Airbnb Ширкитиниң биңтуән тәвәсидики өйләрни иҗаригә бериватқанлиқи паш болди

Мухбиримиз әзиз
2021-11-30
Share

Хусусийларниң өйлирини башқиларға иҗарә бериш вакаләтчилики билән даңқ чиқарған Airbnb ширкитиниң уйғур дияридики биңтуәнләргә қарашлиқ җайларға селинған 14 иҗарә өйни иҗарә бериш тизимликигә қошқанлиқи йеқинда америкадики көпчиликкә тонушлуқ Axios ториниң из қоғлап тәкшүрүшидә дәсләпки қәдәмдә паш болди.

Мәзкур торбәтниң бу һәқтики тәкшүрүш доклатида ейтилишичә, Airbnb ширкити иҗарә беришкә елан бәргән бу өйләр биңтуәнләр тәвәсидики йәрләргә селинған икән. Биңтуән системиси болса уйғур дияридики ирқий қирғинчилиқ вә инсанийәткә қарши җинайәтләрниң баш иҗрачиси болуш сүпити билән америка һөкүмити җаза елан қилған әң муһим иҗтимаий вә сиясий гәвдә икән. Бундақ әһвалда Airbnb ширкитиниң бу өйләрни иҗарә тизимликигә қошуши маһийәттә америка қанунлириға хилап қилмиш һесаблинидикән.

Тәкшүрүш доклатида ейтилишичә, Airbnb ширкити 2022-йилидики бейҗиң қишлиқ олимпик мусабиқисини иқтисадий җәһәттин қоллаватқан 13 чоң ширкәтниң бири болуп, нөвәттә америка, әнглийә қатарлиқ бир қисим дөләтләр бу мусабиқини дипломатик байқут қилишни ойлишиватқанлиқини билдүрмәктә икән.

Һалбуки, Airbnb ширкити биңтуән системисидики бу өйләрни иҗарә тизимликигә қошуш һәққидә сөз қилип: "җаза тәдбирлири бу өйләргә қаритилмиған. Шуниңдәк бизниң бу һәқтики иш беҗириш тәртипимиз америка малийә министирликиниң җаза елан қилиш һәққидики бәлгилимилиригә хилап кәлмәйду," дәп туривалған. Әмма бу өйләр һәққидики еланниң өзидә бу өйниң биңтуән тәвәсидики қайси "рота" тәвәсидә икәнлики ениқ ейтилған.

Доклатта көрситилишичә, трамп һөкүмити дәвридики җаза тәдбирлири алиқачан ениқ қилип: "биңтуән тәвәсидики һәрқандақ мүлүккә бағлинишлиқ һәрқандақ сода паалийәтлири чәклиниду" дәп көрсәткән болуп, уйғур дияридики зор тутқун, лагерлар системиси вә мәҗбурий әмгәк қатарлиқ бир қатар җинайәтләрниң һәммисидә биңтуән системиси баш рол ойнап кәлмәктә икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт