Xitay hökümitining “Aliy mektep oqughuchilirini ishqa orunlashturush” layihesi guman qozghimaqta

Xitay hökümiti bashqurushidiki “Tengritagh tori” ning 9-awghusttiki xewiride éytilishiche, Uyghur aptonom rayonluq hökümet da'iriliri yéqinda “2022-Yilliq aliy mektepni püttürgen oqughuchilarni ishqa orunlashturush weziyitide muqimliq berpa qilish xizmet layihesi” ni élan qilghan. Bu qarar layiheside herqaysi ma'arip sistémisi, iqtisadiy sahe we jem'iyet mu'esseliri birliship yol tipish hemde shu arqiliq aliy mektepni püttürgen oqughuchilarni ishqa orunlashturushta “Yéngi yol tépish” alahide tekitlen'gen.

Xewerde nöwettiki aliy mektepni püttürgen oqughuchilarni ishqa orunlashturushtiki eng muhim xizmet qatarida ishqa orunlashturush yolini kéngeytish we ish orni mesilisini hel qilish alahide tilgha élin'ghan. Shuningdek herqaysi jaylardiki aliy mekteplerning rehberlik qatlimi buninggha biwaste hemdem bolush tekitlen'gen. Shuning bilen birge bu yéngi xizmet layihesi boyiche yéngidin xizmetke qobul qilin'ghan oqughuchilargha yuquri sommiliq ishqa orunlishish toluqlimisi, heqsiz salametlik sughurtisi, soda béjini kechürüm qilish we ma'ash qoshumchisi bilen teminlesh qatarliqlar otturigha qoyulghan.

Gerche xewerde “Yéngidin aliy mektepni püttürgen oqughuchilar” ning qeyerdiki oqughuchilar ikenliki éytilmighan bolsimu, emma xewerdiki tepsilatlar bularning xitay ölkiliridiki xitay oqughuchilar ikenlikini ishare qilmaqta iken. Yene kélip Uyghur diyaridiki Uyghur aliy mektep oqughuchiliri xitay ölkiliride oqup kelgen we xitay, Uyghur tilllirigha puxta bolushidin qet'inezer, ishsizliqning derdini tartiwatqanliqi türlük uchur yolliridin melum bolghan idi. Yéqinda bolsa xitay hökümitining “Gherbke yardem bérish pilani” namida Uyghur diyarigha minglap xitay oqughuchilarni yötkewatqanliqi köplep melum bolghan idi. Washin'gton shehridiki “Komunizim qurbanliri xatire fondi” ning tetqiqatchisi adryan zénz, bu mesile heqqide toxtilip xitay hökümitining kelgüsi 20 yilda Uyghur diyaridiki “Nopusni elalashturush” istratégiyesi boyiche Uyghur diyarining jenubiy qismigha zor sanda xitay nopusini köchürüsh pilanining ijra qiliniwatqanliqini alahide tekitligen idi.