Afriqa döletlirining béyjingda turushluq diplomatliri Uyghur élida ziyarette bolghan

Muxbirimiz erkin
2023.02.03

Afriqa döletlirining béyjingda turushluq bash elchi we diplomatliridin teshkil tapqan bir ziyaret ömiki 2-féwral Uyghur élida ziyarette bolghan. Xitay taratqulirining xewer qilishiche, ziyaret ömiki Uyghur aptonom rayonluq partkomning sékritari ma shingruy we Uyghur aptonom rayonining re'isi erkin tuniyaz bilen körüshüp, amérika hökümiti we bezi gherb parlaméntliri teripidin “Irqiy qirghinchiliq” dep eyiblen'gen xitayning “Shinjang siyasiti” ni qollaydighanliqini ipadiligen.

Xitayning hökümet taratqusi bolghan “Yer shari waqti géziti” 3-féwral bergen bu heqtiki xewiride, ziyaret ömikining “Bu rayonning térorluq we ashqunluqqa qarshi turushtiki tirishchanliqigha yuqiri baha bergenliki we xitayning yolluq meydanini qet'iy qollaydighanliqi” ni bildürgenlikini éytqan.

Bu ömekning b d t kishilik hoquq kéngishining yéngi bir nöwetlik pesillik yighini bashlinish aldida turghan, yighinda gherb döletlirining Uyghurlar mesilisini qayta otturigha qoyushi perez qiliniwatqan bir waqitta Uyghur élida ziyarette bolushi diqqet qozghidi. Mezkur ziyaret ömikige qatnashqan afriqa döletlirining hemmisi iqtisadiy jehettin xitaygha zich baghlan'ghan, shundaqla b d t da xitayni qollap kéliwatqan döletler bolup, ötken yili b d t ning Uyghur mesilisini muzakire qilish teklip layihesi mezkur ziyaret ömikidiki bezi afriqa döletlirining yardimide ret qilin'ghan idi.

“Shinjang géziti” ning bildürüshiche, ziyaret ömiki sénigal, bénin, mali, rwanda, madagaskar, malawi, uganda, lisatto, chad qatarliq döletlerning bash elchi we diplomatliridin teshkil tapqan iken.

“Shinjang géziti” ning körsitishiche, ma shingruy ziyaret ömiki bilen körüshkende mundaq dégen: “Bu ziyaret arqiliq köpchilik shinjangning ijtima'iy bixeterliki we muqimliqi, tereqqiyatning üzlüksiz yaxshilinishi, kishilerning tinch we qana'et ichide yashash we ishleshtiki heqiqiy ehwalini téximu chongqur chüshinidu. Silerning shinjangda körgen we anglighanliringlarni téximu köp kishilerge tonushturushunglarni ümid qilimen.”

Halbuki, chet el analizchilirining éytishiche, bu ziyaret gherb döletlirining xitayning Uyghurlargha qaratqan irqiy qirghinchiliqini jawabkarliqqa tartish tirishchanliqigha qarshi élip barghan diplomatik pa'aliyitining bir parchisi iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.