Xitay bir yildin buyan rusiyege ademsiz uchqu (dron) sétip bergen

Xitay hökümiti rusiyege qoral yardimi bériwatqanliqini izchil inkar qilip kéliwatqan bolsimu, emma rus armiyesining ukra'inadiki urush meydanini charlishi we uchur igilishige qolayliq bolghan ademsiz uchqu (dron) larni dawamliq teminlep turghan.

“Nyu-york waqti géziti” ning 22-mart küni élan qilghan bir xewiride éytilishiche, rusiye ukra'inagha hujum qilghan mushu bir yil ichide, xitay rusiyege 12 milyon dollarliq ademsiz uchqu we ularning zapchaslirini sétip bergen. Bu ayropilanlar xitayning eng chong ademsiz uchqu yasash shirkiti DJI we bashqa kichik shirketler teripidin yasalghan bolup, xitayning wasitichi shirketliri ularni her xil yollar arqiliq éksport qilidiken.

Bu ademsiz uchqulargha amérikaning téxnikisining qétilghan-qétilmighanliqi téxi éniq emes iken. Eger qétilmighan bolsa, uning rusiyege sétip bérilishi qanuniy mesile emes, belki siyasiy mesile bolidiken.

Rusiye bu ademsiz uchqularni sétiwélip, ukra'inadiki urush meydanining aldinqi sépide charlashqa ishlitidiken. Töt quyruqtiki chaqpiliki bilen uchidighan bu uchqular rusiye üchün oq-doridekla muhim qoralgha aylan'ghan bolup, ukra'ina terep ularni étip chüshürüsh üchünmu nurghun chiqim tartidiken.

Bu ademsiz uchqularni éksport qilishni chekleshning qiyin bolushidiki seweb, bu nersiler peqet urush üchünla emes fotografchilar we kamérachilarning boshluqtin süret-widiyo tartishi, öy-mülük shirketlirining yer-zémin ölchishi üchünmu ishlitilidighan bolghachqa, xitay shirketliri bu yochuqtin paydilinip, rusiye we bashqa döletlerge uni sétip béridiken؛ uning néme meqsette sétilidighanliqi éniq bolmighachqa, uni chekleshmu tes bolidiken.