Afghanistanda xitaylar qaynaydighan bir méhmanxana qoralliq hujumgha uchridi

Afghanistan paytexti kabuldiki xitay tijaretchiler qaynaydighan bir méhmanxana 12-dékabir qoralliq hujumgha uchrighan. Birleshme agéntliqning xewer qilishiche, doxturxana da'iriliri qoralliq hujumda yarilinip doxturxanigha élip kélin'gen 21 kishidin üchining ölgenlikini éytqan. Kabulda bir italiye ammiwi teshkilatining bashqurushidiki bu doxturxanining twittérda élan qilghan uchurida, “21 Neper yaridarni kütüwalghaniduq, yaridarlardin 3 nepiri kelgende ölüp bolghan” dep körsitilgen. Birleshme agéntliqning xewiride, méhmanxana namelum qoralliqlarning hujumigha uchrighanliqi, hujumgha uchrighan méhanxanining xitay tijaretchiler qaynaydighan orun ikenlikini bildürülgen.

Taliban hökümitining bayanatchisi zebihulla mujahit, ikki chet'el puqrasining dérizidin sekrep qachqanda yarilan'ghanliqini éytqan. Halbuki, talibanlarning kabul saqchi bashliqining bayanatchisi xalid zadran, hujumning birqanche sa'et dawamlashqanliqi, nöwette tazilash herikitining dawamlishiwatqanliqini bildürgen. Qoralliq hujumning kim teripidin élip bérilghanliqi we bu méhanxanini hujum nishani qilip tallishidiki meqsiti hazirgha qeder éniq bolmisimu, lékin kabul saqchi idarisining bayanatchisi hujumning “Nachar éléméntlar” teripidin élip bérilghanliqini éytqan. Uning wats'ap ijtima'iy taratqu supisi arqiliq élan qilghan uchurida körsitishiche, nöwette “Amanliq küchliri neq meydanda yétip kelgen bolup, hujumchilarni tazilimaqtiken”.

Talibanlar bu yil yazda kabulgha bésip kirip, hakimiyetni tartiwalghandin kéyin, xitay talibanlarni afghanistanning qanunluq hökümiti, dep resmiy étirap qilmighan bolsimu, lékin uning toluq diplomatik munasiwetni dawamlashturup kelgen az sandiki döletlerning biri bolghan. Bu jeryanda talibanlar xitaygha herqandaq bir küchning afghanistanni baza qilip, bashqa döletlirige qarshi pa'aliyet qilishigha yol qoymaydighanliqigha wede bergenidi.