Сәрвәр даниш: "хитай һазир афғанистанниң ишәнчлик дости!" деди

Мухбиримиз әзиз
2017-08-01
Share

Хитайниң ғайәт зор миқдарда мәбләғ селип пүтүн күчи билән йолға қоюватқан "бир бәлвағ бир йол қурулуши" ниң бир муһим мәзмуни хитайға қошна болған бир қисим дөләтләрни өзигә тартиш болуватқанлиқи мәлум.

Йеқинда уйғурлар дияридики биринчи номурлуқ һоқуқдар шәхс чен чуәнгониң үрүмчигә зиярәткә кәлгән афғанистанниң муавин президенти сәрвәр даниш билән учришиши бу нуқтини йәнә бир қетим гәвдиләндүрди.

"тәңритағ тори" ниң хәвиригә қариғанда 30-июл күни сәрвәр даниш башчилиқидики афғанистан вәкилләр өмики үрүмчигә зиярәткә келип, чен чуәнго башчилиқидики хитай даирилири билән мәхсус сөһбәттә болған.

Сөһбәттә чен чуәнго афғанистанни "ишәнчлик яхши қошна" дәп тәриплигән болса, сәрвәр даниш хитайни "афғанистанниң әң ишәнчлик дости" дегән һәмдә хитайниң йиллардин буян афғанистанни қоллап кәлгәнликигә тәшәккүр билдүргән. Икки тәрәп сөһбәт җәрянида нуқтилиқ қилип хитайниң "бир бәлвағ бир йол қурулуши" үчүн зөрүр болған "террорлуққа вә ‹үч хил күчләр' гә қарши күрәштә зич һәмкарлишиш, шу арқилиқ район бихәтәрликигә капаләтлик қилиш" һәққидә сөзләшкән.

Вәзийәт анализчилири бу һәқтә пикир қилип, "хитай билән һиндистан оттурисида сүркилиш болуватқанда хитайниң һиндистан вә өзиниң қошниси афғанистан билән қоюқ дост тартиши вә һәмкарлиқни күчәйтиши әмәлийәттә ‹бир чалмида икки пахтәк соқуш' ни мәқсәт қилғанлиқи, афғанистанниң болса пурсәттин пайдилинип хитайдин техиму үнүмлүк мәнпәәткә еришишни мәқсәт қилидиғанлиқи" ни оттуриға қоюшти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт