Хитай явропа иттипақиға русийә билән бирлишип қурған қәшқәрдики адәмсиз учқу завутиниң бир тәрәп қилинғанлиқини ейтқан

Хитайниң явропа иттипақиға униң қәшқәрдә русийә билән бирлишип адәмсиз қораллиқ учқу завути қурғанлиқи һәққидә зиддийәтлик учурларни бәргәнлики шуниңдәк униң бу завутниң бир тәрәп қилинғанлиқини билдүргән болсиму, әмма бәзиләрниң униңға қайил болмиғанлиқи илгири сүрүлмәктә.

Хоңкоңда чиқидиған “җәнубий хитай әтигәнлик почтиси” гезитиниң хәвәр қилишичә, нөвәттә явропа иттипақи русийәгә қарита йүргүзүлгән ембаргоға хилаплиқ қилған 25 хитай ширкитини қара тизимликкә киргүзүшни пиланлимақтикән. Хәвәрдә, вәзийәттин хәвәрдар әмәлдарларниң бәргән учури нәқил кәлтүрүлүп, хитайниң явропа иттипақиға хели бир мәзгиллик кечикиштин кейин, қәшқәрдики адәмсиз учқу завути һәққидә зиддийәтлик учурларни бәргәнлики, хитай илгири бундақ бир мәсилиниң барлиқини инкар қилған болсиму, лекин һазир бу мәсилиниң бир тәрәп болғанлиқини қәйт қилғанлиқи билдүрүлгән.

Ройтерс агентлиқи 2024-йили 9-айда, хитайниң шенҗендики бир техника ширкитиниң русийә һәрбий санаити системисиға қарашлиқ бир ширкәт билән бирлишип, қәшқәр иқтисадий тәрәққият райони” да қораллиқ адәмсиз учқу ишләпчиқирип русийәни тәминләватқанлиқи, русийәниң бу адәмсиз учқуларни украина җәң мәйданида ишлитиватқанлиқини хәвәр қилған. Бу хәвәр америка вә явропа иттипақиниң алаһидә диққитини қозғиған.

Явропа иттипақи вә әнглийәни өз ичигә алған 15 явропа дөлити ортақ дипломатик тәләп қоюп, хитайниң буниңға чүшәнчә беришини тәләп қилған. Хитай ташқи ишлар министирлиқи илгири “биз тоқунушуватқан һечқандақ бир тәрәпни әҗәллик қораллар билән тәминлимидуқ, биз һәрбий вә һәр саһәдә ишлитилидиған адәмсиз учқуларни експорт қилишни қанун-түзүм бойичә қаттиқ контрол қиливатимиз” дегән. Лекин “җәнубий хитай әтигәнлик почтиси” ниң хәвиридә, қәшқәрдики адәмсиз учқу завутиниң конкрет қандақ бир тәрәп қилинғанлиқи тәпсилий тилға елинмиған, шундақла бәзиләр хитай тәрәпниң бу чүшәндүрүшигә анчә қийин болмиғанлиқини билдүргән. явропа иттипақи илгири 70 пирсәнт сәзгүр вә юқириқи техникилиқ мәһсулатларни русийә армийәсигә хитай тәминләватқанлиқини мөлчәрлигән.