuri" dep mawzu qoyulghan "Ochuq xéti" de mundaq déyilgen: "Yéshim chongiyip qaldi, bilim sewiyemmu yuqiri emes, emma men partiyining rehberlikide shinjangda alemshumul özgirishlerning bolghanliqini bilimen… 'üch xil küch' ler millet, din tonigha oriniwélip, islam dinining ehkamlirini burmilap, musulmanlarni aldap, her xil amallar bilen bextlik turmushimizgha buzghunchiliq qilip, bizni kona jem'iyetke qayturmaqchi boldi. Bu ularning uxlimay chüsh körüshi, biz buninggha hergiz yol qoymaymiz."

Xitay taratqulirining tünügündin bashlap abdulétip abduréhim damollining namidiki "Ochuq xet" ni tuyuqsiz otturigha chiqirishi közetküchiler bilen Uyghur diyarining weziyitige yéqindin diqqet qiliwatqan her sahe kishiliride türlük texminlerni peyda qilmaqta.