Uyghur dini zat, jama'et erbabi abdulqadir yapchan ependi qoyuwétildi

Bir aydin béri türkiye saqchi da'iriliri teripidin tutup turuluwatqan Uyghur dini zat, pa'aliyetchi abdulqadir yapchan ependi peyshenbe küni échilghan sotta aqlinip qoyuwétilgen.

Abdulqadir yapchan ependi 31-awghust küni istanbulda namelum seweb bilen tutqun qilin'ghan idi. Uning tutqun qilin'ghan waqtining del xitayda “G-20” dölet bashliqliri yighini échilmaqchi boluwatqan mezgilge toghra kélishi hem uning tutqundiki mudditining uzurap kétishi chet'ellerdiki Uyghur jama'etchilikini endishige salghan idi.

Dunya Uyghur qurultiyi re'isi rabiye qadir xanim özi biwasite bayanat bérip, türkiye hökümitini abdulqadir yapchan'gha adil mu'amile qilishqa chaqirghan.

Istanbuldiki ma'arip we hemkarliq jem'iyitidin élin'ghan uchurlardin qarighanda, abdulqadir yapchan ependi 29-séntebir küni chüshtin kéyin istanbulning bakirköy rayonidiki sot mehkimisige chiqirilghan. 2 Sa'et etrapida dawam qilghan sotta abdulqadir yapchan ependining xitay hökümitining uni “Térrorluq gumandari” dep shikayet qilishigha asasen tutqun qilin'ghanliqi melum bolghan. Emma türkiye sot da'iriliri abdulqadir yapchan ependining “Térrorchi” liqi heqqide xitay terep teminligen uchurlarning put tirep turalmaydighanliqini, ispatlarning yéterlik emeslikini bildürüp, uni gunahsiz dep élan qilghan we shu künning özide qoyuwetken.

Abdulqadir yapchan ependining saq-salamet qoyuwétilishi sot aldida kütüp turghan Uyghur jama'itini xushalliqqa chömdürgen. Ular abduqadir yapchan bilen quchaqliship körüshüp uni tebrikleshken. Uyghur qurultiyining mu'awin re'isi séyit tümtürk, türkiye ma'arip we hemkarliq jem'iyitining bashliqi hidayitullah oghuzxan ependiler özliri biwasite uni kütüwélishqa barghan.